EFESUS 3 - Kitta' Passitallikang Bau KAREBA BAJI'

Harasia pakkeo' ri tau gele injo Yahudi 3:1-13

¹ Injomo saba'na nakke inni, Paulus, ritarungku kanara Isa Almase tujummu tau gele intu Yahudi.

² Toje'i kau maeng allangngere passala pangamaseang ri Allataala, nuripassareang injo mae ri nakke kanara ri kaui.

³ Iamo intu anteekamua Allataala lapappissekang harasia injo mae ri nakke patteteang lalang ripanjanjang, assimpole numaeng kuukiri bo'do' injo sumpae'.

⁴ Ampa maemmu muajii, injo kau akkullei mupahangi pangisse'ku ripassala harasia Almase,

⁵ nurihattu jammanna tau riolo gelei ripappiissekang mange ri ana'-ana' rupatau, mingka konni-konnina ripappisa'biangi lalang ri Nyaha mange risikonjo suro surang nabbi tangkasa'Na,

⁶ iamo intu ma'nassana tau gele injo Yahudi, kanara Injili, minahangi nguppa dahuang na bageang ri batangkale surang tuminahang lalang risapatta nuripassareang injo lalang ri Isa Almase.

⁷ Battu ri injo nakke maeng a'jari pajampanginna assituru' passare pangamaseang ri Allataala, nuripassareang injo mae ri nakke assituru' rijama-jamaang kahasaNa.

⁸ Mae ri nakke, tukaminang daa inni risikuanna tau tappa', maeng ripassareang pangamaseang inni, laappala'bang mange risikuanna tau gele injo Yahudi kakalumannyanganna Almase, nugele injo risanna-sanna.

⁹ Na lalabua'i sikuanna tau laanjanjang naha-naha harasia numaeng a'bilangang taung injo tassa'bu lalang ri Allataala tuappaa'jari injo risikuanna,

¹⁰ solanna konni-konnina patteteang ri jamaah ripappiissekangi lohe rupanna kasara'dekang Allataala mange ri pamarenta, na tukahasa ri suruga,

¹¹ assituru' ria'ra'na numannannungang injo, numaeng lageokammo Allataala lalang ri Isa Almase, Karaengta.

¹² Lalang ri Ia ditte nguppa kabaraniang surang pa'lalangang lamange ri Allataala surangang rassi kajarrekang patteteang katappakanta mange ri Ia.

¹³ Injomo saba'na, nakke ngera mange ri kaui, solanna andako la'ba pa'mai' rimujanjanna kasinsaraangku kanara kau, saba' kasinsaraangku inni iamo laa'jari kabajikang ri kaui.

Pangera Dowaanna Paulus 3:14-21

¹⁴ Injomo saba'na nakke joppa'a mange ri Amma,

¹⁵ nubattu ri Ia sikuanna pa'bija-bijaang lalang ri suruga surang ribahonna lino inni latarima arenna.

¹⁶ Nakke ngera dowaang solanna Ia, assituru' kakalumannyangang kala'biranNa, appakaterasa ri kau surangang kahasa patteteang ri NyahaNa lalang ri batemmu,

¹⁷ sa'genna rikatappakammu Almase ammari lalang ri atimu na kau a'aka' na appoong lalang ripangamaseang.

¹⁸ Nakke ngera dowaang, solanna kau assurang-surang iangase'na tau tappa' akkulle appahang, anteekamua la'ba'na surang lambere'na na langkasa'na surang anralanna pangamaseang Almase,

¹⁹ na akkulle ngisse' ripangamaseang injo nungompo' risikonjo kasara'dekang. Nakke ngera dowaang, solanna kau ripakasangka' lalang risikuanna kasangkakang ri Allataala.

²⁰ Mange ri Ia tuakkulle injo anggeokang siloheang battu ripangera dowaanta iyareka nuripikkiri injo, assimpole nuripappisa'biang injo battu rikahasa anjama injo lalang ri ditte,

²¹ mange ri Iamo kala'birang lalang ri jamaah surang lalang ri Isa Almase sitarrusu'na sa'genna situlusu'na. Aming.