LUKAS 12 - Kitta' Passitallikang Bau KAREBA BAJI'

Pangajarang mange jua ri suro-suro 12:1-12

¹ Rihattu injo assa'bu-sa'bui lohena tau a'domung, sa'genna assiosso'-ossokimu. Jari pakaramulamu Isa ngajara, riuru-uruna mange jua ri suro-suroNa, lakua, ”Tutuiko mange ri bibi, iamo intu ripamunape'na tau Farisi intu.

² Gele rie' manna se're nutattongko' nagele laribungkara na gele todo' rie' nutassa'bu nagele laripappiissekang.

³ Injomo saba'na apa jua mupau lalang rikalammang lakalangngerangi lalang risinara, na apa jua mubisi'-bisi' mange ri toli lalang ri bili', injo laripa'nga'ngarangi battu rate ripa'buhungang sapo.

⁴ Nakke appau ri kaui, oe baha'-bahaangKu; akoimo malla' mange ri iyai tuakkulle injo muno batangkale na maeng injo tide'mo nuakkulle lageokang.

⁵ Lakujo'jokangiko inai parallu mukamallakangi. Malla'moko ri Allataala, Tuampa maengi ngalle nyaha, rie' kahasana laappabuang tau antama' ri naraka. Sitoje'na Nakke appau mange ri kaui, Iamo mukamallaki.

⁶ Gelejua dongi' intu ribalukangi limangkaju, ballinna rua doe' ki'di'? Toje'i mannamamo appakonjoi gele rie' manna sikaju lakaluppai Allataala,

⁷ na manna pole uhu' ri ulummu ta'rekeng ngase'i. Jari akomo malla', saba' riekang jua kau anggaranna na dongi lohe injo.

⁸ Nakke appau mange ri kau: Inai jua tau ngani ri Nakke ri a'rakang paranna tau, Ana' Rupatau laani todo'i ri a'rakang sikonjo malaeka'na Allataala.

⁹ Mingka inai lasassalia ri a'rakang paranna tau, ia larisassali todo'i ri a'rakang malaeka'-malaeka'na Allataala.

¹⁰ Inai jua a'bisara labaliangi Ana' Rupatau, injo lariampungi juai kadorakaanna, mingka inai attua-tua ri Nyaha Tangkasa, gelemu lariampungi kadorakaanna.

¹¹ Ampa rie' tau laparapa'ko mange ri pangadelang agama iyareka mange ri pamarenta na ri tukahasa injo, akomo bata-bata anteekamua na apa nuparallu lamupau passa'bi ri kalemmu.

¹² Saba' rihattu injomo Nyaha Tangkasa langajara ri kau apa nuparallu lamupappihaliang.”

Tau kalumannyang mingka ba'gai 12:13-21

¹³ Rie' se're ri tau lohe injo appau mange ri Isa, ”Guru, pauwang sadai urangku siana' solanna labagei todo'a kaharisang.”

¹⁴ Mingka appaui Isa mange ri ia, ”Urang siana', inaimo maeng Nakke laangka' a'jari hakkimmu iyareka pajarumang ri kau?”

¹⁵ Lakuamo pole Isa mange ri tau lohe injo, ”Ngu'rangiko na tutuko mange risikonjo kangowaang, saba' manna injo se're inni tau lohe pa'barang-baranganna, tallasa'na gelejuai sangga nubattu rikakalumannyanganna injo.”

¹⁶ Maeng injo a'bisarai Isa mange ri iyai se're pakkalebarang, lakua, ”Rie' se're tau kalumannyang, sanna' lohe hassele tanana.

¹⁷ Na akkuta'nangi ri atina: Apamo parallu lakugeokang, saba' tide'mo tampa' panaroang hassele'na tanaku.

¹⁸ Jari lakuamo: Iamo inni parallu lakugeokang; lakurokai sikonjo palampangku ampai kubaung nula'bi bakkakang na kunanro ri injo iangase'na hassele tanaku surang barang-barangku.

¹⁹ Ampa maemmo injo lakupaui mange ri nyahaku: Nyahaku, lohemo pa'barang-barangammu attambung, akkulle ripake attaung-taung sallona; jari ammari-marimoko, nganreko na nginungko surang a'rannu-rannuko.

