LUKAS 10 - Kitta' Passitallikang Bau KAREBA BAJI'

Isa appalampa tujupulo ana' gurung 10:1-12

¹ Rimaennamo injo Karaeng anjo'jo'i pole tujupulo ana' gurung maraeng, ampai lasuro a'lampa ta'rua-rua tau rioloanganNa lamange risikonjo kota na tampa' nua'ra' injo lamangei Isa.

² Lakua pauna Isa mange ri iyai, ”Lohe toje' duruang, mingka so'di' paduru. Injomo saba'na ngerako ri opuna duruang, solanna Ia assuro paduru riduruang injo.

³ A'lampaimoko, sitoje'na Nakke appalampa ri kaui assimpole ana' jimbala lamange ritangnga-tangngana asu borong.

⁴ Akomo ngerangi purukang iyareka pamunaang bokong iyareka sandala, na akolalo assare barasallang mange ri inai jua ripaa'lampaammu.

⁵ Ampa antamakiko rise're sapo, pau la'bi rioloi: Dame salehangang ri sapo inni.

⁶ Ampa ri injo rie' tau siratang narima dame salehangang, jari barasallammu ammari ri ia. Mingka ampa gele, barasallammu injo muliangi ri kau.

⁷ Ammariko ri sapo injo, kanrei na inungi nuripatala injo mange ri kaui, saba' se're pajama siratangi lauppa sahala karesona. Akolalo a'lette'-lette' sapo.

⁸ Ampa antama'ko rise're kota na ritarimako ri injo, kanrei apa nulapatalaang injoko,

⁹ na pakagassingi sikuanna tau garring rie' ri injo na paui mange ri iyai: Pakkaraengang Allataala seppa'mu ri kau.

¹⁰ Mingka ampa antama'ko lalang rise're kota na geleko ritarima ri injo, mangeiko risikuanna lalang bakka'na kota injo na pa'nga'ngarangi:

¹¹ Manna pole limpurang kotamu nua'dakki' injo ri bangkemba, latapabe'bese ri a'rakammu; mingka piisseki ngase'i inni: Pakkaraengang Allataala seppa'mu ri kau.

¹² Nakke appau mange ri kaui: ri allo injo Sodom la'bi ringangang hukkunganna battu ri kota injo.”

Isa appiranggai lohe kota 10:13-16

¹³ ”Silakamo kau Khorazim! Silakamo kau Betsaida! Saba' ampa ri Tirus surang ri Sidon a'jarii numasagala numaeng injo kajariang ri a'rakammu, sallomu jarra na iyai pa'risi mu assimpole tukamateang.

¹⁴ Mingka rihattunna pangadelang, tanggonganna Tirus surang Sidon lala'bi ringangang battu ritanggongammu.

¹⁵ Na kau Kapernaum, muare' laripanai'ko ri langi'. Gele, mingka laripanaungiko sa'genna mange ri anja!

¹⁶ Inai jua lapilangngeriko, Nakkemo lapilangngeri; na inai latolla'ko, Nakkemo intu latolla', na latolla' todo'i Tuassuro injo ri Nakke.”

Muliangimu tujupuloiya ana' gurung 10:17-20

¹⁷ Gele sallo maenna injo muliangimu tujupuloiya ana' gurung lalang rikate'neang na lakuai, ”Karaeng, manna setang injo tunru' ngase'i ri kambe saba' aremMu.”

¹⁸ Jari lakuamo Isa mange ri iyai, ”Kujanjangi Ibilisi a'dappe' assimpole kila' battu ri langi.

¹⁹ Sitoje'na Nakkemo assare kahasa mange ri kaui lallisa' saa surang kalang na kahasa lappisauri kagassingang ri balimmu, jari gelemo rie' nulasilakaiko.

²⁰ Mingka mannamamo appakonjo, ako rannu kanara tunru'na sikonjo setang injo mange ri kau, mingka rannuimoko kanara rie'na aremmu ta'ukiri ri Suruga.”

Pau-pau sukkuru surang kate'neang 10:21-24

²¹ Rihattu injo te'ne todo'i Isa lalang Nyaha Tangkasa, na lakua, ”Nakke sukkuru mange ri Kau, Amma, Karaeng ri Suruga na ri lino, saba' iangase'na injo Musa'bui ri tau anralang injo pangisse'na surang mange ri tau sara'de' injo, mingka Mupappiissekangi ri tau ki'di' inni. O Amma, iamo injo nubaji' mange ri Kau.

