IBRANI 3 - Kitta' Passitallikang Bau KAREBA BAJI'

Isa la'bi langkasang battu ri Musa 3:1-6

¹ Injomo saba'na, Urang siana' julu katappakang, tunguppa injo dahuang ripakkeo'na Allataala, pariatimu Isa, Suro na Imang Bakka' nuriakui injo,

² tumallang mange ri Allataala latantuangi Isa, appaanteekamua Musa mallang todo'i anjama lalang ri saponna Allataala.

³ Saba' Isa siratangi languppa kala'birang nula'bi bakkakang battu ri Musa, assimpole mataguri', la'bi ripakala'biri battu ri sapo labua' injo.

⁴ Saba' se're inni sapo labua'i mataguri', mingka mataguri' risikuanna nuribua' iamo intu Allataala.

⁵ Toje'i Musa mallangi anjama lalang ri saponna Allataala assimpole padaha-daha laassare passa'bi ripassala nularipappauang injo sallo'.

⁶ Mingka Almase mallangi anjama assimpole Ana' attanggongjawa' ri saponna Allataala; na saponna Allataala iamo intu ditte, ampa a'bitantang jarre'ki rikatappakang surang ripattajalliang nuripa'bangga-banggaang sa'genna ambattu mange rikala'busang.

Mate panra' kanara a'boko 3:7-19

⁷ Injomo saba'na, assimpole nulapau injo Nyaha Tangkasa, ”Allo inni, ampa mulangngere sa'ranNa,

⁸ akolalo pakaterasai atimu assimpole rihattummu maronta' rihattu passo'ri ri parang luara,

⁹ rihattu injo puwa-puwamu assarei passoba ri Nakke na passo'ri mae ri Nakke, manna injo iyai lajanjangi sikonjo panggeokangKu, patampulo taung sallona.

¹⁰ Injomo saba'na Nakke kuku'a mange tau lohe injo, na appau: Sanging palingu atina, na iyai gelei laisse' pa'lalangangKu,

¹¹ sa'genna Nakke assapatta lalang rikuku'Ku: Iyai gelei laantama' ri tana pammariangKu.”

¹² Tutuiko, Urang siana', solanna ri kau tide' kauppaang manna se're tau daa atina na gele tappa' sa'genna a'boko battu ri Allataala attallasa injo.

¹³ Mingka allo-alloko assipiu'rangi, ampa rie' juapa hattummu allo inni laappau, solanna gele rie' ri kau a'jari terasa atina kanara pambanja'-banja'na kadorakaang.

¹⁴ Saba' ditte maeng a'jari dahuang battu ri Almase, ampa a'bitantang jarre'ki rikatappakang surang ripattajalliang nuripa'bangga-banggaang sa'genna ambattu mange rikala'busang.

¹⁵ Rihattunna ripau, ”Allo inni, ampa mulangngere sa'ranNa, akolalo pakaterasa atimu assimpole rihattummu maronta'”,

¹⁶ inaimo ri iyai tumaeng allangngere sa'ranna Allataala, mingka tuli appa'rie'i kuku'na Allataala? Gelejua iyai tuansulu' injo battu ri tana Massere tulaurang injo Musa?

¹⁷ Inaimo lakukuki Allataala patampulo taung sallona? Gelejua iyai tau anggeokang injo kadorakaang na tumate assisulimpangi injo ri parang luara?

¹⁸ Inaimo maeng latunrai Allataala ma'nassana iyai gelei laantama' ri tana pammarianna Allataala? Gelejua iyai tugele injo mallang?

¹⁹ Ri appakonjona ditte riisse'i ma'nassana iyai gele akkullei antama' kanara iyai geleinna tappa'.