EFESUS 1 - Kitta' Passitallikang Bau KAREBA BAJI'

Barasallang 1:1-2

¹ Battu ri Paulus, suro ri Isa Almase rikanara a'ra'na Allataala. Mange risikuanna tau tappa' ri Efesus, risikuanna tau tappa' lalang ri Isa Almase.

² Pangamaseang surang dame salehangang battu ri Allataala, Ammanta surang battu ri Karaeng Isa Almase minahang ri kau.

Kakalumannyangang mange ri tau ripile injo 1:3-14

³ La'biri Allataala surang Amma karaengta Isa Almase nulalang ri Almase maeng lapassareang ngase'mu mae ri ditte sikuanna barakka' nugele injo kajanjangang lalang ri suruga.

⁴ Saba' lalang ri Ia Allataala maeng mile ri ditte rigelenapa ripaa'jari lino, solanna ditte tangkasa na tide' daata ri a'rakanNa.

⁵ Lalang pangamaseang Ia maeng lapattantuki battu ripakaramulana patteteang ri Isa Almase laa'jari ana'-ana'Na, assituru' ria'ra'Na,

⁶ solanna bakka'mu pangamaseanNa nula'biri injo, nulapassareang injo Allataala mae ri ditte lalang ri Ia, turikamaseang injo ri Isa.

⁷ Saba' lalang ri Isa ditte nguppa pallappasi rikanara raraNa, iamo intu pangampungang kadorakaang, assituru' kalammorang pangamaseanNa,

⁸ nulapassareang injo Allataala mae ri ditte lalang risikonjo kasara'dekang na pangisse'.

⁹ Saba' Ia maeng lapappisa'biammu harasia a'ra'Na mae ri ditte, assituru' surangang naha-nahanNa, iamo intu naha-nahanNa nubattu ripakaramulana maeng latantuammo Allataala lalang ri Almase

¹⁰ assimpole parasadiaang laripa'rupana hattu laripasse'rena sikuanna lalang ri Almase assimpole ulu, baji' nurie' ri suruga iyareka nurie' ri lino.

¹¹ Nakke appau ”lalang ri Almase”, saba' lalang ri Iamo kambe risare dahuang – ditte tuminang ripakaramulana maeng ripile ri Allataala assituru' a'ra'na Allataala, tuanjama injo ri iangase'na assituru' katappukang ria'ra'Na to'jua –

¹² solanna kambe, la'bi riolomo tajalli mange ri Almase, akkulle appakala'biri ri Allataala rikanara kala'biranNa.

¹³ Lalang ri Ia kaui todo' – kanara maengimmu allangngere pau katojekang, iamo intu Injili kasalamakammu – lalang ri Ia kaui todo', rihattu tappa'mu, risegele surangang Nyaha Tangkasa, nulasappattaang injo Allataala.

¹⁴ Nyaha Tangkasa injomo boro' ma'nassana ditte nguppa dahuang pallappasi kadorakaang nulapaa'jari injoki anunna Allataala, laappakabakka' rikala'biranNa.

Pangera Dowaang ripangisse' passala kala'biranna Almase 1:15-23

¹⁵ Injomo saba'na, sungka'i kulangngere passala katappakammu lalang ri Karaeng Isa na passala pangamaseammu mange risikuanna tau tangkasa,

¹⁶ manna nakke gelea ammari-mari appanai' sukkuru kanara kau. Nakke sanging kuu'rangiko lalang ripangera dowaangku,

¹⁷ na ngera mange ri Allataala Karaengta Isa Almase, iamo intu Amma tumala'biri injo, solanna Ia assare mange ri kau Nyaha kasara'dekang surang pappijo'jo' labaji' pangisse'mu mange ri Ia.

¹⁸ Jari solanna Ia lapaa'jari mata atimu sinara, bisannabali mupahangi apa ripattajalliang ri Ia tumaeng injo lakeo' injoko: Anteekamua lohena kala'birang nulapidahuang mange risikuanna tau tappa'.

¹⁹ Na anteekamua bakka'na kahasaNa mae riditte tutappa' injo assimpole bakka'na kahasaNa,

²⁰ rihattu lapakaattallasa'na muliang Isa Almase battu ritangnga-tangngana tau mate na Ia lapatolongi risa'ri kananNa ri suruga,

²¹ Almase sarro la'bi langkasanna battu risikonjo pamarenta surang tukahasa na kakahasaang na pakkaraengang surang sikonjo areng nugele injo akkulle ripau-pau, gele sangga ri lino inni jua, mingka pole ri lino labattu injo sallo'.

²² Allataala maemmu lapatunru' sikuanna rirahangang bangkenna Almase na Ia maeng lapassareammu Almase mange ri Jamaah assimpole Poong battu ri iangase'na nurie'.

²³ Jamaah intumo tubuna Almase, iamo intu tusangka' injo riiangase'na na laappakasangka'i risikuanna.