IBRANI 2 - Kitta' Passitallikang Bau KAREBA BAJI'

Kasalamakang Bakka' 2:1-4

¹ Kanara injomo ditte parallu la'bi baji' appariati apa numaeng rilangngere, solanna andaki ammanyu' laalle jammang.

² Saba' pau nuripabattu injo patteteang risikonjo malaeka' tulusu laa'rupai, na sikonjo kasalaang surang kageleang tunru' languppai pa'balasa nusiratang.

³ Anteeki kamua lalappasa, ampa gele ripa'matu-matui kasalamakang bakka' injo, nupakaramula ripappiissekang ri Karaeng na ripattoje'i mae ri ditte ri iyai tumaeng allangngere ri Ia?

⁴ Allataalamo lapakajarre'i passa'binai surangang tanra-tanra na lohe kajariang nugele samara surang lohe pole rupanna tanra kahasa na passare ri Nyaha Tangkasa, Ia lapa'dahu-dahuangi assituru' ria'ra'Na.

Isa sinampe'juai la'bi rahangang battu risikonjo malaeka' 2:5-18

⁵ Saba' Ia gelei assare kahasa mange risikonjo malaeka' ri lino larie' injo sallo', nuribisara injomo rikonni-konnina.

⁶ Sibale'na, rie' tau maeng assare passa'bi pau lalang ri kitta, lakua, ”Inaimo rupatau, sa'genna Kau ngu'rangi ri ia, iyareka ana' rupatau, sa'genna Mupariati?

⁷ Mingka Kau maengi mupaa'jari lalang rihattu siso'di' la'bi rahangang battu risikonjo malaeka', na maeng musarei songko' kakaraengang lalang rikala'birang na kangalikang,

⁸ Iangase'na Kau maeng appatunru' rahangang bangkenNa.” Saba' lalang riappatunru' iangase'na mange ri Ia, gelemo rie' manna se're nulalappasa, nugele tunru' mange ri Ia. Mingka konni-konnina ditte gelepai rijanjang iangase'na ripatunru' mange ri Ia.

⁹ Mingka nurijanjang iamo intu ma'nassana Isa lalang rihattu siso'di' ripaa'jari la'bi rahangang battu risikonjo malaeka', na kanara kasissaang kamateang, risarei songko' kakaraengang surangang kala'birang na kangalikang, patteteang ribarakka'na Allataala, Isa anrumpa'i kamateang ritujunna sikonjo rupatau.

¹⁰ Saba' appakonjo memang todo'i Allataala appakasangka' todo'i Tunyungke pa'lalangang lalaurang ngase'i mange rikasalamakang patteteang rikasissaang. Allataala mange ri Ia na nubattu ri Ia iangase'na ripaa'jari, iamo intu Allataala ngurang injo lohe tau mange rikala'birang.

¹¹ Saba' Isamo appakatangkasa na iyai ripakatangkasa, sikuanna nubattu ri Se're; iamo injo saba'na Isa gelei siri' laare' iyai injo urang siana',

¹² pauNa: ”Nakkemo laappala'bang AremMu mange risikonjo urang siana'Ku na appakala'biri ri Kau ritangnga-tangngana jamaah,”

¹³ na rie' pole: ”Nakke lanaro katappakang mange ri Ia,” na rie' pole: ”Sitoje'na, Nakkemo inni na ana'-ana' numaeng lapassareang injo Allataala mae ri Nakke.”

¹⁴ Saba' ana'-ana' injo iamo ana'-ana' battu ri rara na assi, jari Isa a'jari todo'i assimpole iyai na minahangi lalang rinulauppa injo, solanna patteteang rikamateanNa Isa appakatide' Ibilisi nuakkahasa injo rikamateang.

¹⁵ Ri appakonjona, Ia lapakalappasai pole iyai tuassimpa'pa' ummuru rie' lalang ripangatai kanara malla'na mange rikamateang.

¹⁶ Saba' sitoje'na, gele sikonjo malaeka' Ia lapariati, mingka tuina jua Abraham Ia lapariati.

¹⁷ Iamo injo saba'na, lalang risikuanna passala Ia parallui ripassimpole surangang sikonjo urang siana'Na, solanna Ia a'jari Imang Bakka' nuassare pangamaseang na mallang mange ri Allataala laappaa'dame rikadorakaanna umma'.

¹⁸ Kanara Iamo maeng assinsara rihattunna riso'ri, jari Ia akkullei assare pattulung mange ri iyai tunguppa injo passo'ri.