KOLOSE 3 - Kitta' Passitallikang Bau KAREBA BAJI'

¹ Injomo saba'na, ampa ripakaattallasako assurangang Almase, bojai sikonjo passala nurie' rate, ripariekanna Almase, attolong risa'ri kananna Allataala.

² Pikkirilaloi sikonjo passala nurie' rate, gele nurie' injo ri lino.

³ Saba' kau maemmo mate na tallasa'mu tassa'bui assurangang Almase lalang ri Allataala.

⁴ Ampa Almase, tua'jari injo tallasa'ta, kajanjangang sallo', injo manna kau kajanjangang surang Ia lalang rikala'birang.

Rupatau bau 3:5-17

⁵ Injomo saba'na, hunoi lalang ri kalemmu sikonjo rupanna sipa' lino, iamo intu kabalerang, karammasang, hawa napasu daa, napasu sipa' daa, surang pole kangowaang, nuassimpole nyomba barahala,

⁶ iangase'na injo appabattui kuku'na Allataala [mange risikuanna tau gele injo tunru'].

⁷ Riolo kau anggeokangi todo'ko passala appakonjo rihattummu tallasa ri injo.

⁸ Mingka konni-konnina, pela' ngase'i inni, iamo intu kuku', a'moro-moro, sipa' daa, pitina surang sikonjo pau daa nuansulu' injo battu ri babamu.

⁹ Andako assibura-burai pole, saba' maeng mupela'mu rupatau sallo injo surang panggeokanna,

¹⁰ na maeng makeimoko rupatau bau assituru' a'ra' ri Tuappaa'jarina nutarru'-tarrusu ripakabau ri Allataala lapela' toa pangisse'mu mange ri Allataala assituru' ja'banganna;

¹¹ lalang ripassala inni gelemo rie' tau Yunani iyareka tau Yahudi, tau assunna' iyareka tau gele assunna', tau Barbar iyareka tau Skit, ata iyareka tau laloasa, mingka Almasemo riiangase'na na Ia se'rei lalang ri risikuanna.

¹² Injomo saba'na, assimpole tau ripile ri Allataala ripakatangkasa surang rikamaseang ri Ia, pakei pangamaseang, kalammorang, katunaang ati, lumu nyaha surang kasabbarang.

¹³ Sabbaralaloko mange ri tau maraeng, na ampungii tau maraeng ampa rie' se're tau annanro pa'risi nyaha mange ri tau maraeng, assimpole Karaeng maeng laampungi ngase'ko, appakonjo todo'i ta'rammu.

¹⁴ Lalang ri iangase'na injo: Pakelaloi pangamaseang, assimpole panga'ba' nuappasse're surang nuappakasangka'.

¹⁵ Parallui dame salehangang Almase marenta lalang ri atimu, saba' iamo injo kanarana kau rikeo' lalang rise're batangkale. Na sukkurulaloko.

¹⁶ Parallui pau-pauna Almase ammari surangang kala'bi-la'biang ritangnga-tangngamu, sa'genna kau lalang risikuanna kasara'dekang akkulle ngajara surang appiu'rangi tau maraeng na akkelong-kelong masmuru surang kelong-kelong pappakala'biri na kelong pallengung-lengung, kau appanai' sukkuru mange ri Allataala lalang ri atimu.

¹⁷ Na lalang ri iangase'na numugeokang lalang ripappau iyareka panggeokang, geokangilaloi iangase'na injo lalang arenna Karaeng Isa, na appanai' sukkuru ripatteteang ri Ia mange ri Allataala, Ammanta.

Passisambunganna sikonjo assinna sapo 3:18–4:6

¹⁸ Oe bahi'-bahine intu, tunru'laloko ri bura'nemmu, appaanteekamua siratanna lalang ri Karaeng.

¹⁹ Oe bura'-bura'ne intu, kamaseanglaloi bahinemmu na akolalo a'geo' kasara mange ri ia.

²⁰ Oe ana'-ana', tunru'laloko mange ri tau toamu lalang risikuanna passala, kanara iamo injo nubaji' mange ri Allataala.

²¹ Oe amma intu, akolalo pa'ri'-pa'risi nyahana ana'-ana'mu, solanna andai la'ba nyahana.

²² Oe ata intu, tunru'laloko mange ri tau lapaa'jari injoko ata ri lino inni lalang risikuanna passala, ako sangga ri a'rakanna jua laappakasannang ri iyai, mingka surangang silambusu'na atimu kanara malla' ri Karaeng.

²³ Manna apa jua mugeokang, geokangi lalang ri sisukku'na nyahamu assimpole lamange ri Karaeng na gele lamange ri rupatau.

²⁴ Muisse'mu ma'nassana battu ri Karaeng jua kau languppa kaharisang nua'jari sahala'mu. Almasemo intu Karaeng na kau atanNa.

²⁵ Inai jua a'geo' sala lalaerangi kasalaanna injo, saba' Karaeng gelei mile tau.