IBRANI 6 - Kitta' Passitallikang Bau KAREBA BAJI'

¹ Injomo saba'na, maemaki ribokoi sikonjo pappoonganna riajarang passala Almase, mingka nuparallu ripipahangi sa'genna rikasangkakanna. Baji'i ampa ditte appariati gele sangga ripassala pappoongang pajarraang battu risikonjo panggeokang tide' matu-matunna, na poong katappakang mange ri Allataala,

² iamo intu ajarang ripassala lohe rupanna panrio, pappatompangang pala'lima, attallasa'na sikuanna tau mate na hukkungang tide' injo tappu'na.

³ Na injomo laribua', iamo intu parallui ripipahangi Almase sa'genna rikasangkakanna, ampa lakaa'raki Allataala.

⁴ Saba' tumaeng injo risinari atina, tumaeng injo nguppa barakka' ri Allataala na tumaeng injo nguppa dahuang lalang ri Nyaha Tangkasa,

⁵ na tunguppai injo pau baji' battu ri Allataala na sikonjo kahasa lino labattu injo,

⁶ mingka a'bokoi pole, gelei ma'ring ripakabaji' poleang laa'jari jarra, saba' iyai injo lasalli'i poleang Ana' Allataala lalang ri kalenna to'jua na attua-tuai ri Ia ri a'rakanna tau lohe.

⁷ Saba' tana ngesa' injo ere bosi nua'dappe' ribahonna na appatimboi lamung-lamung rie' matu-matunna mange ri iyai tuanjamana, tana injo narimai barakka' battu ri Allataala.

⁸ Mingka ampa tana injo bunga jabe na katinting jua lapatimbo, tana injo tide'jua matu-matunna na gelemu dere ripattadea nukala'busanna laritunui.

A'bitantang jarre' ripattajalliang 6:9-20

⁹ Mingka, Urang siana' mala'biri'ku, manna injo kambe appau appakonjo passala ri kau, kambe tappa'kang ma'nassana kau ngampunnai se're nula'bi baji', nungimbolong kasalamakang.

¹⁰ Saba' Allataala gelei ma'ring lagele adele. Ia gele lakaluppai jama-jamaammu na pangamaseang mupappijanjangang injo passabakang ri arenNa lalang laanjampangi sikuanna tau tappa', assimpole nutuli mugeokang injomo.

¹¹ Mingka nutakaa'raki, solanna mupappijanjangang toje'i a'rupana pattajallianta sa'genna ambattu mange rikala'busang.

¹² Nukukaa'raki bisannabali kau anda a'jari sabala, mingka attallasa assimpole tau laharisi ritalli' injo saba' tappa' na sabbara attajang sikonjo talli'.

¹³ Saba' rihattunna Allataala lapassareang pattalli'Na mange ri Abraham, Ia assapattai passabakang ri arenNa to'jua, saba' gele rie' tau la'bi langkasang battu ri Ia,

¹⁴ pauNa: ”Sitoje'na Nakke laassare barakka' ri kau siloheang na kau laa'jari sanna' lohena.”

¹⁵ Abraham sabbarai attajang na ri appakonjona ia lauppai apa nurisappataang injo mange ri ia.

¹⁶ Saba' rupatau inni attalli'i saba' ri tau nula'bi langkasang ri ia, na talli' injo a'jari panjarreki ri ia, laappaa'maengi sikonjo pa'beserang.

¹⁷ Kanara injomo, rihattunna Allataala a'ra' lapappijanjangang surangang la'bi laappattoje' laa'rupana naha-nahanNa mange risikonjo tulaharisi ritalli' injo, Ia lasikko' kalenna risapatta.

¹⁸ Rua injo passala nugele akkulle appinra na Allataala gelei ma'ring a'bura-bura ripassala injo. Injomo saba'na ditte tua'boja inni pa'lengukang, nguppaki katerasang laa'bitantang ripattajalliang nurie' injo ri a'rakanta.

¹⁹ Pattajalliang injomo balango huku na appakaa'jannang ribatengta, numaeng rilabuammo sa'genna a'limbang ha'leang passimbangang,

²⁰ Isa maengmu antama' ri tampa' injo assimpole se're pauluang mae ri ditte, rihattunna Ia a'jari Imang Bakka' sa'genna situli-tulinna, assituru' atoranna Melkisedek.