FILEMON 1 - Kitta' Passitallikang Bau KAREBA BAJI'

Barasallang 1-3

¹ Battu ri Paulus, se're turitarungku kanara ri Isa Almase na battu ri Timotius urang siana' julu katappakanta. Mange ri Filemon tukukamaseang, urang sipanjamaamba

² surang mange ri Apfia urang siana' bahineta na mange ri Arkhipus, urang sipakkaresoanta na mange ri jamaah ri sapommu:

³ Barakka' pangamaseang surang dame salehangang battu ri Allataala, Ammanta na battu ri Karaeng Isa minahang ri kau.

Appanai' sukkuru 4-7

⁴ Nakke appanai'a sukkuru ri Allataalaku, ampa kuu'rangiko lalang ripangera dowaangku,

⁵ saba' kulangngerei passala pangamaseammu mange risikuanna tau tappa' na passala katappakammu ri Karaeng Isa.

⁶ Nakke ngera dowaanga, solanna passe're-se'reammu lalang rikatappakang rie' pangisse' risikonjo nubaji' ritangnga-tangngata tujunna Almase.

⁷ Battu ripangamaseammu kuuppai karannuang bakka' surang katerasang nyaha, saba' atina tau tappa' injo maengi musihi-sihi, Urang siana'ku.

Pangerana Paulus mange ri Filemon ripassala'na Onesimus 8-22

⁸ Injomo saba'na, manna injo lalang ri Almase nakke ngampunnai kahasa laassare parenta mange ri kau apa nuparallu lamugeokang,

⁹ mingka ngu'rangi ripangamaseammu injo, la'bi bajikangi nakke ngera mange ri kau. Nakke, Paulus, tusanna'mo toana, la'bipa pole rikonni-konnina a'jari se're turitarungku kanara ri Isa Almase,

¹⁰ appabattu pangera inni mange ri kau passala ri ana' lalang rikatappakanta nukuuppa injo rihattungku ritarungku, iamo intu Onesimus.

¹¹ Riolo toje'i ia tide' matu-matunna mange ri kau, mingka rikoni-konnina sanna' bakka'mu matu-matunna mange ri kau iyareka mae ri nakke.

¹² Ia, tukukamaseang, kusuroi muliang mange ri kau.

¹³ Sitoje'na ia a'ra'i kutahang ri inni laa'jari passabemu laanjampangi ri nakke rihattungku juapa lalang ri pattarungkuang kanara Injili.

¹⁴ Mingka ampa geleko ammio, geleko lakupassa langera tulung ri kau, solanna ampa rie' nubaji' mugeokang andai assimpole kanara ripassa, mingka assituru' rikarellaang.

¹⁵ Saba' ma'ringi kanara injomo ia ripassisa'lakang sinampe' battu ri kau, solanna akkullei mutarima situlusu'na,

¹⁶ gelemu pole laa'jari ata, mingka la'bi battu ri ata, iamo intu urang siana' turikamaseang; appakonjomu mae ri nakke, la'bipapole mange ri kau baji' injo ri rupatau iyareka lalang ri Karaeng.

¹⁷ Ampa kau anrapang ri nakke urang siana' julu katappakammu, tarimalaloi ia assimpole nakkemo mutarima.

¹⁸ Ampa ia maeng appa'rugi mange ri kau iyareka kainrangang mange ri kau, pitanggongianglalo iangase'na injo mae ri nakke.

¹⁹ Lalang riukirang limangku inni, nakke, Paulus, tanggong: laallappasi. Saba' sitoje'na manna gelei kupau ma'nassana kainrangang todo'ko mae ri nakke, iamo intu kalemmu.

²⁰ Ya urang siana'ku, bisannabali rie' matu-matummu mae ri nakke lalang ri Karaeng: Sihi-sihi atiku lalang ri Almase!

²¹ Kuukirii inni mange ri kau, saba' tappa'a ma'nassana lamugeokangi. Kuisse'i, tantu lamugeokangi la'bi battu ripangeraku inni.

²² Ri injo sadia todo'ko assare pamminsamboang mae ri nakke, saba' nakke tajalli ri Allataala lalapitoli pangera dowaammu solanna nakke akkullea muliang mange ri kau.

Sallang Pappikatu 23-25

²³ Sallang mange ri kau battu ri Epafras, urangku ri tarungku kanara ri Isa Almase,

²⁴ na battu ri Markus, Aristarkhus, Demas surang Lukas, bahaang sipanjamaangku.

²⁵ Barakka' pangamaseanna Karaeng Isa Almase lapinahangi nyahamu!