IBRANI 11 - Kitta' Passitallikang Bau KAREBA BAJI'

Sa'bi rikatappakang 11:1-40

¹ Katappakang iamo intu pallangga battu ri iangase'na nuritajallii na tanra battu ri iangase'na nugele injo kajanjangang.

² Saba' surangang rikatappakammo maeng ripassareangi passa'bi ma'nassana Allataala angngai mange ri puwa-puwata.

³ Kanara katappakang ditte riisse'i ma'nassana lino inni maeng ripaa'jari battu ripauna Allataala, jari apa nukajanjangang maeng ripaa'jarimu battu rinugele kajanjangang.

⁴ Kanara katappakang Habel maeng assidakka mange ri Allataala koro'bang nula'bi bajikang battu rikoro'banna Kain. Ri appakonjona ia nguppai passa'bi ma'nassana ia nabai, saba' Allataala angngai mange ripassidakkana na kanara katappakang ia a'bisara juapai, rimaeng matenamo.

⁵ Kanara katappakang Henokh riangka'i, solanna ia gele anrumpa' kamateang, na ia gelei rirumpa', kanara maengmu laangka' Allataala. Saba' rigelenapa riangka', ia nguppai passa'bi ma'nassana Allataala angngai mange ri ia.

⁶ Mingka ampa gele rie' katappakang gelei ma'ring tau inni ringai ri Allataala. Saba' inai a'giling mange ri Allataala, ia parallui tappa' ma'nassana rie' toje' Allataala, na ma'nassana Allataala assare passahalang mange ri tau attoje'-toje' injo a'boja ri Ia.

⁷ Kanara katappakang, Nuhung ripiu'rangi ri Allataala rise're passala nugelepa kajanjangang maeng injo tunru'i naappakasadiai lopi lalapakasalama' bija-bijanna. Na kanara katappakang injo ia assare hukkungang ri lino, na ia a'jarii tuharisi'na kanabang, assituru' rikatappakanna.

⁸ Kanara katappakang Abraham a'jarii tunru', rihattunna ia risuro laa'lampa mange ri tampa' nulalatarima injo a'jari pappusakaanna, jari ia a'lampai manna gelei laisse' nulalamangei injo.

⁹ Kanara katappakang ia ammarii ri tampa' nuritallikang injo assimpole tubattu-battu na ri injo ia ammari lalang ri kema surangang Ishak na Yakub, tuassurang-surang injo lanarima dahuang ripassitallikang injo.

¹⁰ Saba' ia attajang-tajangi kota nurie' pallanggana, nurinaha-naha surang nuripaenteng ri Allataala.

¹¹ Kanara katappakang, manna injo tamanangi Sara, Abraham appada'darai ampu piu'-piu', padahala toamu ummuru'na, kanara ia anrapang ri Ia, tuassare injo talli' mallangi.

¹² Iamo injo saba'na, battu rise're tau, la'bipa pole ri tau sanna'mo lamma batangkalenna, a'da'dara bakka'i pinangka'na, assimpole bintoeng ri langi' na assimpole bone ri biring tamparang, nagelei akkulle ta'rekeng pammate lohena.

¹³ Lalang katappakang iyai ngase' inni nagele nguppa ri nuritallikang injo, mingka sangga lajanjangna jua na akkape-kape derei mange rituritallikang injo. Iyai injo rirapangi assimpole tubattu-battu na tumae'-maeang ri lino inni.

¹⁴ Saba' iyai tuappau appakonjo injo lapappiissekangi ma'nassana iyai sanna' pa'bojainna se're tampa' pammariang.

¹⁵ So'di lalang ripassala injo iyai ngu'rangi ri tampa' pammariannai riolo, numaeng labokoi injomo, iyai rie' hattunna lamuliang mange konjo.

¹⁶ Mingka konni-konnina iyai sanna' pa'bojainna tampa' pammariang nubaji', iamo intu tampa' pammariang ri suruga. Injomo saba'na, Allataala gelei siri' a'jari Allataala ri iyai, saba' Ia maeng lapakasadiaammu se're kota mange ri iyai.

¹⁷ Kanara katappakang, rihattunna riso'ri, Abraham lapassidakkaangi Ishak. Ia, tumaeng narima injo talli' rellai lapassidakkaang ana' sitau-tauna,

¹⁸ manna injo mange ri ia maengi ripau, ”Battu ri Ishakmo kau languppa pinangka' nuritallikang injo.”

