GALATIA 1 - Kitta' Passitallikang Bau KAREBA BAJI'

Barasallang 1:1-5

¹ Battu ri Paulus, tua'jari suro, gele rikanara rupatau, nagele todo' rise're rupatau, passangadinna rikanara Isa Almase na Allataala, Amma, tumaeng injo appakaattallasa ri Ia battu ritangnga-tangngana tau mate,

² na battu risikonjo urang siana' julu katappakang rie' injo assurang-surang nakke. Mange risikonjo jamaah rie' ri Galatia:

³ Barakka' minahang ri kau na dame salehangang battu ri Allataala, Ammanta, surang battu ri Karaeng Isa Almase,

⁴ tumaeng injo lapassareang kalenNa kanara kadorakaanta, lallappasi ri ditte battu ri lino daa inni sipa'na rikonni-konnina, assituru' a'ra'na Allataala na Ammanta.

⁵ Mange ri Iamo kala'birang situlusu'na! Aming.

Se're jua Injili 1:6-10

⁶ Rie'a lannasa ma'nassana kau ngura nalassiri konjoko a'giling battu ri Ia nulalang ripangamaseanna Almase maeng akkeo' ri kau, na minahang rise're Injili maraeng,

⁷ nusitoje'na gele Injili. Mingka rie'na jua tau a'ra'ko lapakabata-bata na pattujunna laambale'-bale' Injili'na Almase.

⁸ Mingka manna injo kambe iyareka rie' se're malaeka' battu ri suruga appabattu mange ri kau se're Injili nuassisala Injili numaeng tapappiissekang injo mange ri kau, ia injo laallelalo pua.

⁹ Assimpole numaeng injo tapau riolo, konni-konnina kupaui pole: Ampa rie' tau appala'bang mange ri kau se're Injili, nuassisala surangang apa numaeng injo mutarima, laallelalo pua.

¹⁰ Jari anteekamua konni-konnina: Apa karannuang ri rupatau kuboja iyareka karannuang ri Allataala? Iyareka laappakasannang rupatau kuparri-parri? So'di injo nakke a'ra' juapa laapparri-parri appakasannang rupatau, injo nakke gelemo ata ri Almase.

Anteekamua Paulus a'jari suro 1:11-24

¹¹ Saba' nakke appau terasa mange ri kau, Urang siana' ma'nassana Injili nukupala'bang injo gele Injili nuassala'na battu ri rupatau.

¹² Saba' nakke gelei kutarima battu ri rupatau na gele todo' rupatau ngajara mae ri nakke, mingka kutarimai patteteang ri passa'bina Isa Almase.

¹³ Saba' kau maemmu mulangngere passala tallasa'ku riolo rihattungku juapa minahang ri agama Yahudi: Tide'mo pamangeanna nakke nyissa jamaah Allataala na kuparri-parri lakupakatide' ngaseki.

¹⁴ Lalang ri agama Yahudi pole nakke kaminang sara'de' battu risikonjo urang pangka'-pangka' ri bangsaku, assimpole tau sukku' lapiarana kabiasaang puwa-puwaku.

¹⁵ Mingka rihattunna Allataala, maeng lapile kalengku minang ri pomponna idongku surang lakeo'a rikanara pangamaseanNa,

¹⁶ A'ra'i lapappisa'biang Ana'Na lalang ri nakke, solanna Ia kupala'bang mange risikuanna tau maraeng gele injo Yahudi, manna siso'di' hattu gelejua ngera tangara battu ri rupatau.

¹⁷ Nakke gele to'jua mange ri Yerusalem laappiuppai ri iyai tula'bi rioloang injomo ri nakke a'jari suro, mingka nakke a'lampaa mange ri tana Arab na battu ri injo mulianga mange ri Damsyik.

¹⁸ Jari, talluntaung sallona maenna injo, nakke a'lampaa mange ri Yerusalem kuurangi assijanjang Kefas, na nakke amminsambo sampulo limangallo ri saponna.

¹⁹ Mingka nakke gelea anjanjang manna se're tau battu risikonjo suro maraeng, maraenganna Yakobus, uranna siana' Karaeng Isa.

²⁰ Ri a'rakanna Allataala kupau terasai: Apa kuukiri mange ri kau inni toje'i, nakke gelea a'bura-bura.

²¹ Maeng injo nakke a'lampaa mange ri tana Siria surang ri Kilikia.

²² Mingka nakke tulusu gele laisse' latanrai ri jamaah Almase rie' injo ri Yudea.

²³ Iyai sangga maenginna jua lalangngere ma'nassana ia riolo nyissa ri iyai, konni-konnina appala'bangi katappakang numaeng injo a'ra' lapakatide'.

²⁴ Jari iyai appakala'biri Allataala kanara ri nakke.