LUKAS 1 - Kitta' Passitallikang Bau KAREBA BAJI'

Ulupau 1:1-4

¹ Teofilus mala'biri'ku, Lohemo tau maeng a'naha-naha nyusung se're kareba passala risikonjo kajariang numaeng a'jari ritangnga-tangngata,

² assimpole numaeng injo lapabattui mae ri ditte, numinang ripakaramulana iyaimo sa'bi na pajampangi ri Pau Allataala.

³ Injomo saba'na, sungka'i maeng kusalidiki baji' sikonjo numaeng kajariang minang ripakaramulana, ngallema katappukang lakupaa'jari kitta' surangang baji' atoro'na mange ri kau,

⁴ solanna akkulle muisse' ma'nassana sikuanna nuripangajarang mange ri kau toje'i nabana.

Ripappiissekangi passala kalaheranna Yahya Pario 1:5-25

⁵ Ri jammanna Herodes, karaeng ri tana Yudea, rie' se're imang turiareng Zakharia battu ribakkalanna Abia. Bahinenna battu todo'i risossoranna imang Harun, arenna Elisabet.

⁶ Ruayai naba tallasa'na ri a'rakanna Allataala na laturuki sikonjo passuroang na katantuanna Allataala na gele rie' geo' salana.

⁷ Mingka iyai tide' ana'na, saba' Elisabet tamanangi na toaimu ummuru'na.

⁸ Rie' se're allo, rihattu larapi'na lili' bakkalanna, Zakharia lalageokangi jama-jamaang imang inni ri a'rakanna Karaeng Allataala.

⁹ Saba' hattu rigossanna, assimpole kabiasaannai, lanjo'joki imang langgeokang jamaang injo, iamo rijo'jo' lantama' ri Sapo Tangkasa na lattunu dupa ri injo.

¹⁰ Rihattu attununa dupa, sikonjo umma' asse'rei pantarang na assambajangi.

¹¹ Jari kajanjangammu ri Zakharia se're malaeka'na Karaeng ammenteng risa'ri kananna mejang pa'dupaang injo.

¹² Lajanjanna kajariang injo ia ta'bangkai na malla'i.

¹³ Mingka appui malaeka' injo mange ri ia, ”Akomo malla', oe Zakharia, saba' ritarimamu pangera dowaammu. Elisabet, bahinemmu, lamana'i se're ana' bura'ne battu ri kau na ia parallui musare areng Yahya.

¹⁴ Kau larannu surang late'ne, na lohe pole tau larannu passabakang rianakanna injo.

¹⁵ Saba' ia labakka'i ri a'rakanna Karaeng na gele langinung anggoro iyareka inungang laappakahuja maraeng na ia larassi Nyaha Tangkasa pakaramula battu lalang ri pompong idonna na;

¹⁶ ia lalabua'i lohe tau Israele a'giling muliang tappa' mange ri Karaeng, Allataalana.

¹⁷ Ia laa'lingkai rioloanna Karaeng Allataala lalang nyaha na kahasana Nabbi Elia lalabua'i atina sikonjo amma a'giling mange ri ana'-ana'na na atina sikuanna tau doraka mange ripikkirang tau naba. Ri appakonjona ia appakasadiai ri Karaeng Allataala se're umma' nusiratang ri Ia.”

¹⁸ Jari akkuta'nangi Zakharia mange ri malaeka' injo, ”Anteekamua lakuisse' ma'nassana passala inni laa'jari? Saba' toama na bahinengku toa tommoi.”

¹⁹ Appihali malaeka' injo mange ri ia, ”Nakkemo Jibraele tuanjampangi injo Allataala na nakke risuro mae konni a'bisara ri kau laappabattu kareba baji' inni mange ri kau.

²⁰ Sitoje'na laa'jari pepeko na lageleko akkulle appau sa'genna rihattu a'rupana ngase' inni, kanara gelemu tappa' ripauku nulakajanjangang injo patoje'na rihattunna.”

²¹ Na rihattu injo lohe tau attajang-tajang ri Zakharia. A'jari lannasimu, saba' sallona lalang ri Sapo Allataala.

²² Sungka'i ansulukang, ia gelemu akkulle a'bisara mange ri iyai, jari lapahangimu, ma'nassana ia anjanjangi se're numasagala lalang ri Sapo Allataala. Maeng injo ia assare tanra mange ri iyai, saba' tulusu pepei.

²³ Sungka'i maemmo hattu panjampanginna, muliammu mange ri saponna.

²⁴ Gele sikura hattu sallona maenna injo tianang toje'i Elisabeth, bahinenna na limangbulangi sallona ia gele lapappijanjangang kalenna, lakua,

²⁵ ”Iamo inni se're panggeokanna Karaeng Allataala mae ri nakke, na hattu inni Ia latongko'mu siri'ku ri a'rakanna parangku rupatau.”

