FILIPI 1 - Kitta' Passitallikang Bau KAREBA BAJI'

Barasallang 1:1-2

¹ Battu ri Paulus surang ri Timotius, suro-suro ri Isa Almase. Mange risikuanna tau tappa' ri Isa Almase rie' ri Filipi, surang sikonjo panatua na diakeng.

² Pangamaseang surang dame salehangang battu ri Allataala, Ammanta, na battu ri Karaeng Isa Almase minahang ri kau.

Sukkuru surang dowaang 1:3-11

³ Appanai'a sukkuru mange ri Allataalaku ampa ngu'rangia ri kau.

⁴ Na ampa kupangera dowaang ngase'ko, nakke sanging ngera dowaang lalang rikarannuang.

⁵ Nakke appanai' sukkuru ri Allataalaku kanara passamaturukammu assare sokongang mae ri nakke lalang ri Kareba Injili minang riolo sa'genna rikonni-konnina.

⁶ Lalang ripassala inni nakke sukku' jarre', iamo intu Ia, tau appakaramula injo rijama-jamaang nubaji' ritangnga-tangngamu, lalapakatulusui sa'genna kala'busang rihattu larapi'na allonna Isa Almase.

⁷ Toje' siratammu nakke appikkiri appakonjo passala ri kau ngase', saba' kau ngase' rie' lalang ri atiku, rikanara minahangimmu nguppa dahuang lalang ripangamaseang nuripassareang injo mae ri nakke, baji' rihattungku rie' ri pattarungkuang, iyareka rihattungku assa'bi surang appakajarre' Kareba Injili.

⁸ Saba' Allataalamo a'jari sa'biku anteekamua nakke sukku' pa'bojaingku mange ri kau ngase' kanara ripangamaseang nubattu ri Isa Almase.

⁹ Na innimo pangera dowaangku, bisannabali pela' lohe pangamaseammu lalang ripappahang nunaba na lalang risikonjo rupanna pangisse',

¹⁰ sa'genna akkulle'moko mile apa nubaji', solanna tangkasiko surang tide' daana rilarie'namo hattunna Almase,

¹¹ rassi panggeokang assimpole nulajama injo Isa Almase laappakala'biri surang appakabakka' ri Allataala.

Passa'bina Paulus rihattunna ritarungku 1:12-26

¹² Kukaa'raki, urang siana', solanna muisseki ma'nassana apa nua'jari mae ri nakke injo maeng a'jari passabakang rialla'banna Injili,

¹³ sa'genna baji'mu kaissekanna mange ripammariang karaeng surang risikuanna tau maraeng ma'nassana nakke ritarungku kanara Almase.

¹⁴ Rie' pole, siloheang urang siana' lalang ri Karaeng maeng nguppamu kajarrekang kanara ripaantama'ku ri pattarungkuang jari pela' baranii appau-pau passala pauna Allataala na gelemo rie' malla'na.

¹⁵ Rie' tau appala'bang Almase passabakang ri iri ati surang pa'beserang, mingka rie' todo' tuappala'bang Almase rinubaji'.

¹⁶ Iyai inni appala'bangi Almase kanara pangamaseang, saba' iyai injo laisse'i ma'nassana nakke rie' ri inni laappakabakka' Injili,

¹⁷ mingka tumaraeng injo appala'bang Almase kanara kaparalluanna to'jua na nujekkong atina, pa'ngare'nai ri appakonjona laappakasissa ri nakke lalang ri pattarungkuang.

¹⁸ Mingka gelei ngura, saba' manna anteekamua, Almase ripappiissekang, baji' injo ripattujuang daa iyareka ripattujuang lambusu. Lalang ripassala injo nakke rie'a rannu.

¹⁹ Saba' kuisse'i ma'nassana rikala'busanna inni iamo intu ripakalappasa battu ri pattarungkuang kanara ripangera dowaammu surang pattulungang ri Nyahana Isa Almase.

²⁰ Saba' nusukku' kubojainna surang kutajallianna iamo intu manassana nakke lalang risikuanna passala gelea nguppa kasirikang, mingka assimpole riolo appakonjo todo'i konni-konnina, Almase baji' kaissekanna ripakala'biri ri batangkalengku, baji' ri tallasa'ku, iyareka ri mateku.

²¹ Saba' ri nakke tallasa iamo intu Almase na mate injo passahalang.

²² Mingka ampa parallu juapaa laattallasa ri lino inni, injo a'battuangi ri nakke anjama laassare hassele. Jari anteeang parallu kupile, injo nakke gelei kuisse'.

²³ Nakke ripapilea battu ri rua passala: Nakke a'ra'a a'lampa na ammari assurangang Almase – injo toje'i la'bi baji' ri nakke;

²⁴ mingka la'bi baji'i pole ammari ri lino inni kanara kau.

²⁵ Lalang rikajarrekang kuisse'i passala inni: Nakke laammari juapa na laassurang-surang ngase' juapaki solanna kau pela' gassing na a'rannu-rannu lalang rikatappakang,

²⁶ sa'genna pa'bangga-banggaammu lalang ri Isa Almase pela' attamba lohei kanara nakke, ampa nakke muliang mange ri kaui.

Pappiu'rangi solanna tulusu apparri-parri 1:27-30

²⁷ Nuparallu tallasa'mu assituru'i surangang Injili Almase, solanna, ampa nakke rie' anjanjang ri kau, na ampa nakke gelea rie' injo kulangngerei ma'nassana kau jarre' ammenteng lalang ripassituru'-turukang laapparri-parri assirutu' rikatappakang nubattu injo ri Injili.

²⁸ gele ripakabentere manna siso'di' battu ribalimmu. Mange ri iyai ngase' injo se'rei tanra kapanrakang, mingka mange ri kau tanra kasalamakang, na assala'na nubattu ri Allataala.

²⁹ Saba' mange ri kau ripassareangi gele sangga latappa' jua mange ri Almase, mingka laassinsara todo rikanara Ia.

³⁰ Riappakonjona minahangi todo'ko rikaposoang naha-naha assimpole riolo mujanjangimu ri nakke, na konni-konnina mulangngerimu passala ri nakke.