IBRANI 5 - Kitta' Passitallikang Bau KAREBA BAJI'

¹ Saba' sikonjo imang bakka' ripilei battu ri rupatau, naritantuangi laa'jari passisambungang ri iyai surangang Allataala, solanna ia appabattu passidakka na koro'bang kanara kadorakaang.

² Ia parallui lapinahang sikuanna tau gele injo tappa' na tau lingu injo, saba' manna ia rassi to'juai kalammaang.

³ Injomo saba'na parallui assare passidakka koro'bang pallappasi kadorakaang, gele sangga mange ri umma' jua, mingka mange pole ri kalenna.

⁴ Na tide' manna se're tau laallei kala'birang injo tuju kalenna to'jua, passangadinna turikeo'pa ri Allataala, assimpole numaeng kajariang injo ri Harun.

⁵ Appakonjo todo'i Almase gele kalenNa to'jua lapakala'biri lalang a'jarina Imang Bakka', mingka Ia ripakala'birii ri Allataala tuappau injo mange ri Ia, ”Kaumo Ana'Ku! Kau a'jari Ana'Ku allo inni”,

⁶ assimpole pauna Allataala lalang ripappau maraeng, ”Kaumo intu Imang situli-tulinna, assituru' atoranna Melkisedek.”

⁷ Lalang tallasa'Na assimpole rupatau, Ia appassidakka dowaang surang pangera lalang riparau na ere mata mange ri Allataala, tuakkulle injo lapakasalama'i battu rikamateang, na kanara rikalambusanna Ia maeng ripilangngerimu.

⁸ Manna injo Isa intu Ana'i, Ia maengi appilajara tunru' battu rikasissaanNa

⁹ na rimaennamo Ia ripisangkaki, Ia a'jarii poong kasalamakang mannannungang mange risikuanna tau tunru' injo mange ri Ia

¹⁰ na Iamo rikeo' a'jari Imang Bakka' ri Allataala, assituru' atoranna Melkisedek.

Pappiu'rangi solanna gele a'boko 5:11–6:8

¹¹ Ripassala injo lohe nuparallu ripau, mingka sukkarai risesei, kanara dompala'mu laappilangngeri.

¹² Saba' manna injo kau, sitoje'na akkullemo laa'jari guru, mingka parallujuapa pole lariajara ripassala pappoongang battu ripau Allataala, na kau parallu juapa ere susu, gele kanre terasa.

¹³ Saba' sikuanna tau tarrusu injo nginung ere susu ia gelepai lapahang ajarang passala kanabang inni, saba' ia assimpole juapai ana' lolo.

¹⁴ Mingka kanre terasa iamo intu tujunna tau toa, turie'mo pappisammuna laappassisa'la' antee nubaji' na anteeang nudaa.