IBRANI 8 - Kitta' Passitallikang Bau KAREBA BAJI'

Imang Bakka' ripassitallikang bau 8:1-13

¹ Anto' risikuanna nuribisara injo iamo intu: Ditte ngampunnai Imang Bakka' appakonjo, nuattolong risa'ri kanang kaderana Tukaminang Bakka' injo ri suruga.

² Ia anjampangi passambajangang ri tampa' tangkasa, iamo intu lalang ri kema toje' injomo nuripaenteng ri Karaeng na gele ri rupatau.

³ Saba' sikonjo Imang Bakka' ritantuangi laappassidakka koro'bang na assare passidakka na kanara injomo Imang Bakka' injo parallui ngampunnai se're passala laripassidakkaang.

⁴ So'di injo Ia rie'i ri lino inni, Ia attantu gelena laa'jari imang, saba' ri inni rie'mo lohe tau maeng assare passidakka assituru' hukkung Tora'.

⁵ Iyai injo anjampangi lalang ri kema nua'jari injo ja'banganna na bajang-bajanna nurie' ri suruga, assimpole numeng injo ripappauwang mange ri Musa, rihattunna ia a'ra' appaenteng kema, pauNa: ”Pariatilalo! Kau parallu a'bua' iangase'na injo assituru' ja'bangang numaeng ripappijanjangang injo mange ri kau rate ribaho bonto.”

⁶ Mingka konni-konnina Ia nguppai jama-jamaang laanjampangi nula'bi bakkakang, kanara ia a'jari Patteteang battu ripassitallikang nula'bi la'biri, nuripatolong rate talli' nula'bi la'biri todo'.

⁷ Saba', so'di passitallikang makase're injo gelei panra', gelemu pole riboja tampa' rinumakarua.

⁸ Saba' Ia lato'roi ngase'i rihattunna Ia appau, ”Sitoje'na, larie' hattunna,” appakonjomu pauna Karaeng, ”Nakke laa'bua' passitallikang bau surangang pinangka' ri Israele na surangang pinangka' ri Yehuda,

⁹ gele assimpole passitallikang numaeng Kubua' injo surangang puwa-puwanai, rihattunna Kuteteng limanna langurang ri iyai ansulukang battu ri tana Massere. Saba' iyai gelei mallang ripassitallikangKu, na Nakke lanolla' ri iyai,” appakonjomu pauna Karaeng.

¹⁰ ”Iamo inni passitallikang Kubua' injo surangang pinangka' ri Israele na rilappasana'mo hattu injo,” appakonjomu pauna Karaeng. ”LaKutaroi hukkungKu lalang ri akkala pikkirannai na lariukirii lalang ri atinai, jari Nakke laa'jari Allataala ri iyai na iyai laa'jari umma'Ku.

¹¹ Na iyai gelemu langajara mange ri paranna rupatau, iyareka ri urang siana'na lalang riappauna: Piissekii Karaeng! Saba' iyai ngase', bakka' ki'di', latappa' ri Nakke.

¹² Saba' Nakke lanaro pangamaseang mange rikasalaannai na gelemo lariu'rangi sikonjo kadorakaannai.”

¹³ Rihattunna Ia appau ri passala'na passitallikang bau injo, Ia lapappiissekangi numakase're injo assimpole passitallikang nusallomo. Na apa numaemmo a'jari toa na lambu-lambuangi, gelemu dere mange ri kapanra'kanna.