IBRANI 13 - Kitta' Passitallikang Bau KAREBA BAJI'

Pappi'urangi surang pangera dowaang salama' 13:1-25

¹ Katutuilalo passikamaseang injo mange riurang siana' julu katappakang!

² Akolalo takkaluppa assare pamminsamboang mange ri tau maraeng, saba' ria'bua' appakonjomo lohe tau nugele laisse' maeng attoana siloheang malaeka'.

³ U'rangilalo tau rie' injo ri pattarungkuang, saba' manna kau intu tau ritarungku todo'. U'rangi todo'i sikuanna tau ribua' gele injo siratang, saba' manna kau attallasa juapako ri lino inni.

⁴ Parallui kau ngase' ngali ripakkalabiniang na akolalo assangkili, saba' Allataala langadeli sikuanna tau balere na pasangkili.

⁵ Akolalo kau a'jari ata ri doe' na pakaganna' tommoi kalemmu ri apa nurie' ri kau. Saba' Allataala maengi appau, ”Gele sikaliko laKulappasang na gele sikaliko laKubokoi.”

⁶ Injomo saba'na surangang kajarrekang akkulleki appau, ”Karaeng iamo intu Panulungku. Nakke gelema lamalla'. Apamo akkulle lalageokang rupatau inni mae ri nakke?”

⁷ U'rangilaloi sikonjo ponggahamu, tumaeng appabattu injo pauna Allataala mange ri kau. Pariatisai kala'busang tallasa'na na pinahangi katappakanna.

⁸ Isa Almase gelei appinra, baji' injo risuhangngi iyareka allo inni na sa'genna situli-tulinna.

⁹ Akolalo a'ra' ripakalingu rilohe rupanna ajarang nugele assituru' ajarang numaeng mutarima injo. Saba' nubaji' iamo intu atimu ripakasa'ga' surangang barakka' na gele surangang risikonjo atorang passala kanre-kanreang nugele rie' matu-matunna mange ri iyai tuminahang injo.

¹⁰ Ditte riampunnai se're mejang pakkoro'bangang na sikonjo pajampangi kema gelei akkulle nganre battu ri assinna mejang injo.

¹¹ Kanara batangkalenna binantang nurarana rierang antama' ri tampa' tangkasa ritunui pantarang kema nurierang ri Imang Bakka' laa'jari koro'bang pallappasi kadorakaang.

¹² Injo todo'mo saba'na Isa maengi assinsara pantarang babaang laappakatangkasa ri umma'Na surangang ri rara kalenNa.

¹³ Kanara injo, maemaki a'lampa mange ri Ia pantarang pakkemaang na lananggong katunaanNa.

¹⁴ Saba' ri inni ditte tide' riampunnai kota a'jannang; ditte a'bojaki kota nularie' injo.

¹⁵ Injomo saba'na, maemaki, patteteang ri Ia, sanging assareki passidakka koro'bang sukkuru mange ri Allataala, iamo intu pau ri baba appakala'biri arenNa.

¹⁶ Akolalo takkaluppa anggeokang nubaji' na assare sokongang, saba' koro'bang appakonjomo langai Allataala.

¹⁷ Tunru'laloko risikonjo ponggahamu na ngali'laloko mange ri iyai, saba' iyai injo lajagai batemmu, assimpole tau parallu laattanggongjawa rateanna. Tunru'laloko mange riyai solanna iyai injo lageokangi jama-jamaanna lalang rikate'neang, gele surangang husa-husa, saba' passala injo gelei ngerang kabajikang mange ri kau.

¹⁸ Tarru'-tarrusuko ngera dowaang; saba' kambe jarre'kang ma'nassana si'nongi atiba, kanara lalang risikuanna passala, injo a'rakang tallasa baji'.

¹⁹ La'bipa pole nakke appiu'rangi ri kau lamugeokangi, solanna nakke la'bi lassiri ripahuliang mange ri kau.

²⁰ Allataala ripatteteang rara passitallikang nutide' injo tappu'na maeng laerangi muliang battu risikuanna tau mate Pakalahaki Bakka' risikonjo jimbala, iamo intu Isa, Karaengta.

²¹ Bisannabali Allataala dame salehangang, lapakasangkakiko surangang risikuanna nubaji' laanggeokang ria'ra'Na, na anjama lalang ri ditte nuringai injo ri Ia, patteteang Isa Almase. Mange ri Iamo kala'birang sa'genna situlusu'na! Aming.

²² Nakke appiu'rangi mange ri kau, Urang siana', solanna pau-pau pappiu'rangingku inni mutarima baji'i surangang te'ne pa'mai', manna injo gelejuai lambere sura'ku inni mange ri kau.

²³ Piissekii, Timotius, urang siana'ta, a'lampamu. Ampa ambattumu mae, nakke lamange ri kau assurang ia.

²⁴ Pabattuanglalo sallang mange risikuanna ponggahamu na sikuanna tau tappa'. Sikonjo urang siana' julu katappakang battu ri Italia appikatu sallang mange ri kau.

²⁵ Barakka' lapinahang ngase'ko.