GALATIA 3 - Kitta' Passitallikang Bau KAREBA BAJI'

Ripa'naba kanara tappa' 3:1-14

¹ Oe tau Galatia ba'ga intu, inaimo maeng appakakaballokang ri kau? Gelejua Isa Almase turisalli' injo maeng risesei baji'mu ri a'rakammui?

² Sangga inni jua a'ra' kuisse' battu ri kaui: Apa maengiko nguppa Nyaha kanara anggeokammu hukkung Tora' iyareka rikanara tappa' mange ripappala'bangang Injili?

³ Ngura kau ba'ga appakonjo? Kau maemmu mupakaramula lalang rikagassingang Nyaha, apa konni-konnina a'rakiko mupa'maengi lalang rikagassingang rupatau?

⁴ Tide' juaka matu-matunna sikuanna numaeng muuppa nusanna' injo lohena? Ngura latide' matu-matunna!

⁵ Jari, anteekamua konni-konnina, apa Ia tuassare injo Nyaha mange ri kaui surangang lohena na anggeokang kajariang nugele samara ritangnga-tangngamu, anggeokang appakonjo kanara kau anggeokang hukkung Tora' iyareka kanara kau tappa' mange ripappala'bangang Injili?

⁶ Rita'ra appakonjo todo' Abraham tappa' mange ri Allataala, jari Allataala larekengi passala injo mange ri ia assimpole se're kanabaaang.

⁷ Jari, mujanjangimu ma'nassana iyai tuattallasa injo assituru' katappakang, iyaimo injo ana'-ana' ri Abraham.

⁸ Na Kitta' Tangkasa, nuriolonganna laisse'i ma'nassana Allataala lapana'bai tau gele injo Yahudi assituru' katappakang, maeng la'bi riolomo appala'bang Injili mange ri Abraham: ”Patteteang rikaumo iangase'na bangsa laribarakkaki.”

⁹ Jari, iyai tuattallasa injo battu rikatappakang, iyaimo ribarakkaki assurang-surang Abraham tutappa' injo.

¹⁰ Saba' sikuanna tau, tuattallasa battu rianggeokang hukkung Tora', rie'i rahangang pattadea. Saba' rie' ta'ukiri: ”Laallelalo pua tau gele injo mallang anggeokang sikuanna nuta'ukiri lalang ri kitta' hukkung Tora'.”

¹¹ Injo pole maeng risinarimu, tide' tau ripa'naba ri a'rakanna Allataala kanara anggeokanna jua hukkung Tora', saba': ”Tau naba inni tallasai ri katappakang.”

¹² Mingka poonna hukkung Tora' gele katappakang, mingka inai lageokangi, laattallasai kanara ia.

¹³ Almase maeng lapakalappasiko battu ripattadeana hukkung Tora' saba' iamo a'jari pattadea mae ri ditte, saba' rie' ta'ukiri: ”Laallelalo pua tau rigojeng injo ri kaju salli'!”

¹⁴ Isa Almase maemmu lageokang passala inni, solanna lalang ri Ia barakka' ri Abraham ambattui mange ri tau maraeng, jari patteteang rikatappakang ditte narimaki Nyaha numaeng risapattaang injo.

Hukkung Tora' iyareka sapattana Allataala 3:15-29

¹⁵ Urang siana', baji'mu kupakei se're pakkalebarang battu ritallasa allo-allo. Se're kaharisang numaeng riassaang, manna injo ribua'i ri rupatau, gelei akkulle ribute iyareka ritambai manna pole ri inai tau.

¹⁶ Rie'mo sikonjo sapatta ripau mange ri Abraham surang mange ripa'bija-bijaanna. Gelei ripau ”mange risikonjo tuina assimpolekalena” nurikuangang injo mange rilohe tau, mingka sangga mange jua ri se're tau: ”na mange rituimu”, iamo intu Almase.

¹⁷ Nukukuangang iamo intu: Sapatta nuriolomo maeng riassaang ri Allataala, gelei akkulle ribute ri hukkung Tora', nuampa rie' patambilangang tallumpulo taung ribokoanganna mae, jari sapatta injo tide' kagasinganna.

¹⁸ Saba', ampa nuritantuang injo ri Allataala assala'na nubattu ri hukkung Tora', injo gelemo nubattu risapatta; mingka nuassituru' sapattamo Allataala maeng assare barakka' pangamaseanNa mange ri Abraham.

¹⁹ Ampa appakonjoi, apamo battuanna hukkung Tora' injo? Hukkung injo ritambai kanara sikonjo kasalaang – sa'genna ambattu tuina nurikuangang lalang ri sapatta injo – na ripala'bangi patteteang risikonjo malaeka' antama' ri limanna se're tau laa'jari passisambungang.

²⁰ Se're injo tau passisambungang gele sangga se're jua tau lasambei, na Allataala se're jua.

²¹ Ampa appakonjoi, assisalaika hukkung Tora' risikonjo sapattana Allataala? Gelei appakonjo. Saba' so'di injo hukkung tora risareangi assimpole se're nuakkulle appakaattallasa, injo toje'i nabana assala'na nubattu ri hukkung Tora'.

²² Mingka Kitta' Tangkasa maeng lagurungi sikuanna lalang rikahasa kadorakaang, solanna assituru' katappakang lalang ri Isa Almase sapatta injo risareangi mange ri iyai tutappa' injo.

²³ Rigelenapa rie' katappakang injo ditte rie'ki rirahangang parentana hukkung Tora', na lagurungki sa'genna katappakang injo maeng ripappisa'biang.

²⁴ Jari, hukkung Tora' iamo pappijo'jo' mae ri ditte sa'genna rie' Almase, solanna ditte ripa'naba kanara katappakang.

²⁵ Konni-konnina rie'mu katappakang injo, injomo saba'na ditte gelemuki lakahasai ripappijo'jo'na hukkung injo.

²⁶ Saba' kau ngase' intu ana'-ana'na Allataala patteteang katappakang lalang ri Isa Almase.

²⁷ Saba' kau ngase', turirio intu lalang ri Almase, maeng ta'runrummu Almase ri kalemmu.

²⁸ Lalang ri passala inni, gelemo rie' tau Yahudi iyareka tau Yunani, gelemo rie' ata iyareka tau laloasa, gelemo rie' bura'ne iyareka bahine, saba' kau ngase' intu se're lalang ri Isa Almase.

²⁹ Rie' pole, ampa kau intu anunna Almase, injo kau todo' intu pa'bija-bijaang ri Abraham na tulaharisi assituru' talli' ri Allataala.