IBRANI 7 - Kitta' Passitallikang Bau KAREBA BAJI'

Almase na Melkisedek 7:1-10

¹ Saba' Melkisedek iamo karaeng Salem na imang Allataala Tukaminang la'biri; ia a'lampai laruppai na labarakkaki Abraham rihattunna Abraham muliang battu ripa'bundukang ambeta lohe karaeng.

² Mange ri ia pole Abraham assare ridahu sampulona battu ri iangase'na. Areng Melkisedek, makase're a'battuangi karaeng kanabaang, na karaeng Salem todo'i, iamo intu karaeng dame salehangang.

³ Ia tide' ammanna, tide' idonna, tide' pappuwa-puwaanna, hattunna tide' pakaramulana na tallasa'na tide' puppusu'na, na passabakang ri ia ripaa'jari assimpole Ana' Allataala, injomo saba'na ia latuli a'jari imangi situli-tulinna.

⁴ Pariatisai anteekamua bakka'na tau injo, sa'genna Abraham puwa-puwata assare ridahu sampulona mange ri ia battu risikuanna hassele kaminang baji' nulaalle injo rihattu ambetainna ripa'bundukang.

⁵ Assituru' hukkung Tora', tuinamo Lewi narima pangka' imang na lajamai jama-jamaang langalle ridahu sampulona battu ri umma' Israele, iamo intu battu ri uranna siana', manna mamo iyai injo tuina to'juai Abraham.

⁶ Mingka Melkisedek, nugele tuina, ngallei ridahu sampulona hassele battu ri Abraham na ia ambarakkaki ri tau nguppa injo sapatta.

⁷ Injo gelei akkulle rigagai ma'nassana tula'bi rahangang injo ribarakkaki ritula'bi bakkakang.

⁸ Rise're passala, rupatau lamate inni jua lanarima ridahu sampulona battu rihassele, na ripassala maraeng, tunarima injo ridahu sampulona battu rihassele iamo intu Melkisedek, nuripassala'na kalenNa risare passa'bi ma'nassana Ia attallasai.

⁹ Na akkulle pole ripau ma'nassana patteteang ri Abraham maeng rialle todo'i ridahu sampulona hassele battu ri tau Lewi tusiratang injo lanarima ridahu sampulona sikonjo hassele.

¹⁰ Saba' Lewi rie' juapai lalang ri batangkalenna puwa-puwana ammanna, rihattunna Melkisedek laruppai puwa-puwana ammanna.

Almase intu Imang nula'bi rikala'birang battu ri Harun 7:11-28

¹¹ Umma' Israele maengimu narimai Tora'. Mingka, so'di patteteang rikaimanganna injo maeng ngimbolong kasangkakang inni, ngura parallu juapai ritantuang se're tau maraeng laa'jari imang bakka' assituru' atoranna Melkisedek na ripassala'na ia gelei ripau assituru' atoranna Harun?

¹² Saba', ampa appinrai kaimangang injo, appinra kale-kale todo'i hukkung Tora' intu.

¹³ Saba' Ia, turikuangang ri inni, antama'i ripinangka' maraeng; battu ripinangka' inni gele rie' manna se're tau maeng anjampangi ri mejang panaroang pakkoro'bangang.

¹⁴ Saba' maeng laisse' ngase'mu tau ma'nassana Karaengta assala'na battu ripinangka' Yehuda na ripassala'na pinangka' injo Musa gelei minang lapau manna sipali' ripassala'na sikonjo imang.

¹⁵ Passala injo la'bi kaissekangi pole, ampa ritantuangi se're tau imang maraeng assimpole Melkisedek.

¹⁶ Ia a'jarii imang gele assituru' riatorang rupatau, mingka assituru' kahasa attallasa nugele akkulle lamate.

¹⁷ Saba' passala ri Ia risarei passa'bi, ”Kaumo Imang lasituli-tulinna, assituru' atoranna Melkisedek.”

¹⁸ Jari hukkung nurie' injo riolo gelemu ripake, saba' hukkung injo gelemo rie' kagassinganna na tide' todo'mo matu-matunna.

¹⁹ Hukkung Tora' injo gelei sikalii akkulle ngurang mange rikasangkakang. Injomo saba'na, ripappiissekangi mae riditte se're pattajalliang nula'bi bajikang, nulapakaseppa' injoki mange ri Allataala.

²⁰ Na passala inni gelei a'jari ampa tide' sapatta. Toje'i lohemo tau maraeng a'jari imang manna injo tide' sapatta,

²¹ mingka tau se're inni a'jari imangi nalapinahangi sapatta, kanara Allataala maeng appau mange ri Ia, ”Karaeng maeng assapatta na Ia gele lasassali: Kaumo Imang lasituli-tulinna.”

²² Injomo saba'na Isa a'jarimu boro' battu rise're passitallikang nula'bi baji'.

²³ Lalang rijumalla bakka' iyai maeng a'jari imang, mingka iyai latulusu laampangi kamateang laa'jari imang.

²⁴ Mingka, Isa latuli tallasa situlusu'na, ri appakonjonamo kaimanganNa gelei akkulle a'lette' mange ri tau maraeng.

²⁵ Kanara injomo, Ia akkulle todo'i appakasangka' kasalamakang risikuanna tau nupatteteang ri Ia ambattu mange ri Allataala. Saba' Ia tulusu attallasai laa'jari petteteang ri iyai.

²⁶ Saba' Imang Bakka' appakonjomo riparalluang: iamo intu tumallang ri Allataala, tide' geo' salana, tide' daana, assisalai battu risikuanna tau doraka na la'bi langkasangi battu risikonjo alla'-alla'na suruga.

²⁷ Ia gelei assimpole sikonjo imang bakka' nuallo-allona parallui appassidakka koro'bang tujunna rikadorakaanna to'jua na rimaengnapa injo ampamo kadorakaanna risikonjo umma'. Saba' passala injo Ia maemmu lageokang sikali na situlusu'na, rihattunna Ia lapassidakkaang kalenNa to'jua.

²⁸ Saba' hukkung Tora' anjo'jo' tau rie' kalammaanna laa'jari Imang Bakka', mingka sapatta nuripau injo rilappasa'namo hukkung Tora', anjo'jo'i Ana' numaeng ripaa'jari sangka' situli-tulinna.