EFESUS 6 - Kitta' Passitallikang Bau KAREBA BAJI'

Tunru' surang pangamaseang 6:1-9

¹ Oe ana'-ana', tunru'laloko mange ri tau toamu lalang ri Karaeng, saba' appakonjomu sibaji'na.

² Kangalikangi ammammu na idommu – inni iamo se're parenta nuparallu, assimpole nuripappisa'biang risapatta inni:

³ solanna sungguko na lambere ummuru'mu ri lino.

⁴ Na kau, amma intu, akolalo appakaammumba kuku' lalang ri atina ana'-ana'mu, mingka ajara ngase'i lalang ripangajarang na pappiu'rangi Karaeng.

⁵ Oe ata intu, pilangngerii karaemmu ri lino inni surangang malla' na bentere, na lalang rikalambusang ati, assimpole paminahangimmu mange ri Almase,

⁶ gele sangga ri a'rakannai jua laappakasannang nyaha rupatau, mingka assimpole ata ri Almase lalang risiganna'na atimu laanggeokang a'ra'na Allataala,

⁷ na surangang baji' nyaha anggeokang panjampanginna assimpole tau anggeokang panjampangi mange ri Karaeng na gele mange ri rupatau.

⁸ Muissekimu ma'nassana sikuanna tau, baji' injo ata, iyareka tau laloasa, ampa maengi anggeokang nubaji', ia languppai pa'balasa battu ri Karaeng Isa.

⁹ Na kau karaeng intu, appakonjo todo'i panggeokammu mange ri iyai na pakaderei panggaratta injo. U'rangilalo ma'nassana Karaeng Isa ri iyai na Karaeng Isa ri kau rie'i ri suruga na Ia gelei mile-mile tau.

Pakakasa rikatappakang 6:10-20

¹⁰ Kala'busanna, parallulaloko terasa lalang ri Karaeng Isa, lalang rikagassingang kahasaNa.

¹¹ Patabai sikonjo pakakasa sanjata Allataala, solanna kau akkulle attajang laa'bali ripappa'linguna Ibilisi;

¹² saba' pa'bundukanta gele laa'bali ri rara na assi, mingka laa'bali risikonjo pamarenta, a'bali risikonjo tukahasa, laa'bali risikonjo kahasa kakalammangang ri lino inni, laa'bali setang daa sipa'na nurie' injo ri langi'.

¹³ Injomo saba'na alle ngase'i pakakasa sanjata Allataala, solanna kau akkulle laa'bali ri allo daa injo na tulusu ammenteng, sungka'na mupa'maemmo iangase'na.

¹⁴ Jari, ammenteng ka'jangiko, a'ka'ba' aja' kanabaang na pakei baju kaadelang,

¹⁵ pipakei bangkemmu pallapa' nyaha a'ra' laa'lingka mange appala'bang Injili dame salehangang;

¹⁶ lalang risikuanna hattu patabai panangkisi katappakang, saba' ripanangkisi injo akkulleiko appakamate sikonjo pana api battu ri tau assipa' daa injo,

¹⁷ na tarimai topi baja' kasalamakang surang pa'dang Nyaha Tangkasa, iamo intu pau Allataala.

¹⁸ Lalang risikuanna dowaang surang pangera, a'hattu-hattuiko ngera dowaang lalang ri Nyaha Tangkasa na a'jaga-jagailaloko lalang ripangera dowaammu injo surangang pangera tide' tappu'na tujunna risikuanna tau tappa',

¹⁹ mae todo' ri nakke, solanna mae ri nakke, ampa kubungkara babaku, risarea pappau naba, bisannabali rikabaraniang nakke appala'bang harasia Injili,

²⁰ nukujampangi assimpole turisuro rie' ri pattarungkuang. Ngera dowaangilaloko solanna rikabaraniang nakke appala'bang Injili, anteekamua siratanna nakke a'bisara.

Ripappiissekang – Sallang Pappikatu 6:21-24

²¹ Solanna muisseki todo'i kareba passala ri nakke, jari Tikhikus, urang siana' julu katappakanta turikamaseang injo na pajampangi mallang lalang ri Karaeng Isa, lalapappiissekang ngase'i mange ri kaui.

²² Ripattujuang innimo ia kusuro mange ri kaui, iamo intu solanna muisseki kareba passala ri kambe na solanna ia assihi-sihi ri atimu.

²³ Dame salehangang na pangamaseang surangang katappakang battu ri Allataala Amma na battu ri Karaeng Isa Almase minahang ri kau ngase'.

²⁴ Barakka' minahang risikuanna tau, tungamaseang ri Karaengta Isa Almase surangang pangamaseang gele lapanra'.