EFESUS 4 - Kitta' Passitallikang Bau KAREBA BAJI'

Passamaturukang jamaah surang barakka' gele assinrupa 4:1-16

¹ Injomo saba'na, nakke appiu'rangi mange ri kaui, nakke tau ritarungku kanara Karaeng Isa, appiu'rangi mange ri kaui, solanna kau tumaeng intu rikeo' tallasa assituru' ripakkeo' injo.

² Parallulaloko sanging tuna ati. Baji' riampe-ampe, na sabbara. Pappijanjangangi pangamaseammu surang assisokongiko.

³ Na katuholaloi passe'reang Nyaha Allataala lalang ripassikko' dame salehangang.

⁴ Se're tubu, na se're Nyaha Allataala, appanteekamua kau maeng rikeo' mange rise're pattajalliang nulakimbolong lalang ripakkeo'mu injo,

⁵ se're karaeng, se're katappakang, se're rioang,

⁶ se're Allataala na Amma battu ri iangase'na, Allataala tukaminang rate ri iangase'na, surang patteteang ri iangase'na na lalang ri iangase'na.

⁷ Mingka mae ri ditte tasse're-se're tau maeng risareki barakka' assituru' ukkurang passare ri Almase.

⁸ Injomo saba'na ripaui, ”Rihattunna Ia nai' ri tampa' la'biri, Ia laurangi sikonjo turitarungku; Ia assare sikonjo passare mange ri rupatau.”

⁹ Gelejua Ia maemmu nai' a'battuangi ma'nassana Ia maeng todo'mu naung ribageang lino kaminang raha injo?

¹⁰ Ia tumaeng injo naung, Ia todo' tumaeng injo nai' dere la'bi langkasanna battu risikonjo langi', lalageokangi iangase'na.

¹¹ Iamo tuassare injo mange risikonjo suro iyareka risikonjo nabbi, baji' tuappala'bang Injili iyareka pakalahaki na tungajara,

¹² laappakasangka' risikuanna tau tappa' mange rijamaang panjampangi, mange ri pappaentengang tubu Almase,

¹³ sa'genna ditte ngase' akkullei ripa'batu tappa'ta surang pangisse' nunaba injo ripassala Ana' Allataala, baji'mu pangisse'ta, na pa'bakkakang injo assituru'i rikasangkakanna Almase,

¹⁴ sa'genna ditte gelemo ana'-ana', turipalinga-linga ri ajarang, ripau burana rupatau inni lalang rikasara'dekanna laappakalingu.

¹⁵ Sibale'na, geokangi sikuanna nunaba injo lalang ripangamaseang, ditte a'bakka' lalang risikuanna passala mange ri Ia, Almase, nu iamo Ulunta.

¹⁶ Battu ri Iamo sikonjo batangkale – baji' atoro'na na risikko' a'jari se're ripanjampanginna sikonjo bageang, assituru' jama-jamaang ri sikonjo bageang – narima pa'bakkakang na lapaenteng kalenna kanara ripangamaseang.

Rupatau bau 4:17-32

¹⁷ Injomo saba'na, passabakang ri Karaeng kupaui na kupattoje'i inni mange ri kaui: Andaimoko pole tallasa assimpole tau gele injo tappa' ri Allataala ripikkirang tide' matu-matunna

¹⁸ na kalammangi pappahanna, derei battu ritallasa nuassala'na ri Allataala, saba' kaba'gaang nurie' injo lalang ri iyai surang passabakang terasa'na atina.

¹⁹ Mingka tide'mo siri'na, jari lapassareangimu kalenna mange ri hawa napasu daa na lalang rikangowaang lageokangi sikuanna jama-jamaang rammasa.

²⁰ Mingka gele rinuappakonjo kau appilajara tappa' ri Almase.

²¹ Saba' maemmo mulangngeri passala ri Isa na narima pappilajarang assimpole papinahanNa ma'nassana Iamo katojekang nukajanjangang injo ripassala'na Allataala.

²² Injomo saba'na assituru' rikatallasammu riolo, parallui mubokoi sippa' rupatau sallo injo, saba' rupatau sallo injo languppai kapanrakang battu rinapasu daa.

²³ Solanna ripakabaui nyaha na pikkirammu,

²⁴ na makei rupatau bau, numaeng ripaa'jari assituru' a'ra' ri Allataala lalang rikanabaang surang katangkasang nutoje' injo.

²⁵ Injomo saba'na pela'laloi bura-bura injo na lambusiko ripanggeokang mange ri parammu tau, saba' dittei inni sanging tu'urangki.

²⁶ Ampa kukukiko, akolalo a'bua' kadorakaang: Andai lasa'ra'mu mataallo, nagelepai ammari kuku'mu

²⁷ na akolalo assare tampa' mange ri Ibilisi.

²⁸ Tau palukka' injo, andamu a'lukka' muliang, mingka baji'mu ia akkareso terasa na anggeokangi jama-jamaang baji' battu ri limanna, solanna ia akkulle a'dahu-dahu manna siso'di' jua mange ri tau kakurangang injo.

²⁹ Andalalo rie' pau daa ansulu' battu ri babamu, mingka pakei pau-pau baji' laappakaterasa, ri antee mae parallu, solanna tuallangngere injo, nguppai barakka'.

³⁰ Na akolalo pa'ri'-pa'risi Nyaha Tangkasa'na Allataala, numaeng a'jari segele injo ri kau riseppa'namo hattu pappasalama' injo.

³¹ Sikonjo nupai', kahussangang, pa'kukukang, pa'beserang surang pitina parallui mupela' ritangnga-tangngamu, appakonjo todo'i sikuanna sipa' daa.

³² Mingka paralluiko baji' pa'mai' mange ri tau maraeng, rassi pangamaseang surang assiampungi, appaanteekamua Allataala patteteang ri Almase maeng assare ampung mange ri kaui.