PAU-PAUWANNA SIKONJO SURO-SURO 9 - Kitta' Passitallikang Bau KAREBA BAJI'

Pajarrana Saulus 9:1-19a

¹ Rihattu injo bambang juapai atina Saulus langgaratta' na lamuno tau minahang injo ri Karaeng Isa. Ia mangei ri Imang Bakka',

² na ngerai sura' kahasa lalaerang mange risikonjo sapo passambajangang Yahudi ri Damsyik, solanna, ampa nguppai bura'ne iyareka bahine tuminahang ri Pa'lalangang Karaeng, ia akkulle lajakkala na laerang ngase'i mange ri Yerusalem.

³ Ri pa'lingkaanna lamange ri Damsyik, sungka'i ambanimo ri kota injo, sikalinna rie' sinara battu ri langi' laappui.

⁴ Ia anra'bai naung ri tana na allangngere sa'ra appau mange ri ia, ”Saulus, Saulus, ngura Nakke musissa?”

⁵ Appihali Saulus, ”Kau inai, Karaeng?” Lakuamo pauNa, ”Nakkemo Isa tumusissa injo.

⁶ Mingka ambaummoko na a'lampako antama' ri kota, konjopai mange ampai ripau ri kau, nuparallu injo lamugeokang.”

⁷ Uranna sipa'lingkaang ammangnga-mangnga ngase'i saba' lalangngere todo'i sa'ra injo, mingka gele anjanjangi tau.

⁸ Ammentengi Saulus, maeng injo labille' matanna, mingka gelemu akkulle anjanjang; jari larenrengimamo antama' ri Damsyik.

⁹ Tallungallo ia gele akkulle anjanjang na ritallungallo injo sallona ia gele nganre na gele todo'i nginung.

¹⁰ Ri Damsyik rie' se're tau tappa' ri Karaeng Isa turiareng Ananias. Karaeng Isa appau mange ri ia lalang rise're panjanjang, ”Ananias!” Pappihalinna, ”Nakkemo inni, Karaeng Isa!”

¹¹ Lakuamo Karaeng Isa, ”A'lampamoko mange ri lalang riare' injo Lalang Lambusu, na bojai ri saponna Yudas se're tau battu ri Tarsus turiareng Saulus. Ia attangngai ngera dowaang,

¹² na lalang rise're panjanjang ia anjanjangi ma'nassana se're tau turiareng Ananias antama'i ri sapo na lapatompangi pala' limanna rateang ulunna, solanna akkulle anjanjang muliang.”

¹³ Appihali Ananias, ”Karaeng, battu ri tau lohe maengi kulangngere passala'na tau injo, sanna' lohemo sipa' daa maeng lageokang mange risikuanna tau tangkasa'Ta ri Yerusalem.

¹⁴ Injo pole ri inni ia nguppai kahasa battu ri sikonjo imang ponggaha lanjakkala sikuanna tau lapau injo aremMu.”

¹⁵ Mingka appaui Karaeng Isa mange ri ia, ”A'lampamoko, saba' tau innimo Kujo'jo' laappala'bang arengKu ri a'rakanna sikonjo tau maraeng surang sikonjo karaeng na risikuanna tau Israele.

¹⁶ Nakkemo laappijo'jo' mange ri ia, lasanna' lohena kasissaang nuparallu lauppa rikanara arengKu.”

¹⁷ Maeng injo a'lampamu Ananias mange konjo na antama'i ri sapo injo. Ia lapatompangi pala' limanna rateang ulunna Saulus, lakua, ”Saulus, urang siana' mala'biri'ku, Karaeng Isa, maeng lapappijanjangammu kalenNa mange ri kau rilalang pamolongammu, Iamo assuro ri nakke mange ri kau, solanna akkulleko anjanjang muliang na rassiko Nyaha Tangkasa.”

¹⁸ Rihattu injomo komokalena rie' gaha'-gaha' ta'lakkasa ri matanna, jari ia akkullemu anjanjang muliang. Ia ammentengi ampai ririo.

^19a Sungka'i maeng nganre, baji'mu pakkasiana.

Saulus surang sikonjo urang siana' 9:19b-31

^19b Saulus ammari sikurangallo sallona surang tau tappa' ri Karaeng Isa ri Damsyik.

²⁰ Rihattu injo ia pakaramulamu lalagara Isa risikonjo sapo passambajangang, na lapaui ma'nassana Karaeng Isamo Ana' Allataala.

²¹ Lannasai sikuanna tau allangngere ripassala injo na lakua, ”Gelejua ia inni ri Yerusalem a'ra'i lahuno ngase' inai-nai jua tau lasa'bu' arenNa Karaeng Isa? Na gelejua ia rie'i mae konni a'ra'i lanjakkala na lalaerangi mange ri a'rakanna sikonjo imang ponggaha?”