¹⁹ Saba' ia appikkiri ma'nassana Allataala kahasa laappakaattallasa sikuanna tau manna injo battu ri tangnga-tangngana tau mate na battu konjomange ia assimpolekalena tumaemmo latarima muliang.

²⁰ Saba' katappakang, naappikkiri derei mange ri a'rakang, Ishak lapassareangi barakka'na mange ri Yakub na Esau.

²¹ Kanara katappakang, sungka'i seppa'mu larapi' hattu kamateanna, Yakub labarakkaki ngase' ana'na Yusuf, maeng injo ngera dowaangi na attungkului ri ulu tukkanna.

²² Kanara katappakang, sungka'i seppa'mu larapi' hattu kamateanna, Yusuf lapaui passala ansulu'na tau Israele na assarei pappasang ripassala'na buku-bukunna.

²³ Kanara katappakang, sungka'i lahere, Musa risa'bui tallumbulang sallona ri tau toana, kanara iyai lajanjangi ma'nassana ana' injo ratta'i na iyai gelei malla' mange ri parentana karaeng injo.

²⁴ Kanara katappakang, sungka'i tarunamo, Musa gelemu a'ra' riare' ana' ri ana' bahinena Firaun,

²⁵ kanara ia la'bi langai assinsara na marasai surangang umma' Allataala na sinampe' jua laakkasia' kasannangang battu rikadorakaang.

²⁶ Ia larapangi pattua-tuai kanara Almase assimpole kakalumannyangang nula'bi bakkakang na injo kakalumannyangang bakka' battu ri iangase'na pa'barang-baranganna tana Massere, saba' ia lapa'batu pikkiranna mange ripassahalang larie' injo sallo'.

²⁷ Kanara katappakang, ia labokoi tana Massere na gelemu malla' rikuku'na karaeng Firaun. Ia attahangi assimpole ia anjanjang apa nugele kajanjangang.

²⁸ Kanara katappakang, ia appa'rie' kalappasang na pambe'besang rara, solanna nuappakamate injo ana' lihua gele latabai.

²⁹ Kanara katappakang, iyai maeng a'limbang ri Tamparang Eja assimpole a'limbang ri tana a'mara, mingka tau Massere injo tallang ngase'i, rihattunna lasobai todo'.

³⁰ Kanara katappakang, sosaramu tembo'na Yerikho, sungka'i kota injo riinroi tujungallo sallona.

³¹ Kanara katappakang, Rahab, bahine bandarang injo, gelei minahang mate surangang sikuanna tau gele injo tunru', saba' ia latarima baji'i sikuanna tau rie' injo battu lanilingi.

³² Apa pole nuparallu lakupau? Saba' nakke lakapepakanga hattu, ampa a'ra' juapai kubisara passala'na Gideon, Barak, Simson, Yefta, Daud na Samuel na sikonjo nabbi,

³³ nukanara katappakang maeng ambetai risikonjo pakkaraengang, appalampai kanabaang, nguppai rinuritallikang injo, anjempangi baba masang,

³⁴ muno bola' api ammohong. Iyai maeng lappasa battu ri mata pa'dang, maeng nguppai kagassingang lalang rikalammaang, maeng a'jari gassingi lalang ripa'bundukang na lapibetai sikonjo pasukang tubattu-battu.

³⁵ Kanara katappakang, bahi'-bahine injo larumpa' ngase'i muliang sikuanna tau maeng matena, passabakang ripakaattallasa'na muliang. Tau maraeng injo lapassareangi kalenna risissa na gele a'ra' narima pallappasi, solanna iyai injo nguppai tallasa muliang nula'bi bajikang.

³⁶ Rie' pole turitua-tuai na turiba'bala, la'bipa pole risokke'i na ritarungku.

³⁷ Iyai ribunduki batu, rigara'gaji, rihuno surangang pa'dang; iyai injo pitilingka-lingkai mamo ammake pakeang kukkulu jimbala na kukkulu bembe na assinsara kalara', marasai na sissa.

³⁸ Lino inni gelei siratang ri iyai. Iyai injo pitilingka-lingkai ri parang luara na nai'i ri baho bonto, lalang ri liang na risa'la'-sa'la' batu.

³⁹ Mingka, iyai ngase' injo gelei nguppa apa nuritallikang injo, manna injo maeng risarei passa'bi nubaji' passala ri iyai kanara katappakang.

⁴⁰ Saba' Allataala maeng appakasadiamu se're nula'bi baji' mae ri ditte; ampa gele ditte, iyai gelei akkulle ambattu mange rikasangkakang.