KOLOSE 2 - Kitta' Passitallikang Bau KAREBA BAJI'

¹ Saba' kukaa'raki, solanna muissekii, anteekamua bera'na jama-jamaang kugeokang injo mange ri kaui, surang mange ri iyai turie' injo ri Laodikia surang mange ri iangase'na, tugele injopa kuisse',

² solanna ta'lengung-lengung atina na iyai assamaturu' lalang ripangamaseang, sa'genna iyai nguppa iangase'na kalammorang surang kajarrekang pappahang, na laisse'i harasiana Allataala, iamo intu Almase,

³ saba' lalang ri Iamo tassa'bu sikonjo kasara'dekang surang pangisse'.

⁴ Kupau passala inni, solanna andarie' tuappalinga-linga ri kau lalang ripau-pau ballo beloinna.

⁵ Saba' manna injo nakke gelea rie' ritangnga-tangngamu, mingka ri nyaha nakke minahang ri kau na sanna' rannuku kujanjang baji' tallasa'mu surang kajarrekanna tappa'mu lalang ri Almase.

Kasangkakanna tallasa ri Almase 2:6-15

⁶ Maeng mutarimai Almase, Karaengta. Injomo saba'na parallui tallasa'mu tulusu lalang ri Ia.

⁷ Paralluilaloko a'aka' lalang ri Ia surang ripaenteng mange ri Ia, paralluilaloko attamba jarre' lalang rikatappakang assimpole numaeng riajarang injo ri kau, surang parallulaloi atimu kala'bi-la'biang ripappanai sukkuru.

⁸ Tutuilaloko, solanna andarie' tulapa'linguiko surangang ripau-pau ballo nutide' battuanna na nupalusu assituru' pangajarang riolo mariolo surang ri nyaha pappalinguna lino inni, mingka gelei assituru' Almase.

⁹ Saba' sikuanna nurie' ammari ri Almase iamo intu lalang tappa kasara,

¹⁰ na kau maeng ripannoi lalang ri Ia. Iamo ulu risikonjo pamarenta surang sikonjo tukahasa.

¹¹ Lalang ri Ia kau maeng risunna', gele risunna' nulageokang injo rupatau, mingka surangang sunna' Almase, iamo intu ribokoinna batangkale nudoraka injo,

¹² passabakang ri Iamo kau rikuburu lalang ripanrioang, na lalang ri Iamo kau minahang todo' ripakaattallasa muliang patteteang rikatappakammu mange ripanggeokanna Allataala nurassi injo kahasa, numaeng appakaattallasa injo ri Ia battu ri tau mate.

¹³ Kaui intu, manna injo riolo mateko rikanara kasalaammu na rikanara gele risunna' lahere, maeng ripakaattallasa ri Allataala assurangang Ia, sungka'na Ia maeng lalappasi sikonjo kasalaanta,

¹⁴ rilalu'lu'na sura' inrang nurikatantuanna hukkung injo lapassalaki na lasilakaiki. Na injo lapa'tide'i Allataala ampai lapakuang ri kaju salli':

¹⁵ Ia maeng laonsalamu sikonjo pamarenta surang tukahasa na lapaa'jari ngase'i janja'-janjangiang ri tau lohe lalang pambetaNa ri iyai.

Bojai passala nurie' injo rate 2:16–3:4

¹⁶ Injomo saba'na, akolalo pa'biangi tau inni ngadeli ri kau ripassala kanre surang inungang iyareka ripassala allo passua'-suarang, bulang bau iyareka allo Passambajangang;

¹⁷ iangase'na injo sanging bajang-bajang jua battu rinulaparallu injo rie', na katojekanna rie'i lalang ri Almase.

¹⁸ Akolalo pa'biangi pametaammu ripaolle ri tau a'bura-bura injo lapakatuna kalenna surang assambajang mange ri malaeka', surang appakala'biri panjanjang na tide'jua alasanna laattampo-tampo ripikkiranna lino inni,

¹⁹ na ia gelei a'bitantang jarre' ri Almase, battu ri antee mae batangkale inni risokong surang rika'ba' a'jari se're risikonjo ura' na pa'lesu-lesuang, a'bakka'i assituru' pa'bakkakang nubattu ri Allataala.

²⁰ Ampa maemmoko mate assurangang Almase na lappasamu battu ri nyaha lino inni, ngura mupakatunru'i kalemmu rilohe rupanna atorang, assimpolekalena attallasa juapako ri lino:

²¹ ako tetengi inni; ako sobai intu, ako serui inni;

²² iangase'na injo sangga mange jua ri pa'barang-barangang lapanra' ampa ripakei na sangga assituru' na parenta surang pangajarang rupatau.

²³ Manna injo kajanjangang rassi pangisse'i lalang risambajang labuaki injo, assingkamua lapakatuna kalenna, sikonjo atorang inni tide'jua matu-matunna rimaraenganna laappakasannang tallasa ri lino.