LUKAS 15 - Kitta' Passitallikang Bau KAREBA BAJI'

Pakkalebaraang ripassala jimbala tappela' 15:1-7

¹ Sikonjo palele sima na tau doraka injo, mange ngase'i ri Isa laappilangngeri.

² Jari a'moro-moroimu tau Farisi na guru Tora' injo, lakua, Tau inni narimai sikuanna tau doraka na surangi nganrei.

³ Jari lapaui pakkalebarang inni Isa mange ri iyai,

⁴ ”Inai ri kau intu rie' jimbala'na sibilangang kajunna, na ampa tappela'i sikaju, gele labokoi nukaassapulo kaassa injo ri parang luara na mangei laboja jimbala lingu injo sa'genna lapiuppai?

⁵ Ampa lauppamu, lasompoi jimbala injo lalang rikarannuang,

⁶ na riambattunamo ri sapo ia lakeo' ngase'i bahaanna surang limbo-limbona na lakua mange ri iyai: A'rannu-rannuki kakuuppai muliang jimbala'ku nutappela' injo.

⁷ Nakke appau mange ri kau: Appakonjo todo'i injo larie' karannuang ri Suruga saba' rie' se're tau doraka jarra, mangeanna pole karannuang rikanara tau naba kaassapulo kaassa injo nagelei parallu jarra.”

Pakkalebarang bulaeng tappela' 15:8-10

⁸ ”Iyareka bahine anteeang rie' bulaenna sampulo batunna, na ampa tappela'i sibatu, gele lapappabolakang sulo ampai labarrasa saponna na laboja baji'i sa'genna lauppa?

⁹ Ampa lauppamu, ia lakeo' ngase'i bahaanna surang limbo-limbona na lakua: A'rannu-rannuki saba' kuuppamu bulaengku nutappela' injo.

¹⁰ Nakke appau mange ri kaui: Appakonjo todo'i rannuna sikonjo malaeka'na Allataala rikanara rie'na se're tau jarra battu ridorakana.”

Pakkalebarang ana' tappela' 15:11-32

¹¹ Appaui pole Isa, ”Rie' se're tau rie' rua ana' bura'nena.

¹² Lakuamo ana' bungko injo ri ammanna: Amma, sareang memamma mae pa'barang-barangang nua'jari injo dahuangku. Jari ammanna lapa'dahu-dahuang toje'mu pa'barang-baranganna mange ri iyai.

¹³ Gele sallo maenna injo labalukang ngase' dahuanna ana' bungko injo ampai a'lampa dere ri kota maraeng. Konjomange lapela'-pela' barang-baranna lalang ritallasa a'labo-labo.

¹⁴ Sungka'i la'busumo sikuanna, battumu kalara' bakka' ri kota lapammari injo na ia pakaramula tommo kalara'.

¹⁵ Jari a'lampai na anjamai rise're tau ri kota injo. Tau injo lasuroi mange ri koko akkalahaki bahi.

¹⁶ Jari a'ra' todo'mu laassi pomponna ri baru'bu' nua'jari injo kanre bahi, mingka gele rie' manna se're tau assare mange ri ia.

¹⁷ Sikalinna ngu'rangii, nalakua: Sanna' lohe pajamana ammangku nukala'bi-la'biangi ri kanre, mingka nakke konni mae lamate pa're.

¹⁸ Bajikanga muliang na a'lampa mange ri ammangku na lakukua mange ri ia: Amma, nakke dorakama mange ri Allataala surang mange ri Amma,

¹⁹ gelema siratang riare' ana' Amma, ripaa'jari mamoa assimpole ata pajamamu Amma.

²⁰ Maeng injo a'lampamu na muliang toje'i mange ri ammanna. Rihattu derena juapa, lajanjammu ammanna, jari a'rikodommu saba' ripangamaseang. Allari ammanna mange laruppai ampai laraka' na lahau ana'na.

²¹ Lakuamo ana' injo mange ri ia: Amma, nakke dorakama mange ri Allataala surang mange ri Amma, gelema siratang riare' ana' Amma.

²² Mingka ammanna injo lasuroi sikonjo atanna: Lassiriko ngerang mae baju kaminang ballo, pipakeangi mange ri ia na mupipakei todo'i sinsing ri karameng limanna surang sapatui bangkenna.

²³ Ngalleko pole ana' tedong so'mo' injo, sumbelei na maemoko langanre-nganreki na a'rannu-rannuki.

²⁴ Saba' ana'ku inni maemmu mate mingka attallasai muliang, ia tappela'i mingka riuppai muliang. Jari pakaramulamu a'rannu-rannui.

²⁵ Mingka ana' lihuana rie' juapai ri koko na rihattu muliannamo surang riseppa'namo ri sapo, allangngeremu sa'ra suling surang kelong tari-tariang.

²⁶ Jari akkeo'mu se're atanna na akkuta'nangi mange ri ia apa kajariang.

²⁷ Appihalimu ata injo: Rie'i muliang arimmu na ammammu maeng assuro nyumbele tedong so'mo', saba' lauppai muliang na baji'-baji' juai.

²⁸ Jari kuku'i ana' lihua injo na gele a'ra' antama' ri saponna. Jari ansulukammu ammanna ampai lasihi-sihi.

²⁹ Mingka ia appihali mange ri ammanna: Janjangimu, nakke attaung-taungi kupanjamaangki Amma na gelepa minang a'bali ripassuroammu, mingka mae ri nakke Amma gelekalepa minang risare lanyumbele ana' bembe lakupake a'rannu-rannu surang baha'-bahaangku.

³⁰ Mingka ampanna jua rie' ana'mu Amma tumaeng injo mela'-melaki pa'barang-barangang Amma assurang bahine bandarang, na ripanyumbeleangi tedong so'mo'.

³¹ Lakuamo ammanna mange ri ia: Oe ana', kau sanging assurang juaki na sikonjo anungku, anummu todo'i.

³² Siratangki a'rannu-rannu surang atte'ne-te'ne saba' arimmu inni maemmu mate mingka attallasai muliang, maemmu tappela' mingka riuppai muliang.”