GALATIA 6 - Kitta' Passitallikang Bau KAREBA BAJI'

Assisokongiko 6:1-10

¹ Urang siana', ampa injo rie' tau anggeokang nusala, injo kau turassi injo lalang ri Karaeng, parallu ngurang ri tau injo mange ripa'lalangang naba lalang ri nyaha baji', na mukatutui todo'i kalemmu, solanna andai lataba passo'ri.

² Assisokongiko langerang rierang bera'mu! Ri appakonjona kau minahang ri hukkung Almase.

³ Saba' ampa rie' se're tau larapang kalenna ma'nassana ia sanna' riparalluanna, padahala ia tide' jua matu-matunna, ia labura-burai kalenna.

⁴ Baji'mu sikuanna tau jama-jamaanna to'jua laparessa; jari ia akkullei a'bangga-bangga rilajanjanna tallasa kalenna na gele rilajanjanna tallasa'na tau maraeng.

⁵ Saba' sikuanna tau eranna to'jua lalasompo.

⁶ Jari sibaji'na ia, tunarima injo pangajara lalang ripauna Allataala, assare todo'i nubaji' rituassare injo pangajara ri kau.

⁷ Ako lingui! Allataala gele lapa'biang kalenNa rikare'-karenai. Saba' apa latahuru tau, injo to'jua laladuru.

⁸ Saba' inai appataharu lalang ria'ra' rupatau, ia laandurui kapanrakang battu ria'ra' rupatau, mingka inai appatahuru lalang ri Nyaha, ia laandurui tallasa mannannungang battu ri Nyaha injo.

⁹ Akolalo lanre a'geo' baji', saba' ampa larapi'mu hattunna, ditte laanduruki, ampa geleki a'jari lamma.

¹⁰ Injomo saba'na, ampa rie' juapa hattu, maemoko a'geo' baji'ko mange risikuanna tau, la'bipa pole mange risikonjo urang siana' julu katappakanta.

Pappiu'rangi na sallang pappikatu 6:11-18

¹¹ Pariatisai, anteekamua bakka'na hurupu' kuukiri inni mange ri kau surangang limangku to'jua.

¹² Iyai tukajanjangang kasara injo langai lapakabakka' kalenna, iyaimo apparri-parri lamassa-massa ri kau laassunna', pattujunna, solanna iyai injo andai ripa'ri'-pa'risi kanara salli'na Almase.

¹³ Saba' iyai tulasunnaki injo kalenna, gelei lapiara hukkung Tora'. Mingka iyai lakaa'raki, solanna musunna'i kalemmu, bisannabali iyai akkulle a'bakka' nyaha ritallasa kajanjangang injo.

¹⁴ Mingka nakke gele sikalia a'ra' a'bangga-bangga, rimaraenganna lalang risalli'na Karaengta Isa Almase, saba' rikanaranamo salli' injo lino inni maeng risalli' mae ri nakke na nakke mange ri lino inni.

¹⁵ Saba' assunna' iyareka gele asunna' tide'jua matu-matunna, mingka a'jari buakang bau, iamo injo rie' matu-matunna.

¹⁶ Mange risikuanna tau lapassareang injo kalenna rirurung riukkurang inni, naummu dame salehangang surang barakka' ri iyai na ri Israele anunna Allataala.

¹⁷ Sitarrusu'na andalalo rie' tau appakasusa ri nakke, saba' lalang ri tubuku inni rie'mo tanra-tanra anunna Almase.

¹⁸ Pangamaseanna Karaengta Isa Almase minahangi ri nyahamu, Urang siana'! Aming.