FILIPI 2 - Kitta' Passitallikang Bau KAREBA BAJI'

Pappiu'rangi solanna laasse're surang appakatuna ati assimpole Almase 2:1-11

¹ Jari, kanara lalang ri Almase rie' pappakajarre', rie' panyihi-nyihi battu ripangamaseang, rie' passamaturukang battu ri Nyaha, rie' passikamaseangang na rie' pa'rikodongang,

² jari pisangkakilalo karannuangku lalang ri inni: Paralluilaloko a'julu ati surang pikkirang, lalang rise're pangamaseang, a'julu nyaha, se're oloang,

³ gele a'boja kaparalluang kale-kale iyareka a'boja a'ra' riare' nutide' matu-matunna. Sibale'na paralluiko lalang rikatunaang ati na se're tau larapangi tau maraeng injo la'bi paralluang battu ri kalenna;

⁴ na andalalo sikuanna tau lapariati kaparalluang tujukalenna to'jua, mingka kaparalluanna todo' tau maraeng.

⁵ Sibaji'na assamaturukiko lalang ritallasa'mu, annanro pikkirang surang nyaha baji' nurie' injo todo' lalang ri Isa Almase,

⁶ numanna lalang ritappa' Allataala, gelei larapang assimpole anunna nuparallu lateteng jarre',

⁷ mingka maeng lapasulu'mu kalen-Na, na ngallei tappa ata, na a'jarii assimpole rupatau.

⁸ Na riassimpolena rupatau, Ia maeng lapakatunamu kalen-Na na tunru'i sa'genna mate, la'bipa pole sa'genna mate ri kaju salli'.

⁹ Iamo injo saba'na Allataala sukku' appakalangkasa'na ri Ia na lapassareangi kahasa mange ri Ia nula'bi battu risikuanna kahasa,

¹⁰ solanna passabakang kahasana Isa injo akkolantu' ngase'i sikonjo nurie' ribahonna lino surang nurie' injo rahangang lino,

¹¹ na sikonjo baba laakui, ”Isa Almasemo Karaeng,” ri appakonjona ripakala'biri Allataala, Amma!

Tulusu geokangi a'ra'na Allataala 2:12-18

¹² Urang siana' mala'biri'ku ngase', tulusu tunrukiko; injomo saba'na tulusu geokangi a'ra'na Allataala surangang malla' na bentere, gele sangga ririe'ku jua, mingka la'bipa pole rihattu tide'ku,

¹³ nasaba' Allataalamo lajamai lalang ri kau baji' kaa'rakang iyareka jama-jamaang assituru' karellanNa.

¹⁴ Geokangilaloi sikuanna gele lalang rihusa-husa surang ripassigagaang,

¹⁵ solanna anda rie' salibanramu na gele rie' daana, anteekamua a'jari ana'-ana' Allataala nutide' sallaanna ritangnga-tangngana tau konni-konni daa injo sipa'na atina surang lingui inni, sa'genna kau a'caya ritangnga-tangnganai assimpole bintoeng rate ri langi',

¹⁶ na a'bitantang ripauna Allataala nuassare injo katallasang, bisannabali akkullea a'bakka' sumanga' rihattu rie'na Almase ma'nassana rie' jua matu-matungku a'lomba surang rie' jua matu-matungku akkareso.

¹⁷ Mingka manna injo raraku rito'lokang asimpole koro'bang mange ri Allataala lalang sambajang laappakajarre' katappakammu, nakke a'rannu-rannua na karanuangku injo assurangang kau ngase.

¹⁸ Na kau todo' parallu a'rannu-rannu appakonjo na arannu-rannuilaloko surangang nakke.

Timotius na Epafroditus 2:19–3:1a

¹⁹ Mingka lalang ri Karaeng Isa kutajallii lalassiri assuro ri Timotius mange ri kaui, solanna sannang todo'i atiku, kanara kareba passala ri kau.

²⁰ Saba' gelemo rie' manna se're tau ri nakke a'julu ati surang pikkirang ri nakke na toje'i lapariatina kaparalluammu;

²¹ saba' sanging kaparalluannai to'jua laboja, gelemo kaparalluang ri Isa Almase.

²² Muissekimu ma'nassana kamallanganna maemmu tasso'ri na ma'nassana ia maemmu assare pattulung mae ri nakke lalang ri panjampangiang Injili assimpole se're ana' assare pattulung mange ri ammanna.

²³ Iamo kutajallii lakusuro lassiri, ampa baji'mu pa'nassana anteekamua palakaraku;

²⁴ mingka lalang ri Karaeng nakke tappa'a ma'nassana manna nakke lalassiri rie' mange ri kaui.

²⁵ Na kurapang parallu todo'i pole kusuro Epafroditus mange ri kaui, iamo intu urang siana' katappakangku na urang sipanjamaang surang urangku sipa'lingkaang tau musuro injo laanjampangi ri nakke lalang risikuanna kaparalluangku.

²⁶ Saba' ia sanna' pa'bojainna mange ri kau' surang balisai atina, saba' mulangngerei ma'nassana garringi.

²⁷ Naba toje'i ia garringi na so'di' mamo matei, mingka Allataala ngamaseang ri ia, na gele sangga ia jua, mingka nakke todo', solanna kapa'risangku andai attamba lohe.

²⁸ Iamo injo saba'na nakke la'bi lassiri assuro ri ia, solanna ampa kau anjanjang ri ia, akkulleiko a'rannu-rannu muliang na gelemo lohe kapa'risangku.

²⁹ Jari, tarimalaloi lalang ri Karaeng surang sikonjo karannuang na ngalilaloko mange ri tau assimpole ia.

³⁰ Saba' ia so'dippa matei rikanara panjamana lapa'bisonaang nyahana mange ri Allataala lanyangkaki apa nugele injopa sangka' lalang ripanjampangimmu mae ri nakke.