IBRANI 4 - Kitta' Passitallikang Bau KAREBA BAJI'

Allo pammari-mariang nulapakasadia Allataala 4:1-13

¹ Injomo saba'na, baji'muki tutu, solanna anda rie' manna se're tau ri kau rirapang ribokoi, manna injo rie' juapa sapatta laammari ri tampa' ripammariang nulapakasadia injo Allataala.

² Kanara mae ri ditte ripappiissekang todo'i kareba kate'neang assimpole mange ri iyai, mingka pau nurilangngere injo tide' matu-matunna mange ri iyai, saba' geleinna tappa' assimpole tau maraeng allangngere injo todo'.

³ Saba' ditte tutappa' inni, laammari ri tana pammariang nulapakasadia injo Allataala assimpole ripappauNa, ”Sa'genna Nakke assapatta lalang rikuku'Ku: Iyai gelei laantama' ri tana pammariangKu,” manna injo jamaanNa a'maemmo minang riampana ripaa'jari lino.

⁴ Saba' passala allo makatuju maengi ripapau lalang rise're pau, ”Na Allataala ammari-marii risikonjo jamaanNa ri allo makatuju.”

⁵ Lalang ripau injo akkullei pole riaji, ”Iyai gelei laantama' ri tana pammariangKu.”

⁶ Jari, baji'mu riisse'na ma'nassana larie' tau laammari ri tana pammariang nulapakasadia injo Allataala, mingka iyai tula'bi riolo injo nguppa kareba kate'neang, gelei laantama' kanara geleinna a'ra' tunru'.

⁷ Kanara injomo, Ia appattantu pole se're allo, nurisa'bu' injo allo inni. Passala rihattu injo Ia lapaui patteteang ri Daud sallo ribokoanganna mae, assimpole nuripau injo sumpae', ”Allo inni, ampa mulangngere sa'ranNa, andalaloi pakaterasa atimu!”

⁸ Saba', so'di injo Yosua maeng laurang ngase'i antama' ri tana pammariang, tantumu rimaenna injo Allataala gelemu lapau pole ripassala larie' juapa allo maraeng.

⁹ Jari, rie' juapa se're allo pammari-mariang, allo makatuju, ri umma' Allataala.

¹⁰ Saba' inai jua maeng antama' laammari ri tana nulapakasadia injo Allataala, injo ia ammari-marimu battu risikonjo jama-jamaanna, assimpole Allataala ammari-mari battu rijamaanNa.

¹¹ Kanara injomo, baji'mu ditte apparri-parri laantama' ri tampa' nulapakasadia injo Allataala, solanna anda rie' manna sitau a'dappe' kanara minahanna rikageleang tunru' assimpole injo.

¹² Saba' pau Allataala attallasai na gassingi surang la'bi tarangi battu ri pa'dang appimbali injo matanna; anralangi panobo'na sa'genna lapassisa'lakang nyaha na bateng, pa'lesu-lesuang na oto' buku; ia akkullei latassere pikkirang na naha-naha ri atita.

¹³ Gele rie' manna se're mahallo' ta'lengu' ri a'rakanNa, saba' sikuanna assolara na tassungke ri a'rakang matanNa numange ri Ia ditte parallu assare tanggongjawa'.

Isamo Imang Bakka' 4:14–5:10

¹⁴ Jari, kanara ditte konni-konnina riampunnai Imang Bakka' kaminang la'biri, tumaeng lalimbangi langi', iamo intu Isa, Ana' Allataala, baji'mu ditte a'bitantang jarre' ripangakuang katappakanta.

¹⁵ Saba' Imang Bakka' nuriampunnai injo, gelei imang bakka' nugele akkulle minahang risikonjo kalammaanta. Sibale'na assimpole ditte, Ia maengi riso'ri, mingka Ia gele anggeokang kadorakang.

¹⁶ Injomo saba'na, maemaki lalang rikabaraniang seppa' mange ri kadera pattolonganna Allataala, solanna ditte narima dalle' na nguppa barakka' pattulungang rihattunna.