EFESUS 5 - Kitta' Passitallikang Bau KAREBA BAJI'

Tallasa assimpole ana'-ana' sinara 5:1-21

¹ Injomo saba'na, assimpole ana'-ana' turikamaseang, pinahang baji'i Allataala

² na tallasa lalang ripangamaseang, appaanteekamua Isa Almase maeng todo'mu ngamaseang mange ri kaui na maeng lapassareammu kalenNa mae ri ditte assimpole passidakka surang koro'bang hau' ri Allataala.

³ Mingka kabalerang surang lohe rupanna karammasang iyareka kangowaang manna ripauna jua anda rie' ri kau, appaanteekamua paralluna mange ri tau tangkasa injo.

⁴ Appakonjo todo'i pau-pau daa injo, nutide' injo battuanna surang pitipau-pau – saba' passala inni gelei siratang – mingka sibale'na panai'i sukkuru.

⁵ Saba' u'rangi baji'laloi inni: Gele rie' tau pasangkili, tau rammasa iyareka tau ngowa, battuanganna tunyomba barahala, languppa dahuang lalang ri Pakaraenganna Almase na Allataala.

⁶ Akolalo lapa'lingu tau ripau-pau baji' tide' battuanna, saba' passala appakonjo injo appabattui kuku'na Allataala mange ri tau doraka injo.

⁷ Injomo saba'na akolalo a'bahaang surangang iyai.

⁸ Toje'i riolo kau rie' lalang rikalammang, mingka konni-konnina riekimoko lalang risinara, na lalang ri Karaeng. Injomo saba'na tallasa assimpoleiko ana'-ana' sinara,

⁹ saba' sinara injo sanging nubaji' hassele'na na kaadelang surang kanabaang,

¹⁰ na paressai apa nubaji' mange ri Karaeng.

¹¹ Akolalo minahang ngalle dahuang lalang risikonjo panggeokang daa nugele injo ngerang hassele baji', mingka sibale'na pappiissekangi sikuanna panggeokang daa.

¹² Saba' manna ripauna jua nulageokangi injo ri tampa' tassa'bu-sa'bu injo se'rei nuappakasiri'.

¹³ Mingka iangase'na numaeng ripappijanjangang risinara injo a'jari kajanjangangi, saba' sikonjo nukajanjangang sanging sinara.

¹⁴ Injomo saba'na na ripau-paui, ”Ambaummoko, oe kau tutinro intu na attallasako muliang battu ritangnga-tangngana tau mate na Almase laa'caya ri kau.”

¹⁵ Injomo saba'na, pariati baji'sai, anteekamua tallasa'mu, akolalo assimpolei tau kumbala, mingka assimpoleiko tau lumu nyaha,

¹⁶ na pake hattu rie' injo, saba' hattu inni rassi nudaa.

¹⁷ Injomo saba'na akolalo ba'gai, mingka apparri-parriiko solanna mupahangi a'ra'na Karaeng.

¹⁸ Akolalo bengo kanara anggoro, saba' anggoro intu appa'rie'i hawa napasu daa, mingka paralluiko rassi ri Nyaha Tangkasa,

¹⁹ na ampa allagariko pau assimpolei kelong-kelong masmur, kelong-kelong pappakala'bari surang kelong-kelong pappakabakka' sumanga'. Akkelong surang a'rannu-rannuiko mange ri Karaeng lalang risisukku'na atimu.

²⁰ Sanging appanaikiko sukkuru risikuanna lalang areng Karaengta Isa Almase mange ri Allataala surang Ammanta

²¹ na pakatuna kalemmu mange ri tau maraeng passabakang tunru' ri Almase.

Pangamaseanna Almase poong tallasa pakkalabiniang 5:22-33

²² Oe bahine intu, tunru'laloko mange ri bura'nemmu assimpole mange ri Karaeng,

²³ saba' bura'ne intu ulu ri bahine assimpole Almase ulu ri jamaah. Iamo appakasalama' batangkale.

²⁴ Injomo saba'na anteekamua jamaah tunru' mange ri Almase, appakonjo todo'i bahine inni lalang risikuanna tunru'i mange ri bura'nenna.

²⁵ Oe bura'ne intu, kamaseangi bahinemmu appaanteekamua Almase maeng ngamaseang ri jamaah na maeng lapassareammu kalenNa mange ri ia

²⁶ lalapakatangkasai, sungka'i maeng injo labissai surangang lario ri ere na pau Allataala,

²⁷ solanna ri appakonjona Ia lataroi jamaah injo ri a'rakang kalenNa surangang tangkasai na tide' daana surang nuakkuru iyareka nuassimpole injo, mingka solanna jamaah injo tangkasa surang tide' daana.

²⁸ Appakonjo todo'i bura'ne inni parallui ngamaseang mange ribahinenna lapaassimpole batangkalenna to'jua: Inai jua ngamaseang ribahinenna iamo intu kalenna to'jua lakamaseang.

²⁹ Saba' gele minang rie' tau lakalikkingang kalenna, mingka lapiarai surang lajampangi, assimpole Almase mange ri jamaah,

³⁰ saba' ditte bageang ri batangkalenNa.

³¹ Injomo saba'na, bura'ne intu labokoi ammanna surang idonna na assialle surangang bahinenna, sa'genna ruaiya injo a'jari se're tubu na nyaha.

³² Harasia inni bakka'i, mingka nukukuangang injo iamo intu passisambunganna Almase surangang jamaah.

³³ Manna anteekamua, mange ri kau para anggeokang: Kamaseangi bahinemmu paassimpole mukamaseanna kalemmu na bahine injo parallui ngali' ri bura'nenna.