IBRANI 12 - Kitta' Passitallikang Bau KAREBA BAJI'

Pappiu'rangi solanna sabbara lalang ri katappakang 12:1-17

¹ Kanara ditte ngampunnai lohe sa'bi, assimpole rammang lohena nurie' injo risiapputa, injomo saba'na maemaki ripela' ngase'i erangang bera' inni surang kadorakaang ngampang injo ri ditte, na apparri-parriki surangang sabbara lalang ripapparri-parriang nuparallu injo ri ditte.

² Maemaki rigeokangi surangang mata ammonga mange ri Isa, tulaurang injoki lalang ri katappakang na laerang katapakanta injo mange rikasangkakang. Ia gelei lapiduli katunaang inni na sabbarai nyompo salli' passambe kate'neang nuripasadiaang injo mange ri Ia, nukonni-konina attolongi risa'ri kanang kadera pattolonganna Allataala.

³ Tulusu u'rangialo Ia tusabbara injo nanggong ripanggagai manna anteekamua bera'na mange ri kalenna to'jua battu ri tau doraka injo, solanna andako a'jari lamma na tappu' ranggasela.

⁴ Lalang riapparri-parrimu a'bali kadorakaang, gelepai minang ammatti' raramu.

⁵ Mukaluppaimuka ripappiu'rangi mange injo ri kau assimpole pappiu'rangi mange ri ana'-ana'? ”Oe ana'ku, akolalo jillu' sa'ri pangajara'na Karaeng, na akolalo tappu' ranggasela ampa kau ripiu'rangi ri Ia;

⁶ kanara Karaeng ngajarai tau rikamaseang injo ri Ia, na Ia amba'balai tau laani injo ana'.”

⁷ Ampa kau parallu lananggong hukkungang; Allataala labua' assimpoleko ana'. Ri apa mae rie' ana' gele riajara ri ammanna?

⁸ Mingka, ampa lappasako battu hukkungang, nuparallu lakasissai tasse're-se're tau, injo kau intu sanging ana' buni, na gele ana' toje'.

⁹ Sitarrusu'na: Battu ri amma toje'ta ditte nguppa hukkungang, na iyai injo ri kangaliki; ampa appakonjoi gelejua ditte la'bi parallu tunru' ri Amma sikuanna nyaha, solanna ditte nguppa tallasa?

¹⁰ Saba' iyai tungajara ridette lalang hattu larapang injo baji', mingka Ia laajaraki tujunna rikabajikanta, solanna ditte nguppa dahuang lalang ri katangkasanNa.

¹¹ Toje'i tasse're-se're hukkungang rihattu ripassareanna gelei appabattu karannuang, mingka kapa'risang. Mingka ria'maengnamo pangajara injo appabattui hassele kanabaang nungerang dame mange ri iyai turiajara battu ri hukkunang injo.

¹² Injomo saba'na, pakaterasa balika' lamma injo na kolantu anggegeng injo;

¹³ na pakalapparangi pa'lalanganna bangkemmu, jari gelei tatturang tau kempang injo, mingka a'jari baji'i.

¹⁴ Apparri-parriko tallasa dame mange risikuanna tau na bojai katangkasang inni, saba' ampa tide' katangkasang gele rie' manna se're tau anjanjang Karaeng.

¹⁵ Katutuilalo solanna anda rie' manna se're tau lapela'i barakka'na Allataala, bisannabali andai attimbo aka' pai' nuappabattu injo pa'beserang na appakadaai lohe tau.

¹⁶ Andalalo rie' tau a'jari balere iyareka rie' tide' naha-nahanna assimpole Esau tulabalukang injo kaharisang kalihuaanna passabakang kanre sipinjeng.

¹⁷ Saba' muissekinna ma'nassana maeng injo, rihattunna ia a'ra' lanarima barakka' injo, ia ritolla'i, saba' ia tide'mo hattunna laappakabaji' rikasalaanna, manna injo ia labojai surangang appaatti' ere mata.

Tanggongang bakka' 12:18-29

¹⁸ Saba' kau geleko ambattu mange ri bonto nugele injo akkulle riseru na api ammohong-mohong bola'na, mange rikalammang kapu', kakalammangang na anging ka'bu,

¹⁹ mange risa'ra timboe' surang sa'ra bakka'. Rihattu lalangngerinna sa'ra injo laeraimu solanna sa'ra injo andamu pole a'bisara mange ri iyai.

²⁰ Saba' iyai gele attahang allangngere parenta inni, ”Injo pole manna binantang nyeru bonto inni, ia parallui ribundu' batu.”

²¹ Sanna' toje' pappakamalla'na rinurijanjang injo, sa'genna Musa appau: ”Sanna'i malla'ku na sanna'i pannettere'ku.”

²² Mingka kau maeng ambattumoko mange ri Bonto Sion, mange ri kota Allataala attallasa injo, Yerusalem ri suruga na mange riassa'bu-sa'bu malaeka', se're pa'rappungangang bakka' nurassi karannuang,

²³ na mange ri jamaah risikonjo ana' lihua, nuarenna maeng ta'dattaramo ri suruga. Ambattuimoko mange ri Allataala, tulangadeli injo risikuanna tau, na mange risikonjo nyaha tau naba maemmu risangkaki,

²⁴ na mange ri Isa, tua'jari injo Patteteang ripassitallikang bau, na mange ri rara pambe'bese injo, nua'bisara la'bi bakkakang battu ri rarana Habel.

²⁵ Katutuilalo solanna kau anda nolla' ri Ia tuappau injo. Saba' ampa iyai, tunolla' injo ri Ia tuappiu'rangi injo ri iyai ri lino inni gele lappasa, apa pole ditte, ampa a'bokoki battu ri Ia tua'bisara injo battu ri suruga?

²⁶ Rihattu injo sa'ranNa laappakaanggeongi lino, mingka konni-konnina Ia assarei talli' ”Sikalipa pole Nakke laappakaanggeong gele sangga lino jua, mingka manna langi'.”

²⁷ Pappau ”Pinsikalipa” pole injo anjo'jo'i mange ripanyambei battu ri apa nuanggeong injo, iamo intu apa nulapaa'jari, solanna apa nugele anggeong, tuli rie'i.

²⁸ Jari, kanara ditte narima pakkaraengang nugele akkulle rigeong, maemaki appanai' sukkuru na assambajang mange ri Allataala assituru' tanra nunaba injo mange ri Ia, surangang ngali' na malla'.

²⁹ Saba' Allataalata iamo intu api appakamutung.