IBRANI 10 - Kitta' Passitallikang Bau KAREBA BAJI'

Passidakka nusangka' injomo 10:1-18

¹ Lalang ri hukkung Tora' nurie' sangga nuta'bajang-bajang jua battu risikonjo passala nubaji' larie' injo sallo', na gelepa nusitoje'na. Kanara injo, hukkung Tora' gelei ma'ring lanyangkaki ri iyai turieki injo assambajang passabakang koro'bang assimpole, nuattaung-taung ripassidakkaang.

² Saba' ampa passala injo ma'ringi, gelejua tau inni gelemu parallu laassidakka koro'bang, saba' iyai tuanggeokang injo sambajang gelemu laisseki kalenna rikadorakaang inni sungka'i maemmo ritangkasi kadorakaanna pinsikali na situlusu'na?

³ Mingka koro'bang attaung-taung appakonjo injomo appiu'rangi ri tau inni parie'na juapa kadorakaang.

⁴ Saba' gelei ma'ring rara tedong pallaki iyareka rara bembe pallaki laallappasi kadorakaang.

⁵ Injomo saba'na, rihattunna Ia antama' mae ri lino, Ia lapaui, ”Koro'bang na passidakka Kau gelei mukaa'raki – mingka Kau appakasadia batangkale mae ri nakke.

⁶ Mange rikoro'bang tunuang na koro'bang pallu'lu' kadorakaang Kau gelei mungai.

⁷ Jari Nakke appau: Toje'i, Nakke rie' mae; lalang ri gulungang kitta' rie' ta'ukiri passala ri Nakke laanggeokang ria'ra'Mu, o AllataalaKu.”

⁸ Sumpae', Ia appau, ”Koro'bang na passidakka, koro'bang tunuang na koro'bang pallappasi kadorakaang Kau gelei mukaa'raki na Kau gelei mungai, manna injo ripassidakkaangi assituru' hukkung Tora'.”

⁹ Maeng injo pauNa, ”Sitoje'na, Nakke rie' mae laanggeokang ria'ra'Mu.” Numakase're injo Ia lalu'lu' laappaenteng numakarua.

¹⁰ Saba' a'ra'Na innimo ditte maeng ripakatangkasaki pinsikali na situlusu'na passabakang ripassidakkaang batangkalenna Isa Almase.

¹¹ Sitarrusu'na sikonjo imang allo-alloi lageokang panjampanginna na akkuling-kulingi laappassidakka koro'bang assimpole, nugele sikali akkulle allappasi kadorakaang.

¹² Mingka sungka'i maeng appassidakka se're koro'bang kanara kadorakaang, Almase attolongi risa'ri kanang Allataala situlusu'na.

¹³ Na konni-konnina Ia attajangi hattu risikonjo balinNa laa'jari pa'lisakang bangkenNa.

¹⁴ Saba' rise're jua koro'bang Ia maeng lapakasangka'i situlusu'na iyai turitangkasi injo.

¹⁵ Na Nyaha Tangkasa assare todo'i passa'bi mae ri ditte,

¹⁶ saba' rimaenna Ia appau: ”Innimo passitallikang nulaKubua' injo surangang iyai rimaennamo hattu injo,” appaui pole Karaeng Isa: ”Nakke lanaro hukkungKu rie'i lalang ri atinai na lariukirii lalang ri akkala pikkirannai,

¹⁷ na Nakke gelemo langu'rangi sikonjo kadorakaang na kasalaannai.”

¹⁸ Jari, ampa rikoro'bang injo rie' pangampungang risikonjo kadorakaang, gelemu parallu appassidakka koro'bang kanara kadorakaang.

Kasabbarang 10:19-39

¹⁹ Jari, Urang siana', konni-konnina ditte rassi kabaraniang akkulle antama' lalang ri tampa' tangkasa, passabakang rarana Isa,

²⁰ saba' Ia a'bua'mu pa'lalangang bau na nuattallasa mae ri ditte patteteang ri passimbangang. Iamo intu kalenNa to'jua,

²¹ na ditte ngampunnai se're Imang Bakka' nulapangisseki risikuanna Sapo Allataala.

