IBRANI 9 - Kitta' Passitallikang Bau KAREBA BAJI'

Tampa' tangkasa ri lino na ri suruga 9:1-10

¹ Toje'i passitallikang makase're injo ngampunnai todo'i atorang ripassambajangang na atorang ri tampa' tangkasa ta'ra bua' pala'limanna rupatau.

² Saba' se're kema ripakasadia, iamo intu bageang kaminang ri a'rakang na ri injo rie' panaroang kanjoli surang mejang panaroang kanre toanaang. Bageang inni riare'i tampa' tangkasa.

³ Ri bokona ampang-ampang makarua injo rie' se're kema maraeng nuriare' tampa' kaminang tangkasa.

⁴ Ri injo rie' mejang battu ri bulaeng pattunuang dupa, na patti passitallikang, nusibatuiya risalu'i bulaeng; lalang ri patti passitallikang injo rie' baku' bulaeng assinna buakang roti battu ri suruga, tukkangna Harun numaeng injo assu'la' na batu ukiri passitallikang.

⁵ Na rateanna rie' rua malaeka' kala'birang larangka'i panongko' passidameang injo. Mingka passala inni gelepai akkulle ribisara surang risesei baji' rikonni-konnina.

⁶ Appakonjomu ta'ranna tampa' tangkasa injo riatoro. Jari, sikonjo imang tulusu antam'i lalang ri kema nukaminang ri a'rakang injo laanggeokang sambajannai.

⁷ Mingka sangga Imang Bakka' injo jua laantama' ri kema makarua, na parallui ngerang rara lalapassidakkaang pallappasi kadorakaang ritujunna kalenna na kadorakaanna sikonjo umma' nugele injo laisseki.

⁸ Ri atorang innimo Nyaha Tangkasa lapappiissekangi ma'nassana pa'lalangang mange ri tampa' tangkasa injo gelepai ta'bungkara, ampa rie' juapai kema makase're injo.

⁹ Iamo injo pakkalebarang rihattu konni-konnina. Assituru' ri atorang injo passidakka koro'bang na passidakka nugele injo akkulle appakasangka' ati si'nonna ri tau assare injo passidakka,

¹⁰ saba' atorang injo sangga mange jua ripassala kanre-kanreang, inu'-inungang na lohe rupanna ere panangkasi, iamo intu atorang-atorang ritallasa'na rupatau inni nusangga akkulle jua ripake sa'genna larapi' hattu appakabau.

Almase iamo Patteteang battu ri Passitallikang Bau 9:11-28

¹¹ Mingka Almase maemmu rie' laa'jari Imang Bakka' risikonjo passala nubaji' larie' injo: Ia maengmu antama' ri kema nula'bi bakkakang na nula'bi sangkakang, nugele ribua' ri rupatau, battuanna nugele antama' nuripaa'jari ri lino inni.

¹² Ia maengmu pinsikali na lasitulusu'nai antama' lalang ri tampa' tangkasa nagele rara bembe pallaki surang rara tedong laerang, mingka nulaerang raraNa to'jua. Ri appakonjona Ia nguppamu kalappasang mannannungang.

¹³ Saba' ampa rara bembe pallaki na rara tedong pallaki na ahunna tedong longko nuripakahuru injo akkulle appakatangkasa ri iyai riturammasa injo, iyai injo ritangkasi sangga rinukajanjangang injo jua.

¹⁴ La'bipa pole rara Almase, nupatteteang ri Nyaha mannannungang maeng lapassidakkaammu kalenNa mange ri Allataala assimpole passidakka nutide' sallaanna, laappakatangkasa ri ati si'nongta battu risikonjo panggeokang tide' injo matu-matunna, solanna ditte akkulleki assambajang mange ri Allataala nuattallasa injo.

¹⁵ Injomo saba'na, Iamo Patteteang battu rise're passitallikang bau, solanna iyai tumaeng rikeo' injo akkulle narima kaharisang tide' la'busu'na nuripassitallikang injo, saba' rie'mo tumate laallappasi sikonjo kasalaang numaeng injo rigeokang rihattunna passitallikang makase're injo.

¹⁶ Saba' ri antee mae rie' sura' kaharisang, ri injo parallui ripappisa'biang passala maeng mateanamo tau a'bua' injo sura' kaharisang.

¹⁷ Saba' se're inni sura' kaharisang a'jari assai, ampa matemu tau a'bua' injo sura' kaharisang, saba' sura' kaharisang injo gelei assa, ampa attallasa juapai tau a'bua' injo.

¹⁸ Injomo saba'na passitallikang makase're injo riassaangi ampa rie' rara.

¹⁹ Saba' rimaennamo Musa lapappiissekang sikuanna parenta inni assituru' hukkung Tora' mange risikonjo umma', ia ngallei rara ana' tedong na rara bembe pallaki surang ere, na bulu eja na taha assimpole taha bassa, ampai labe'besi kitta' surang umma' injo,

²⁰ ampai appau, ”Innimo rara passitallikang nuritantuang injo ri Allataala ri kau.”

²¹ Injo pole kema na sikonjo pakakasa passambajangang nuribe'besi appakonjo injo surangang rara.

²² Na laa'biringi iangase'na ritangkasi assituru' hukkung Tora' surangang rara, na ampa tide' rara ammatti' gele rie' pangampungang.

²³ Jari, sikuanna nuta'bajang-bajang apa nurie' ri suruga parallui ripakatangkasa appakonjo, mingka sikuanna pakakasa ri suruga parallui ripakatangkasa risikonjo passidakka nula'bi baji' battu ri injo.

²⁴ Saba' Almase gelei antama' ri tampa' tangkasa ta'ra bua' limanna rupatau nusangga assimpolena jua ja'bangang battu rinutoje' injo, mingka antama'i ri suruga lamange ri a'rakanna Allataala rikaparalluanta.

²⁵ Ia antama'i mae ri lino inni gelei laa'mole-mole lapassidakkaang kalenNa, appaanteekamua Imang Bakka' injo attaung-taungi antama' ri tampa' tangkasa injo surangang rara na gele rara kalenna.

²⁶ Saba' ampa appakonjoi Ia parallui akkuling-kuling lasissa pakaramula rihattunna ripaa'jari lino inni. Mingka, konni-konnina Ia pinsikali juai lapappijanjangang kalenNa rihattu seppa'namo kala'busang jammang laallappasi kadorakaang passabakang rilakoro'banganna kalenNa.

²⁷ Assimpole rupatau inni ritantuangi pinsikali juai lamate, na maenna injo lariadeli,

²⁸ appakonjo todo'i Almase pinsikali juai lapa'koro'bangang kalenNa lananggong rikadorakaanna lohe tau. Rimaengna injo Ia lalapappijanjangi pole kalenNa makapinruang, na gelemu lananggong kadorakaang, mingka laassarei kasalamakang mange ri iyai tutajalli injo ri Ia.