Ripappiissekangi passala kalaheranna Isa 1:26-38

²⁶ Rihattu maka annang bulannamo malaeka' Jibraele risuro ri Allataala a'lampa mange ri Nazaret se're kota ri Galilea,

²⁷ mange rise're ana'rara a'bajuang juapa surangang se're taruna riare' Yusuf battu ripinangka'na karaeng Daud; arenna ana'rara injo Maria.

²⁸ Rihattu ambattuna malaeka' injo mange riampi'na Maria, lakuamo, ”Salama', oe kau turikamaseang intu, Karaeng Allataala minahang ri kau.”

²⁹ Ta'bangkai Maria ri lalangngere'na pau injo, ampai akkuta'nang lalang ri atina, apamo battuanna barasallang injo.

³⁰ Lakuamo malaeka' injo mange ri ia, ”Ako malla', oe Maria, saba' kau nguppa pangamaseang ri a'rakanna Allataala.

³¹ Sitoje'na latianangko na lamana'ko se're ana' bura'ne na Ia parallui musare areng Isa.

³² Ia laa'jari bakka'i na lariare'i Ana' Allataala Tukaminang la'biri injo. Karaeng Allataala lalapassareangi mange ri Ia kadera kakaraenganna Daud, ammanna puwa-puwaNa,

³³ na Ia lamarenta rituina Yakub sa'genna situlusu'na, na PakkaraenganNa gele lala'busu.”

³⁴ Appaui Maria mange ri malaeka' injo, ”Anteekamua laa'jari, saba' tide'pa bura'nengku?”

³⁵ Appihali malaeka' injo mange ri ia, ”Nyaha Tangkasa laturung ri kau na kahasa Allataala Tukaminang la'biri injo minahang ri kau; injomo saba'na ana' lamuanakang intu lariare'i tangkasa, Ana' Allataala.

³⁶ Sitoje'na, Elisabet urammu siana', manna ia latianangammu se're ana' bura'ne rihattu toana na inni bulang makaannannamo ri ia turiare' injo tamanang.

³⁷ Saba' ri Allataala gele rie' nugele ma'ring.”

³⁸ Lakuamo Maria, ”Sitoje'na nakke inni atanna Karaeng Allataala; a'jarimu ri nakke assituru' intu paumu.” Jari a'lampamu malaeka' injo labokoi Maria.

Maria na Elisabet 1:39-45

³⁹ Gele sikura sallona maenna injo apparurui Maria na a'lampai mange rise're kota rihulu'na Yehuda.

⁴⁰ Ri injo ia antama'i ri saponna Zakharia na assare barasallang mange ri Elisabet.

⁴¹ Rihattunna Elisabeth lalangngere sa'ranna Maria, attuddu'-tuddu'i ana' rie' injo lalang ri pomponna na manna Elisabeth lakahasai todo'mu Nyaha Tangkasa,

⁴² jari appaui lalang risa'ra bakka', ”Kaumo ribarakkaki battu risikonjo bahine na ribarakkaki todo'i ana' ri pompommu.

⁴³ Inai todo' nakke inni sa'genna idonna Karaeng Allataalaku rie' mae konni lauranga assijanjang?

⁴⁴ Saba' sitoje'na, rihattu ambattuna mae ri tolingku sa'rammu, attuddu'-tuddu'i ana' rie' injo lalang ri pompongku pammate rannuna.

⁴⁵ Sunggulalo tau tappa' injo, saba' apa ripau mange ri ia nubattu ri Karaeng Allataala, laripa'rupa.”

Kelong-kelong pappakala'biri'na Maria 1:46-56

⁴⁶ Jari lakuamo Maria: ”Batengku appakala'biri Karaeng Allataala,

⁴⁷ na rannui atiku kanara Allataala, Pappakasalama'ku.

⁴⁸ Saba' Ia lapariatimu katunaanna atanNa. Sitoje'na, pakaramula rikonni-konnina sikonjo tui la'ngare' ri nakke tau sunggu,

⁴⁹ saba' Tukaminang kahasa injo maeng anggeokangi jama-jamaang bakka' mae ri nakke na tangkasalaloi arenNa.

⁵⁰ PangamaseanNa tulusu rie'i ri tau tappa' injo ri Ia.