²⁰ Mingka pauna Allataala mange ri ia: Oe kau tau ba'ga, bangngi inni jua nyahamu larialle battu ri kau, na apa numaeng muparappung, inaimo opuna injo sallo'?

²¹ Appakonjomu sarenna tau apparappung injo pa'barang-barangang tuju ri kalenna to'jua, ampa gele kalumannyang ri a'rakanna Allataala.”

Passala rikabata-bataang 12:22-34

²² Appaui Isa ri ana'-ana' gurunNa, ”Kanara injomo Nakke appau mange ri kaui: Akokalena bata-bata passala ritallasa'mu, ripassala apamo lamukanre, na ako todo' bata-bata ri batangkalemmu, ripassala apamo lamupake.

²³ Saba' tallasa intu la'bi parallu battu ri kanre na batangkale intu la'bi parallu battu ri pakeang.

²⁴ Pariatisai tallasa'na jangang-jangang kalaa' injo, gele appatahuru surang gele anduru na tide' todo' palampang pannanroanna, mingka Allataala lasare ngase'i kanre. La'bi riekang jua kau anggaranna battu ri jangang-jangang injo!

²⁵ Inaimo ri kau intu, kanara ribata-batana jua akkulle latambai ummuru'na siallo?

²⁶ Jari, ampa geleko akkulle anggeokang passala nukaminang ki'di' injo, ngura bata-batako ripassala maraenganna?

²⁷ Pariatisai pattimbona taju'-taju' injo, gele akkareso, gele todo'i attannung, mingka Nakke appau ri kaui: Suleman manna sanna' kalumannyanna gele makeang ballo assimpole taju'-taju' injo.

²⁸ Jari, ampa ruku' ri koko injo, allo inni rie'i attimbo na mintara'na mae risasai ampai ripabuang antama' ri api, ribelo-beloi appakonjo ri Allataala, la'bipa pole kau, oe tau gele intu tappa'.

²⁹ Jari, ako kalemo kabenterangi apa lamukanre iyareka apa lamuinung na andalaloi bentere nyahamu.

³⁰ Iangase'na injo labojai tau lino tugele injo tappa' ri Allataala. Mingka, Ammammu laisse'i ma'nassana muparalluangi iangase'na injo.

³¹ Mingka bojai Pakkaraengang Allataala, jari iangase'na injo ripisangkakiang todo'i mange ri kau.

³² Akoimo malla', oe kau bakkalang ki'di'! saba' Ammammu maeng a'ra'mu lapassareang ri kau Pakkaraengang injo.

³³ Balukang ngase'i barang-barammu na assareko passidakka! Pa'buakangi kalemmu pannanroang doe' nugele lakanre toa, se're pa'barang-barangang ri Suruga nugele lala'busu, nugele akkulle laseppaki palukka' na gele akkulle lapanra'ki bu'bu'.

³⁴ Saba' ri antee-tee juai mae tattaro pa'barang-barangammu, ri injo todo'i intu nyahamu.”

Tulusu a'jaga-jaga 12:35-48

³⁵ ”Parallui tulusu muka'ba' aja'mu na tuli pabola'i sulomu.

³⁶ Paralluko assimpole ata attajang-tajang injo pamulianna karaenna battu ripa'bontingang, solanna ampa rie'mu na akkatto'i pallo'bi', lassiri ripambungkarang pallo'bi' ri ia.

³⁷ Sunggumoko ata rirapikang injo ri karaenna tulusu a'jaga-jaga rihattunnamo muliang. Sitoje'na Nakke appau mange ri kaui: Ia laka'ba' jarre' aja'na na lasuro ngase'i attolong nganre, na ia labattu lalapa'daha-dahaangi.

³⁸ Ampa ia rie'i muliang ritangnga bangngina iyareka ridanniarina na rirapikangi a'geo' appakonjo, jari sunggu ngase'moko.

³⁹ Mingka piisseki ngase'i inni: Ampa opuna sapo laisse'i tette' sikura rie' palukka', ia gelei lapa'biang rinring saponna rikakka'.

