IBRANI 1 - Kitta' Passitallikang Bau KAREBA BAJI'

Allataala appau patteteang ri Ana'Na 1:1-4

¹ Ri jammang riolomo Allataala akkuling-kulingi na lalang rilohe rupanna bisara mange ri puwa-puwata patteteang risikonjo nabbi.

² Mingka rijammang kala'busang inni Ia a'bisarai mae ri ditte patteteang ri Ana'Na numaeng injo Ia latantuang laharisi risikuanna. Patteteang ri Isa Almase maeng appaa'jari risikuanna.

³ Isamo appatillo' ri sau kala'birang Allataala na ja'bangang parie'na Allataala nutoje' injo na lasalanggai sikuanna nurie' patteteang ripauNa nurassi kahasa. Sungka'i a'maemmo lageokang panangkasi kadorakaang, Ia attolommu risa'ri kananNa Tukaminang Bakka' injo, na ri tampa' kaminang la'biri,

⁴ sanna' la'birangi battu risikonjo malaeka' assimpole areng nuripassareang injo mange ri Isa sanna' la'biranna battu risikonjo areng malaeka'.

Ana' Allataala kaminang la'biri battu risikonjo malaeka' 1:5-14

⁵ Saba' Allataala gelei minang appau mange risikonjo malaeka', ”Kaumo Ana'Ku! Kau a'jari Ana'Ku allo inni? na Nakke laa'jari AmmanNa, na Ia laa'jari Ana'Ku?”

⁶ Rie' pole, rihattunna Ia laerang Ana' lihuaNa antama' mae ri lino inni, Ia appaui, ”Sikonjo malaeka' Allataala parallui nyomba ri Ia.”

⁷ Passala sikonjo malaeka' Ia appaui, ”Tulabua' injo sikuanna malaeka'Na a'jari anging ka'bu na sikonjo pajampanginNa a'jari bola' api.”

⁸ Ripassala Ana' maeng lapaui, ”O Allataala, Kadera kakaraengamMu, latuli rie' tarrusui na situlusu'na, na tukkang kakaraengamMu iamo intu tukkang kanabaang.

⁹ Kau angngai kaadelang na liking rikadorakaang; injomo saba'na Allataala, AllataalaMu maeng anrio songkabala ri Kau surangang minnya' assimpole tanra karannuang, nula'bi baji' battu risikonjo urang bahaamMu.”

¹⁰ Na: ”O Karaeng, ripakaramulana, Kaumo maeng appaa'jari possi'na lino, na langi' injo ta'ra pappaa'jarina limamMu.

¹¹ Sikuanna injo latide' ngase', mingka Kau latuli rie', na sikuanna injo laa'jari lambu-lambuang assimpole pakeang;

¹² na iyai injo Mubalu' ngase'i assimpole baju bakka', na assimpole pakeang iyai larituri baji'i, mingka Kau latuli gele minra, na sikonjo hattumMu tide' la'busu'na.”

¹³ Saba' Allataala gelei minang appau mange risikonjo malaeka' injo, ”Attolommoko risa'ri kanangKu, sa'genna sikonjo balimMu Kupaa'jari pa'lisakang bangkemMu?”

¹⁴ Gelejua iyai ngase' iamo sikonjo nyaha anjampangi, nurisuro laanjampangi ri iyai tuharisi injo kasalamakang.