EFESUS 2 - Kitta' Passitallikang Bau KAREBA BAJI'

Iangase'na sanging barakka' 2:1-10

¹ Riolo maeng matemoko kanara panggeokang sala surang kadorakaang.

² Kau tallasa lalang ri injo, saba' mupinahanginna pa'lalangang ri lino inni, kau tunru' ri tukahasa pakkaraengang ri langi', iamo intu nyaha nukonni-konnina rie'i anjama ritangnga-tangngana sikuanna tau doraka.

³ Sitoje'na ditte ngase' antama' todo'ki ri iyai injo, rihattu tallasa'ta juapa lalang ri hawa napasu rupatau surang daa sipa'na pikkiranta. Sitoje'na dittemo tau parallu rikukuki, assimpole iyai tumaraeng injo.

⁴ Mingka Allataala tulohe injo pangamaseanna, rikanara pangamaseanNa nubakka' injo, maeng lapassareangi Allataala mae ri ditte,

⁵ maeng lapakaattallasaki assurangang Almase, manna injo ditte maeng matemuki rilohena kasalaanta – ri pangamaseang kau ripakasalama' –

⁶ na lalang ri Isa Almase Ia maeng lapakaattallasa todo'ki muliang na assarei tampa' laassurangang Ia ri suruga,

⁷ solanna rihattu larie' injo sallo' Ia lapappijo'jokangi mae ri ditte kakalumannyangang pangamaseanNa nulohe injo assituru' rikabajikanNa mae ri ditte lalang ri Isa Almase.

⁸ Saba' kanara pangamaseang kau ri pakasalama' rikatappakang; injo gele hassele karesomu, mingka passare ri Allataala,

⁹ injo gele hassele rijama-jamaammu, solanna gele rie' tau a'bangga-bangga.

¹⁰ Saba' ditte inni paa'jarinaki Allataala, ripaa'jari lalang ri Isa Almase laanggeokang jama-jamaang baji', numaeng lapakasadiamo Allataala minang riolo. Ia a'ra'i, solanna ditte tallasa lalang ri Ia.

Ripakase're lalang ri Almase 2:11-22

¹¹ Injomo saba'na, u'rangilaloi ma'nassana riolo kau intu geleiko tau Yahudi rikasara, turiare' tau gele assunna' ri iyai tulaare'ki injo kalenna ”assunna'”, iamo intu sunna' kajanjangang nulajama injo ri limanna rupatau.

¹² Rihattu injo geleipako tappa' ri Almase, gelei antama' ri bangsa Israele na gele nguppa dahuang lalang risikonjo katantuang nurisappataang injo, tide' pattajalliang surang tide' Allataala lalang ri lino inni.

¹³ Mingka ri konni-konnina kau lalang ri Isa Almase, nuriolo ”dere”, a'jarimu ”seppa'” rikanara rarana Almase.

¹⁴ Saba' Iamo dame salehangang riditte, tumaeng lapaa'bajikangi injo rua tuassibaliang na lalasosarai passimbangang, iamo intu pa'beserang,

¹⁵ saba' rikamateanNa assimpole rupatau Ia maeng labokoimu hukkung Tora' surang sikonjo parenta na katantuanna, labua'i ruaiya a'jari se're rupatau bau lalang ri kalenNa, na ri injomo appa'rie' dame salehangang.

¹⁶ Na laappa'dame ri ruaiya, lalang rise're batangkale, surangang Allataala patteteang risalli', na appakalannya'i pa'beserang risalli' injo.

¹⁷ Ia rie'i na appala'bangi dame salehangang mange ri kau ”tudere” injo surang dame salehangang mange ri iyai ”tuambani” injo,

¹⁸ saba' patteteang ri Ia ditte rua tuassibaliang lalang rise're Nyaha nguppa pa'lalangang antama' lamange ri Amma.

¹⁹ Appakonjonamo geleimoko pole tau maraeng surang tau battu-battu, mingka bahaang battu risikuanna tau tappa' na bageang pa'bijaang ri Allataala,

²⁰ nuripaenteng rate ripallanggana sikonjo suro surang nabbi, lalang ri Isa Almase assimpole batu appoong.

²¹ Lalang ri Ia ammentengi sibatu sapo, baji' atoro'na, a'jari Sapo Allataala tangkasa, tujunna Karaeng.

²² Lalang ri Ia kau pole minahang ripaenteng laa'jari tampa' pammariang Nyahana Allataala.