FILIPI 4 - Kitta' Passitallikang Bau KAREBA BAJI'

¹ Injomo saba'na, Urang siana' mala'biri'ku ngase' surang sanna' injo kubojainna, karannuangku surang songko' kakaraengangku, ammenteng jarre'ko lalang ri Allataala, oe urang siana' mala'biri'ku!

Pappiu'rangi kala'busang 4:2-9

² Euodia kupiu'rangi surang Sintikhe kupiu'rangi, solanna a'julu ati surang pikkirang lalang ri Karaeng.

³ La'bipa pole, kuera todo'i ri kau, Sunsugos, urang mallangku: Tulungilalo bahine rua injo. Kanara iyai injo maemmu anjama terasa surangang nakke lalang ripappala'bangang Injili, assurang-surangi Klemens na baha'-bahaang sipanjamaangku tumaraeng injo, turie' injo ngase' ta'ukiri lalang ri kitta' katallasang.

⁴ Sanging a'rannu-rannuilaloko lalang ri Karaeng! Sikalipa pole kupau: A'rannu-rannuilaloko!

⁵ Parallui kabajikanna atimu laisse'i sikuanna tau. Seppa'mu Karaeng!

⁶ Sibaji'na akolalo bata-bata risikuanna passala, mingka pappisa'bianglaloi lalang risikuanna passala sikonjo numukaa'raki mange ri Allataala lalang ridowaang surang pangera lalang rikasukkurang.

⁷ Dame salehangang ri Allataala, nugele injo laalle naha-naha, lakalahaki atimu surang pikkirammu lalang ri Isa Almase.

⁸ Jari, kala'busanna, Urang siana', sikonjo nunaba, sikonjo nutangkasa, sikonjo nutanning, sikonjo nubaji' rilangngere, sikonjo nuriare' kabajikang surang nusiratang ripakabakka, pikkirilaloi iangase'na injo.

⁹ Apa numaeng mupappilajari surang apa numaeng mutarima, na apa numaeng mujanjang ri nakke, geokanglaloi injo. Ri appakonjona, Allataala poong dame salehangang laminahang ri kau.

Appanai' sukkuru ripassarena jamaah 4:10-20

¹⁰ Sukku'i rannuku lalang ri Karaeng saba' rikala'busanna pikkirammu surang sumanga'mu attimbo muliang mae ri nakke. Toje'i sanging rie' pappariatimu, mingka gele rie' sa'la' hattu lamange ri kaui.

¹¹ Kupaui inni gele ripassabakang kakurangang, saba' nakke maeng appilajarama laappakaganna' lalang risikonjo katallasang.

¹² Baji' kuisse'na apa injo kakurangang surang baji' todo' kuisse'na apa injo kala'bi-la'biang. Lalang risikonjo katallasang surang lalang risikonjo passala gele rie' manna se're nua'jari harasia mae ri nakke; baji' injo lalang rihattu bassoro, iyareka lalang rihattu pa're, baji' lalang rihattu kala'bi-la'biang iyareka lalang rihattu kakurangang.

¹³ Sikonjo passala akkulle kuerang lalang ri Ia tuassare injo kagassingang mae ri nakke.

¹⁴ Mingka baji' todo'i panggeokammu ma'nassana maemmoko ngalle dahuang lalang rikasinsaraangku.

¹⁵ Kau muisse' todo'i, oe tau Filipi; rihattunngku appakaramula appala'bang Injili, rihattungku a'lampa battu ri Makedonia, rimaraenganna kau gele rie' manna se're jamaah assare sokongang mae ri nakke lalang ripassala passare surang panarimaang.

¹⁶ Saba' manna ri Tesalonika kau rie'moko pinruang pintallung appikatu sokongang mae ri nakke.

¹⁷ Mingka gele passare injo kuboja, passangadinna hassele'na, nupela' appakalohe injo ripassahalaammu.

¹⁸ Hattu inni maeng ngase'mu kutarima nuparallu battu injo ri kau, la'bipa pole battu ri injo. Nakke kala'bi-la'biang, saba' maeng kutarima pappikatumu battu ri Epafroditus, se're passidakka nuhondu rasanna, se're koro'bang nuringai surang nubaji' mange ri Allataala.

¹⁹ Allataalaku lalasangkaki sikuanna kaparalluammu assituru' kalammorang na kala'biran-Na lalang ri Isa Almase.

²⁰ Ripakala'birilalo Allataala na Ammanta situlusu'na! Aming.

Sallang Pappikatu 4:21-23

²¹ Pabattulaloi sallangku mange risikuanna tau tappa' lalang ri Isa Almase. Sallang mange ri kaui battu risikonjo urang siana' julu katappakang tuassurang-surang injo nakke.

²² Sallang mange ri kaui battu risikuanna tau tappa', la'bipa pole battu ri iyai turie' injo ripammarianna Kaisar.

²³ Barakka' Karaeng Isa Almase lapinahangi nyahamu!