⁵¹ Ia lapappijanjangangi kahasaNa lalang ripanggeokang limanNa na lapassisa'lakangi sikuanna tau tampo injo atina;

⁵² Ia lapanaungi sikuanna tau kahasa battu ripamarentaanna na lapanai'i sikuanna tau kamase-mase injo;

⁵³ Ia lapakakala'bi-la'biangi sikonjo nubaji' mange ri tau pa're injo, na lasuro a'lampa tau kalumannyang injo tide' lalaerang-erang;

⁵⁴ Ia latulungi taunna Israele, atanNa, saba' Ia laurangi pangamaseanNa,

⁵⁵ assimpole nulatallikang injo Allataala mange ripuwa-puwata, mange ri Abraham na ri tuina situli-tulinna.”

⁵⁶ Maria ammari tallumbulang sallona ri saponna Elisabet, maeng injo muliammu mange ri saponna.

Kalaheranna Yahya Pario 1:57-66

⁵⁷ Maeng injo larapi'mu bulanna Elisabet lamana' na ia mana' toje'i se're ana' bura'ne.

⁵⁸ Sungka'i lalangngere limbo-limbona na sikonjo bija-bijanna ma'nassana Karaeng Allataala lapappijanjangammu pangamaseanNa mange ri ia, jari rannu ngasekimu.

⁵⁹ Jari riekimu ri allo makakaruana lalasunna' ana' injo na iyai injo a'ra'i lasare areng Zakharia assimpole areng ammanna,

⁶⁰ mingka appaui idonna, ”Ako, ia parallui risare areng Yahya.”

⁶¹ Appau ngasekimu, ”Tide'kale ripa'bija-bijaammu appakonjo arenna.”

⁶² Jari a'bisara jo'jokimu mange ri ammanna laakkuta'nang areng anteeang a'ra' lalasareangi ana' injo:

⁶³ Ia ngerai batu pangukiri, ampai laukiri pau-pau inni, ”Arenna iamo intu Yahya.” Jari lannasi ngase'mu.

⁶⁴ Rihattu injo jua sikali ta'bungkara babana na a'geo'mu lilana, jari ia allagarai na appakala'biri Allataala.

⁶⁵ Jari mallaki ngase'mu tau rie' injo riampi'-ampi'na, na sikonjo kajariang a'jari laga'-lagarangi risikonjo kampong rihulu'na Yudea.

⁶⁶ Sikuanna tau allangngere, lanaha-nahai lalang ri atina kajariang injo na lakua, ”Laa'jari apai ana' inni sallo'?” Saba' kahasa limanna Karaeng Allataala minahang ri ia.

Kelong-kelong pappakala'biri'na Zakharia 1:67-80

⁶⁷ Zakharia, ammanna, latallisi Nyaha Tangkasa, jari lapaui pappasanna Karaeng Allataala,

⁶⁸ ”Ripakala'birimu Karaeng, Allataalana Israele, saba' Ia rie'i lapakasalama' umma'Na na ngerangi kalappasang mange ri ia,

⁶⁹ Ia appatimbo se're tanru' kasalamakang mae ri ditte lalang ri ampu piu'-piu'na Daud, atanNa,

⁷⁰ – assimpole pauNa minang riolo mariolo ri babana sikonjo nabbi tangkasa'Na –

⁷¹ lalappasangki battu risikonjo balinta na battu ri limanna sikuanna tau liking injo mae ri ditte,

⁷² lalapappisa'biangi pangamaseanNa ri puwa-puwata na lau'rangi passitallikanNa nutangkasa injo,

⁷³ iamo intu sapatta nulapau injo mange ri Abraham, ammanna puwa-puwata, ma'nassana Ia ngamaseangi mae ri ditte,

⁷⁴ solanna ditte, lappasa battu ri limanna balinta, akkulleki assambajang mange ri Ia gele rie' rikamallakang,

⁷⁵ lalang rikatangkasang na rikanabaang ri a'rakanNa assimpappa' ummuru'ta.

⁷⁶ Na kau, oe ana'ku, lariare'ko nabbi Allataala Tukaminang La'biri injo, saba' kaumo laa'lingka rioloanna Karaeng Allataala laappakasadia pa'lalangang ri Ia,

⁷⁷ laassare mange ri umma'Na pangisse' rikasalamakang assituru' pangampungi risikonjo kadorakaannai,

⁷⁸ saba' barakka' surang pangamaseang ri Allataala rie'i laappakasalama' ri ditte, matanna allo ngesala battu ri tampa' la'biri,

⁷⁹ lalasinari iyai ngase' tau ammari injo lalang rikalammang na tau rie' injo lalang kahasana kamateang lapakalambusui engkang bangkenta mange ripa'lalangang dame salehangang injo.”

⁸⁰ Ana' injo pela' bakka'i na attamba bakka' sumanga'na. Ia ammarii ri parang luara sa'genna larapi' hattu parallunamo lapappijanjangang kalenna mange ri taunna Israele.