KOLOSE 4 - Kitta' Passitallikang Bau KAREBA BAJI'

¹ Oe tau rie' intu atanna, a'geo' adelelaloko surang lambusuko mange ri atammu; u'rangilaloi, kau todo' intu rie' Karaemmu ri suruga.

² Sabbaralaloiko lalang ripangera dowaang na ri appakonjona a'jaga-jagaiko surangang appanai' sukkuru.

³ Pangera dowaang todo'kang, solanna Allataala lapambungkarangkang babaang ripappala'bangamba, jari akkullekang a'bisara ripassala harasiana Almase, nupassabakannamo injo nakke ritarungku.

⁴ Ri appakonjona, nakke akkullea appisa'bi, appaanteekamua siratanna.

⁵ Tallasako surangang baji' pangisse' mange ri tau pantarang injo, pakei hattu nurie' injo.

⁶ Parallui pau-paumu tulusu rassi pangamaseang, baji'i rilangngere, jari muisse'i, anteekokamua nuparallu assare pappihali mange risikuanna tau.

Panongko' surang sallang Pappikatu 4:7-18

⁷ Sikonjo kareba passala ri nakke laripappiissekangi mange ri kaui ri Tikhikus, urang siana' turikamaseang injo, ata mallang surang bahaang pajampangi lalang ri Karaeng.

⁸ Ia kusuroi mange ri kaui, solanna muisse' kareba passala ri kambe na solanna ia assare pallengung-lengung mange ri atimu.

⁹ Ia kusuroi assurang-surang Onesimus, urang siana' julu katappakanta tumallang surang turikamaseang injo, se're tau battu ri kau. Iyaimo lapappiisekangi mange ri kaui iangase'na nua'jari ri inni.

¹⁰ Sallang mange ri kaui battu ri Aristarkhus, urangku ritarungku surang battu ri Markus, kamanakanna Barnabas – assimpole numaeng kupappasangang injo; tarimalaloi, ampa ambattumu mange ri kaui –

¹¹ na battu ri Yesus, turiareng injo Yustus. Tallu inni jua tau battu ri tau Yahudi a'jari urang sipanjamaangku ritujunna Pakaraengang Allataala; iyaimo injo sanging latulunga.

¹² Sallang battu ri Epafras mange ri kaui ia se'rei tau battu ri kau, ata ri Isa Almase, tusanging poso naha-nahanna ripangera dowaang tujummu, solanna kau ammenteng ka'jang, assimpole tau toa pangisse' surang rassi kajarrekang lalang risikonjo passala nulakaa'raki injo Allataala.

¹³ Saba' nakke akkullea assa'bi passala ri ia ma'nassana ia sanna' pakkaresona ritujummu na tujunna turie' injo ri Laodikia surang ri Hieropolis.

¹⁴ Sallang mange ri kaui battu ri dottoro Lukas turikamaseang injo surang battu ri Demas.

¹⁵ Pabattui sallamba mange risikonjo urang siana' ri Laodikia; mange todo' ri Nimfa na jamaah rie' injo assambajang ri saponna.

¹⁶ Na ampa sura' inni maeng riaji ritangnga-tangngamu, karesoilalo, solanna riaji todo'i ri jamaah Laodikia na solanna sura' lamange injo ri Laodikia riaji todo'i mange ri kaui.

¹⁷ Na pabattulaloi mange ri Arkhipus: Ma'nassana, panjampangi nulatarima injo lalang ri Karaeng parallui lajama sa'genna a'maeng.

¹⁸ Sallang battu ri nakke, Paulus. Sallang inni kuukirii surangang limangku to'jua. U'rangilaloi ma'nassana nakke lalang juapa ri pattarungkuang. Barakka' pangamaseang larurungiko.