LUKAS 14 - Kitta' Passitallikang Bau KAREBA BAJI'

Appakagassingi pole Isa ri allo Passambajangang 14:1-6

¹ Rie' se're allo Passambajangang mangei Isa ri saponna sala se're ponggaha ri sikuanna tau Farisi langanre ri injo. Sikuanna tau rie' ri injo latangara baji'i Isa.

² Sikalinna rie' se're tau garring amboro pomponna ammenteng ri a'rakanNa.

³ Jari akkuta'nangi Isa mange risikonjo guru Tora' surang risikuanna tau Farisi injo, ”Ripakkulleang juaika appakagassing tau garring ampa allo Passambajangang iyareka gele?”

⁴ Ammottoki kale-kale juai. Jari Isa latetengi limanna tau garring injo na lapakagassingi ampai lasuro muliang.

⁵ Maeng injo lakuamo Isa mange ri iyai, ”Inaimo ri kau ngase' intu gele lassiri laalle ana'na iyareka tedonna ampa a'dappe'i naung ri buhung, manna injo allo Passambajangang?”

⁶ Manna se're tau gele rie' tuakkulle appihali ri Isa.

Tampa' nukaminang la'biri surang nukaminang tuna 14:7-11

⁷ Saba' lajanjangi Isa ma'nassana sikonjo toana sanging a'ra'i lapattolongi tampa' kaminang rate injo, Ia lapaui pakkalebarang inni mange iyai,

⁸ ”Ampa rie' se're tau lakeokiko mange ripa'buakiang, akolalo attolong kaminang rate ri ulu, barang rie' tau maeng lakeo' opuna bua' tula'birangang ia na kau;

⁹ solanna tau injo, tau lakeo' injoko andamu mange ri kau na lakua: Sareangi tampa' inni mange tau intu. Jari siri' malongko'moko a'lampa mange attolong ri tampa' kaminang tuna injo.

¹⁰ Mingka, ampa rikeo'ko, mangelaloko attolong ri tampa' nukaminang tuna. Barang komo apa opuna sapo battui na appaui mange ri kau: Urang siana', ri injoki mange attolong ri tampa' kaminang rate ri ulu. Ri appakonjona nguppako kala'birang ri a'rakanna sikuanna tau lohe langanre injo surangang kau.

¹¹ Saba' inai lapakala'biri kalenna, laripakatunai intu na inai lapakatuna kalenna laripakala'biri intu.”

Inai parallu rikeo' 14:12-14

¹² Maeng injo appaui pole Isa mange ri tau lakeo' injoi, ”Ampa laappakanre alloko iyareka laappakanre bangngiko, akolalo keo'i baha'-bahaammu iyareka bija-bijammu iyareka limbo-limbomu tukalumannyang injo, saba' iyai injo lalabalasai ri kau na lakeo' todo'ko na ri appakonjona muuppamu balasa'na.

¹³ Mingka ampa laa'bua'ko panganre-nganreang, keo'i tau kaasi-asi injo, tau assala-salaang na tau pesuki injo surang tau buta injo.

¹⁴ Lasungguko intu, saba' iyai injo gele rie' apa-apanna lalapa'balasang mange ri kau. Saba' lamuuppai sallo' pabalasa'na, ri allo ripakaattallasa'na muliang sikuanna tau naba.”

Pakkalebarang ripassala tau lohe bisaranna 14:15-24

¹⁵ Rilalangngere'na injo rie'mo se're tau battu ri toana injo appau mange ri Isa, ”Sunggulalo tau ripappatalaang injo kanre lalang ri Pakkaraengang Allataala.”

¹⁶ Mingka appaui Isa mange ri ia, ”Maeng rie' se're tau a'buaki bakka' na lohe tau lakeo'.

¹⁷ Rihattu laripakaramulanamo pa'buakiang injo, ia lasuroi atanna appabattu pau mange risikuanna tau maeng injo lakeo': Maemoko! saba' sadiamu sikuanna.

¹⁸ Mingka iyai ngase', tasse're-se're tau, pakaramulamu ngera ampung. Tau makase're injo appau mange ri ia: Nakke maenga ammalli koko na parallui lamange kudowa'; riampungia.

¹⁹ Tumaraeng injo lakua: Nakke maenga ammalli limangkalabini tedong na a'ra'i lamange kusoba; riampungi mamoa.

²⁰ Tumaraengang injo pole lakua: Nakke bau kalepa a'bonting na kanara injomo gelea akkulle lamange.

²¹ Jari muliammu ata injo lajarrungang ngase'i injo ri karaenna. Jari kuku'i opuna sapo na lakua mange ri atanna: Lassiriko a'lampa mange risikonjo lalang bakka' surang risepe'-sepe' kota na urang ngase'i mae sikuanna tau kaasi-asi, tau assala-salaang injo na tau buta injo surang tau pesuki injo.

²² Jari lapaui ata injo: Karaeng, apa nuripassuroang injo maeng ngase'mu kugeokang, mingka manna appakonjo rie' juapa tampa' pattolongang.

²³ Jari lakuamo pole karaeng injo mange ri atanna: A'lampako isse' mange risikonjo lalang bakka' surang lorong na passai mae konni tau rie' ri injo, solanna rassi ngase' sapongku.

²⁴ Saba' Nakke appau mange ri kaui: Gele rie' manna se're tau battu risikuanna tau maeng injo rikeo' lalakasia'i kanre pa'buakiangKu.”

Parallui ripela' sikuanna ampa laminahangki ri Isa 14:25-35

²⁵ Rie' se're hattu rie'mo siloheang tau a'rurung-rurung minahang ri Isa ripa'lingkaanNa. A'gilingi Isa ampai appau mange ri iyai,

²⁶ ”Ampa rie' se're tau laminahang ri Nakke na lapiamui juapai ammanna, idonna, bahinenna, ana'-ana'na, urang siana' bura'nena iyareka urang siana' bahinena, surang pole nyahana, ia gele akkulle a'jari ana' gurungKu.

²⁷ Inai jua gele a'ra' marasai na minahangi ri Nakke, ia gele akkulle a'jari ana' gurungKu.

²⁸ Saba' inaimo ri kau intu ampa a'ra'i ambaung se're sapo nagele attolong riolo larekeng ongkoso'na, ganna' juaika doe'na lalapa'maeng jamaanna injo?

²⁹ Solanna ampa maeng lapatabamu pallanggana nagele lakulle lapa'maeng, tantu sikuanna tau anjanjang injo, attua-tuai mange ri ia,

³⁰ na lakuai: Tau intu ambaung todo'i sapo nagelejuai lakulle lapa'maeng.

³¹ Iyareka, karaeng anteeang ampa a'ra'i a'lampa lamange bundu' laa'bali karaeng maraeng nagele attolong appikki'-pikkiri riolo apa sampulosa'bu tau ia akkulle juamu laa'raki bali labattu injo mange ri ia lohena ruampulosa'bu tau?

³² Ampa gele, ia lassuro tau rihattu derena juapa balinna lalapakuta'nangangi lalang passidameang.

³³ Appakonjo todo'i ri kau intu, tau untu' injo assisala risikonjo pa'barang-baranganna, gele akkulle a'jari ana' gurungKu.

³⁴ Se'la intu toje'i baji', mingka ampa se'la injo a'jari la'bai, apamo laripake appakapa'ja ri ia?

³⁵ Gelemo rie' matu-matunna ri koko laappakaso'mo' tana iyareka laappakabaji' lamung-lamung, jari lapela'mamoi tau. Inai rie' tolinna, parallui appilangngeri!”