GALATIA 5 - Kitta' Passitallikang Bau KAREBA BAJI'

Kalaloasaanna Karisteng 5:1-15

¹ Solanna ditte laloasa toje'ki, Almase maeng lakapalaloasaki. Injomo saba'na, ammenteng ka'jangko na andamo pole rie' erang bera' pangatai.

² Sitoje'na, nakke, Paulus, appau mange ri kau: Ampa musunnaki kalemmu, injo Almase tide' jua matu-matunna ri kau.

³ Sikalipa pole kupaui mange risikuanna tau lasunna' injo kalenna ma'nassana ia parallui lageokang sikuanna assituru' hukkung Tora'.

⁴ Lappasako intu battu ri Almase, ampa tajalliko pappa'naba patteteang ri hukkung Tora'; tallasako pantaranna pangamaseang.

⁵ Saba' ri Nyaha, surang kanara katappakang, ditte attajang pappa'naba nuritajallii injo.

⁶ Saba' mange ri tau rie' injo lalang ri Isa Almase passala assunna' iyareka gele assunna' tide' jua battuanganna, sangga katappakang jua anjama rikanara pangamaseang.

⁷ Riolo a'lassi'-lassirangiko mange ri kabajikang. Inaimo appisangka ri kau, sa'genna gelei mupinahangi kanabaang injo?

⁸ Pakkeo' lagelemu minahang pole gelei nubattu ri Ia tuakkeo' injo ri kau.

⁹ Siso'di' bibi injo akkullemu appakaassoho iangase'na buakang kanre jaha.

¹⁰ Lalang ri Karaeng nakke jarre'a ri kau ma'nassana ri kau gele rie' pammentengang maraeng battu ri inni. Mingka appakaa'maling-maling injo ri kau lanarimai hukkungang, manna inai jua ia.

¹¹ Na nakke pole inni, Urang siana', ampa nakke appala'bang juapa sunna', ngura nakke ripa'ri-pa'risi todo'? Saba' ampa appakonjoi, salli' gelemo batu patatto'roang.

¹² Baji'mu iyai tuappakadaa injo ri kau, iyai tommo lahutoi kalenna!

¹³ Urang siana', toje'i kaui maeng rikeo' lalaloasa. Mingka andalalo kau pattuju kalaloasaang injo assimpole sa'la' hattu rikatallasang lalang rikadorakaang, mingka assijampangilaloko lalang ripangamaseang.

¹⁴ Saba' sikonjo assinna hukkung Tora' rie' ngase'i lalang rise're pau inni, iamo intu: ”Kamaseangi parammu rupatau assimpole mukamaseanna kalemmu!”

¹⁵ Mingka ampa kau assiota na assikanre, tutuilaloko, saba' laassipanrakiko intu.

Tallasa assituru' a'ra' rupatau iyareka Nyaha 5:16-26

¹⁶ Nukukuangang iamo intu: Tallasalaloko assituru' Nyaha, jari geleimoko minahang ria'ra'na rupatau inni.

¹⁷ Saba' a'ra'na rupatau inni assibaliangi a'ra'na Nyaha na a'ra'na Nyaha inni assibaliangi a'ra' ri rupatau – saba' ruaiya assibaliang – sa'genna kau tulusu gele anggeokang apa injo mukaa'raki.

¹⁸ Mingka, ampa mupassareangi kalemmu ri rurung ri Nyaha, injo kau gelemo tallasa ripappijo'jo' hukkung Tora'.

¹⁹ Panggeokang assituru' a'ra' rupatau inni, injo kajanjangammu, assimpole inni: kabalerang, karammasang, napasu daa,

²⁰ nyomba barahala, sehere, pa'beserang, passisala pahangang, iri ati, pakkukukang, sanging kalenna to'jua lapikkiri, passibe'bokang, passiboko-bokoiang,

²¹ siriati, a'huja-huja, pa'roa'-roakang na situlusu'na. Mange ri iangase'na injo nakke appaiu'rangi mange ri kau – assimpole numaeng kugeokang injo riolo – ma'nassana inai jua anggeokang ripassala appakonjo gelei nguppa dahuang lalang ri Pakaraengang Allataala.

²² Mingka hassele Nyaha iamo intu: Pangamaseang, karannuang, dame salehangang, kalammorang pa'mai', kabajikang, kamallangang,

²³ baji' ampe, panahangang a'ra'. Gelemo rie' hukkung labaliangi passala inni.

²⁴ Inai jua a'jari tappa' ri Isa Almase, ia maeng lasalli'mu a'ra' rupatauna surangang sikonjo napasu daa na sikonjo nulakaa'raki injo.

²⁵ Ampa ditte tallasa ri Nyaha, baji'mu tallasa'ta todo' rirurung ri Nyaha,

²⁶ na andalaloki sanna' a'boja kala'birang, andalaloki assibaliang surang siriati.