GALATIA 4 - Kitta' Passitallikang Bau KAREBA BAJI'

Gelemo larie' pangatai 4:1-11

¹ Nukukuangang injo iamo intu: Ampa se're tulaharisi gelepai taruna, manna siso'di' ia tide' passisalana surangang se're ata, sitoje'na iamo laampunnai battu riiangase'na,

² mingka ia ri allii juapai surang riparakai, sa'genna larapi' hattu numaeng ritantuang injo ri ammanna.

³ Appakonjo todo'i ditte: Ampa gelepaki taruna, injo ditte tunru' todo'ki mange risikonjo nyaha ri lino inni.

⁴ Mingka sungka'i ganna'mu hattunna, injo Allataala lasuro Ana'Na turianakang injo battu rise're bahine na tunru'i mange ri hukkung Tora'.

⁵ Ia ri suroi laallappasi ri iyai tutunru' injo mange ri hukkung Tora', solanna ditte ritarima a'jari ana'.

⁶ Saba' kaumo ana', jari Allatala maeng assuroi ri Nyaha Ana'Na antama' lalang ri atita, nua'nga'ngara injo, ”O Abba, o Amma!”

⁷ Jari, kau gelemo ata, mingka ana'; ampa kau ana', injo kau todo'mo tulaharisi, ripanggeokang Allataala.

⁸ Riolo, rihattummu juapa gele muisseki Allataala, mubua'i ata kalemmu mange risikonjo somba-sombaang nusitoje'na gele Allataala.

⁹ Mingka konni-konnina sungka'na muissekimo Allataala, iyareka nula'bi baji', sungka'na kau riisse' ri Allataala, anteekamua lamuliang pole mange ri somba-sombaang ri lino nulamma surang nukaasi-asi na a'ra'i pole mubua' ata kalemmu mange ri iyai?

¹⁰ Tuisiko marakai allo attantu, bulang, hattu-hattu attantu surang taung.

¹¹ Nakke bataa barangsikali karesoku ri kaui tide' jua matu-matunna.

U'rangi passisambunganta ripakaramulana 4:12-20

¹² Kuerai mange ri kau, Urang siana', a'jariko assimpole nakke, saba' manna nakke maeng a'jari assimpole kau. Gelepai minang kulaloi se're nugele baji' battu ri kau.

¹³ Muissekii ma'nassana rihattu bungasa'ku appala'bang Injili mange ri kau kanara garringku.

¹⁴ Manna appakonjoi, garring ri batangkalengku injo, assimpolei se're passo'ri mange ri kau, gelei murapang se're nurammasa surang appakaliking. Mingka nakke maeng mutarima, assimpole tunarima malaeka' Allataala, la'bipa pole assimpole tunarimamo Isa Almase.

¹⁵ Anteekamua rannumu rihattu injo! Mingka konni-konnina, ri anteemu mae injo karannuammu? Saba' nakke akkullea assa'bi passala ri kau ma'nassana so'di injo ma'ringi, rihattu injo manna matammu a'ra'i musu'bi' na mupassareangi mae ri nakke.

¹⁶ Ngura appauku jua kanabaang mange ri kau nakke a'ra' mubaliang?

¹⁷ Iyai injo sarro papparri-parrina laa'beso' ri kaui, mingka gele lambusu atina, saba' iyai injo a'ra'ki lapassisa'lakang, solanna tuli minahangiko ri iyai.

¹⁸ Toje'i baji' ampa tau inni a'hattu-hattui gassing akkareso lalang ripassala nubaji', gele sangga ampa rie'ku jua ritangnga-tangngamu.

¹⁹ Oe ana'-ana'ku, kanara kaumo nakke assinsara assimpole pa'risi pamana', sa'genna tappaNa Almase a'rupai ri kau.

²⁰ Anteekamua pa'bojaku larie' ritangnga-tangngamu hattu inni na akkullea a'bisara surangang sa'ra maraeng, saba' la'busumu akkala'ku mange ri kau.

Hagar na Sara 4:21-31

²¹ Paulaloi mae ri nakke, oe kau tua'ra' intu tallasa ripappijo'jo' hukkung Tora', geleika mupilangngeri hukkung Tora'?

²² Gelejua rie' ta'ukiri ma'nassana Abraham rie' rua ana'na, se're battu ri bahine tua'jari ata injo ri ia na se're battu ri bahine laloasa injo ri ia?

²³ Mingka ana' battu ri bahine ata injo rianakangi samara, na ana' battu ri bahine laloasa injo rianakangi saba' sapatta.

²⁴ Inni se'rei pakkalebarang. Saba' ri bahine rua injo rie' rua katantuanna Allataala: Se're tau assala'na battu ri Bonto Sinai na mana'i ana'-ana' ata, iamo intu Hagar –

²⁵ Hagar iamo Bonto Sinai ri tana Arab – na ia assimpole Yerusalem hattu inni, saba' ia tallasai lalang pangatai surang ana'-ana'na.

²⁶ Mingka Yerusalem suruga iamo intu bahine laloasa injo na iamo idonta.

²⁷ Saba' rie' ta'ukiri: ”Sunggulaloko, oe tau tamanang tugele intu minang mana'! A'rannu-rannu surang atte'ne-te'nelaloko, oe kau tugele intu minang assinsara pa'risi pamana'! Saba' ribokoi ri bura'nenna languppa siloheang ana' battu riturieki injo bura'nenna.”

²⁸ Na kau, Urang siana', assimpole Ishak, kaumo ana'-ana' sapatta.

²⁹ Mingka anteekamua riolo, ia turianakang samara jua, nyissa-nyissa turianakang ri Nyaha, appakonjo todo'i rihattu inni.

³⁰ Mingka apa pauna Kitta' Tangkasa inni? ”Bongkai ata bahine intu surang ana'na, saba' ana'na ata bahine intu gelei laa'jari tulaharisi assurangang ana' bahine laloasa intu.”

³¹ Injomo saba'na, urang siana' ditte gelemo ana'-ana' ri bahine ata, mingka ana'-ana' ri bahine laloasa.