²² Iangase'na injo lapassareammu AmmangKu mae ri Nakke na gele rie' manna se're tau laisse'i, inai riareng Ana' maraenganna Amma, na inai riareng Amma maraenganna Ana' na mange ri tau lakaa'raki injo Ana' ripiissekiangi passala injo.”

²³ Maenna injo a'gilingi Isa mange ri ana'-ana' gurunNa na lakua, ”Sunggui mata anjanjang rinumujanjang injo.

²⁴ Saba' Nakke appau mange ri kaui: Lohe nabbi surang karaeng a'ra' anjanjang rinumujanjang injo, mingka gele lajanjangi, na a'ra'i lalangngere rinumulangngere injo, mingka gele lalangngeri.”

Tau Samaria baji' nyaha 10:25-37

²⁵ Maeng injo ammentemmu se're guru Tora' lasso'ri mange ri Isa, lakua, ”Guru, apa nuparallu kugeokang languppa tallasa mannannungang?”

²⁶ Pappihalinna Isa mange ri ia, ”Apa nurie' ta'ukiri ri hukkung Tora'? Apa numaeng muaji ri injo?”

²⁷ Pappihalinna tau injo, ”Passukku'i pangamaseammu mange ri Karaeng, Allataalamu, risiganna'na atimu na risiganna'na akkala pikkirammu surang siganna'na harasiamu na risiganna'na kagassingammu, na kamaseangi parammu tau assimpole mukamaseanna kalemmu.”

²⁸ Lakuamo Isa mange ri ia, ”Nabai injo paumu; geokangi injo, languppako tallasa mannannungang.”

²⁹ Mingka lappa'naba ri kalenna tau injo akkuta'nangi pole mange ri Isa, ”Inaimo sitoje'na parangku rupatau?”

³⁰ Appihali Isa, ”Rie'mo se're tau battu ri Yarusalem a'lampa lanaung ri Yerikho; ia ritarai ri palukka' na gele sangga lalukkakinna jua sa'genna la'busu, mingka larabungi todo'i lapakasitangnga mate ampai labokoi.

³¹ Sitabangangi rie' se're imang a'molong ri injo; lajanjangi tau injo, mingka a'lili derei mange ripa'lalangang maraeng.

³² Appakonjo todo'i, rie' se're tau Lewi mange ri tampa' injo; sungka'i lajanjang tau injo, a'lili todo'i mange ripa'lalangang maraeng.

³³ Maenna injo rie'mo se're tau Samaria, attangnga lalangi lamange ri tampa' injo; na rihattu lajanjanna tau injo, a'rikodongi saba' ripangamaseang.

³⁴ Ia mange riampi'na ampai labissai loko'-loko'na, sungka'i maeng lasapuimu minnya' na anggoro. Maenna injo lapanai'i tau injo ri kaladai nulabai injo na laerangi mange ri sapo sehaang ampai lakatuho.

³⁵ Mintara'na mae ia appasulu'i doe' na lasareangi mange ri opuna sapo sehaang, lakua: Katuho tau inni na ampa la'bii battu ri inni balanjamu, lakusambei juai, rihattungku muliang.

³⁶ Inaiyammo battu ri tau tallu inni, assituru' panguppamu, a'jari paranna rupatau ri tau rilukkaki injo sumpae'?”

³⁷ Pappihalinna tau injo, ”Tau maeng lapappijanjangang injo pangamaseanna mange ri ia.” Appaui Isa mange ri ia, ”A'lampamoko na geokangi assimpole injo!”

Marta na Maria 10:38-42

³⁸ Rihattunna a'lingka-lingka Isa surang ana'-ana' gurunNa, ambattuimu rise're desa. Rie' se're bahine riareng Marta latarimai Isa ri saponna.

³⁹ Bahine injo rie' uranna siana' bahine riareng Maria. Maria attolongi riampi' bangkenna Isa na tarrusui lapilangngeri pauNa,

⁴⁰ mingka Marta gele sahe ripa'daha-dahaang. Jari laseppaki Isa na lakua, ”Karaeng, gele rijampangi ma'nassana urangku siana' latilingi kale-kale jua a'daha-daha? Risuro lalabaliia.”

⁴¹ Mingka ripihalii ri Isa, ”Marta, Marta, bata-batako na mupakagele sahe kalemmu rilohe passilolongang,

⁴² mingka se're jua nuparallu: Maria lapilemu dahuang nukaminang baji' injo, nugele injo akkulle rialle battu ri ia.”