²² Injomo saba'na, maeki mange ri Allataala surangang ati lambusu na katappakang jarre', kanara atita maeng ritangkasimu battu ri ati daa injo sipa'na na batangkalenta maeng ribissaimu surangang ere si'nong.

²³ Maemaki a'bitantang jarre' ripattajalliang nuriakui injo, saba' Ia, tuattalli' injo, mallangi.

²⁴ Maemaki assipariati solanna ditte assisokong laassikamaseang laanggeokang nubaji'.

²⁵ Andalalo ditte ripakadere kalenta ripasse're-se'reang passambajanganta, assimpole nubiasa injo lageokang lohe tau, mingka maemaki assipiu'rangi, saba' muisse'i ma'nassana hattunna Karaeng gelemu sallo nalarie'i.

²⁶ Saba' ampa maengmuki nguppa pangisse' risikuanna passala kanabaang battu ri Allataala, mingka riattu-attuang juapai anggeokang kadorakaang, gelemo rie' koro'bang laallappasi rikadorakaang injo.

²⁷ Sibale'na, nurie' iamo intu attajang ripangadelang nutide' injomo mangeang pappakamalla'na na api ammohong bola'na lalapakamutungi sikuanna tugele injo tunru'.

²⁸ Ampa rie' tau gele minahang ri hukkung Musa, ia rihukkung matei tide' pa'rikodongang assituru' ripassa'bina rua iyareka tallu tau sa'bi.

²⁹ Amu-amusai anteekamua bera'na hukkungang nuparallu ripitabaiang ri tau allisa'-lisa' injo ri Ana' Allataala na nalarapangi rammasa rara passitallikang nulapakatangkasa injo, na attua-tua ri Nyaha assare injo barakka'!

³⁰ Saba' ditte ri isse'i Ia tuappau injo, ”Pa'balasang injo dahuangKu. Nakkemo laa'boja pa'balasang.” Na rie' pole: ”Karaeng langadeli umma'Na.”

³¹ Sanna' toje' appakamalla'na', ampa a'dappe'ki antama' ri limanna Allataala attallasa injo.

³² Mingka u'rangilaloi rihattu riolo. Rihattu nguppamu sinara, akkulleiko attahang lalang ripakkaresoang terasa surang ri kasissaang.

³³ Rihattu injo ripaa'jariiko janja'-janjangiang surangang pattua-tuai na kasissaang, iyareka rihattummui todo' ngalle dahuang lalang rikasissaanna turibua' appakonjo injo.

³⁴ Kau maeng todo'ko minahang ngalle dahuang lalang rikasissaanna sikuanna tau ritarungku na rihattu pa'barang-barangammu rilukkaki, mutarima baji'i passala injo lalang rikate'neang, saba' kau muisse'i ma'nassana kau todo' ngampunnai pa'barang-barangang nula'bi baji' na nulatulusu rie'.

³⁵ Injomo saba'na, akolalo lappasangi katappakammu, saba' bakka'i passahalang attajang injo.

³⁶ Saba' kau parallu sabbara, solanna rimaemmumo anggeokang a'ra'na Allataala, nguppako apa nulatallikang injo,

³⁷ ”Saba' siso'di', la'bipa pole sanna' so'di'mamo hattu, na Ia tularie' injo, gelemu sallo narie'i na gelei laappasoho' hattu pariekanNa.

³⁸ Mingka TaungKu tuna'ba injo laattallasai rikatappakang, na ampa ia lapaboko kalenna, injo Nakke gelemo angngai mange ri ia.”

³⁹ Mingka ditte gelemo tau laa'boko na lamate, mingka tau tappa'mo na nguppa katallasang.