⁴⁰ Parallui todo'ko tulusu sadia, saba' Ana' Rupatau larie'i mae rihattu nugele injo musanna-sanna.”

⁴¹ Appaui Petrus, ”Karaeng, kambemoka Rikuangang ripakkalebarang inni iyareka sikuanna rupatau?”

⁴² Lakuamo Isa, ”Jari, inaimo pagahe sapo mallang surang sara'de', lariangka'i ri karaenna laa'jari ponggaha risikonjo atanna laassare kanre mange ri iyai ampa hattunna.

⁴³ Sunggumoko ata rirapikang injo ri karaenna lageokang jamaanna, rihattu muliannamo karaenna.

⁴⁴ Sitoje'na Nakke appau mange ri kaui: Karaenna injo lalaangka'i a'jari pajaga risikuanna pa'barang-baranganna.

⁴⁵ Mingka, ampa daa sipa'na ata injo na appaui lalang ri atina: Karaengku gele juapai lamuliang, jari pakaramulamu larabung tassitau-tau, sikonjo ata baji' bura'ne iyareka bahine injo na nganre manginungi sa'genna huja,

⁴⁶ jari karaenna ata injo lamuliangi ri allo nugele lasanna-sanna, surang rihattu nugele laisse', na laripappa'i kallonna surang lalapassimpole passareanna sikuanna tau gele injo mallang.

⁴⁷ Ata laisse' injo a'ra'na karaenna, mingka gele appasadia iyareka gele lageokang nulakaa'raki injo karaenna, sanna'i larirabunna.

⁴⁸ Mingka inai gele laisse' nulakaa'raki injo karaenna na lageokangi apa nuparallu languppa panra'bung, injo siso'di' jua larirabungangi. Tau lohe injo ripassareang mange ri ia, lohe todo' laripa'bojai battu ri ia, na mange ri inai lohe rirannuangangi, loheampa pole ripa'bojai battu ri ia.”

Isa ngerang passisalakang 12:49-53

⁴⁹ ”Nakke rie' mae lappamballung api mange ri lino na anteekamua patajalliKu, a'bola'i api injo!

⁵⁰ Nakke parrallu ririo lalang se're rioang, na anteemu kamua susana atiKu, rigelenapa a'rupa passala injo!

⁵¹ Pa'ngare'mu ma'nassana Nakke rie' mae langerang kadameang ri lino inni? Gele, Nakke appau mange ri kaui, gele kadameang, mingka pa'beserang.

⁵² Saba' pakaramula rihattu inni larie' pa'beserang rilima tau sibatu sapo, tallu a'bali rua, na rua a'bali tallu.

⁵³ Laa'besere ngase'i, amma labaliangi ana' bura'nena na ana' bura'ne lalabaliangi ammanna, idong labaliangi ana' bahinena na ana' bahine lalabaliangi idonna, matoang bahine labaliangi ana' mintu bahinena na ana' mintu bahine lalabaliangi matoang bahinena.”

Amboto tanra hattu 12:54-59

⁵⁴ Lakuamo pole Isa mange ri tau lohe injo, ”Ampa anjanjangiko rammang ammenteng lau, lassiri mupau: Labosi sarroi, na passala injo a'jari toje'i.

⁵⁵ Ampa mupisa'ringi anging battu rateang ngiri', mukuai: Labambangi allo, na passala injo a'jari toje'i.

⁵⁶ Oe, tau munape', tanra-tanrana lino surang langi' muisse'i muboto, ngurai nagele muisse' muboto tanrana hattu inni?

⁵⁷ Ngura gele todo'i mutappuki kale-kalemamo apa nutoje' inni?

⁵⁸ Saba', ampa kaui na balimmui a'lampa assiparapakang ri pamarenta, bajikangangi a'dameko rihattummu juapa ritangnga lalang, solanna andako laerang mange ri hakking na hakking injomo lapassareangko mange ri pagahena na pagahenamo injo lapantamakiko ri pattarungkuang.

⁵⁹ Nakke appau ri kaui: Geleimoko laansulu' battu ri injo, ampa gelepai mubajara inrammu sa'genna lappasa.”