²² Mingka Saulus pela' bakka' pakkullena na lapakaammangnga-mangnga ngase'i tau Yahudi ammari injo ri Damsyik, saba' ia lasa'bii ma'nassana Karaeng Isamo intu Almase.

²³ Sikurangallo ribokoanganna mae, sikuanna tau Yahudi a'buakimu se're passamaturukang daa lalahunoi Saulus.

²⁴ Mingka passamaturukang daana injo kaissekangi ri Saulus. Allo bangngimu tau Yahudi injo lajagai sikonjo babaang pansulukanna battu ri kota injo, solanna akkulle lahuno Saulus.

²⁵ Mannamamo appakonjo rie' se're bangngi ana'-ana' gurunna mange laalle na lauloro lalang ri karanjeng battu rate ri tembo'na kota injo.

²⁶ Riambattunamo ri Yerusalem Saulus lasobai assileo' mange risikonjo urang siana' tappa' ri Karaeng Isa, mingka mallaki ngase'i mange ri ia, saba' gele tappaki ma'nassana ia se're todo'i tau tappa'mo ri Karaeng Isa.

²⁷ Mingka Barnabas latarimai Saulus na laurangi mange risikonjo suro na lalagarai mange ri iyai, anteekamua Saulus lajanjang Karaeng ritangnga lalang na ma'nassana Karaeng Isa a'bisara mange ri ia na anteekamua kabaranianna ngajara ri Damsyik lalang arenna Isa.

²⁸ Ammari Saulus surang ngase' ri Yerusalem, na parrangi lapangajarang lalang arenNa Karaeng Isa.

²⁹ Ia todo' a'bisara na assikuta'nang surang sikuanna tau Yahudi a'bisara Yunani injo, mingka iyai tuli a'naha-naha juai lalahuno.

³⁰ Sungka'i passala injo kaissekang risikonjo urang siana' julu katappakang, laerangimu Saulus mange ri Kaisarea na battu ri injomo laerangi mange ri Tarsus.

³¹ Jari sikurang hattu sallona jamaah risibatu Yudea, Galilea na Samaria rie'i lalang rikadamaeang. Jamaah injo ripaentengi na jumallana pela' attamba bakka'i passabakang pattulungang ri Nyaha Tangkasa.

Petrus lapakagassingi Eneas surang lapakaattallasai muliang Dorkas 9:32-43

³² Rihattu injo Petrus a'lili'i, labua' pa'lingka-lingkai. Ia asse'ka todo'i mange risikuanna tau tangkasa ammari injo ri Lida.

³³ Ri injo larumpa'i turiareng Eneas, karuamu taunna tinro ri patinroang saba' pesu'i.

³⁴ Appaui Petrus mange ri ia, ”Eneas, Isa Almase lapakagassingko; ambaummoko na pakabaji'i patinroammu!” Rihattu injo jua ammentengi tau injo.

³⁵ Sikonjo taunna Lida na Saron lajanjangi, jari tappa' ngasekimu mange ri Karaeng Isa.

³⁶ Ri Yope rie' todo' bahine tappa' ri Karaeng Isa turiareng Tabita – lalang ribisara Yunani Dorkas. Bahine injo sanna' lohe nubaji' lageokang na assarei passidakka.

³⁷ Mingka rihattu injo ia garringi na mate. Sungka'i maemmo ririo batangkalenna ripanai'mu ri tanggaruma.

³⁸ Saba' Lida seppa'i ri Yope, tau tappaki injo ri Karaeng Isa laisse'i ma'nassana Petrus rie'i ri Lida, assuroimu rua tau mange labojai na laerai: ”Lassiriko rie' mae ri pammariamba.”

³⁹ Jari apparri-parrimu Petrus na a'lampai a'rurung tau rua injo. Riambattuinnamo mange konjo, ia riurammu nai' ri tanggaruma. Sikonjo balu-balu rie' ngase'i ammenteng riampi'na na riapparauinna lapijanjangiammu sikonjo baju na pakeang numaeng labua' injo Dorkas rihattu assuranginnai juapa.

⁴⁰ Mingka Petrus lasuro ngase'i ansulukang, maeng injo ia akkolantu'i ngera dowaang. Maeng injo laa'raki batangkale injo na appaui, ”Tabita, attallasamoko muliang!” Jari labungkaramu matanna Tabita na rihattu lajanjanna Petrus, ia ambaungi ampai attolong.

⁴¹ Petrus latetengi limanna na lapaentengi. Maeng injo ia lakeo' ngase'i tau tangkasa injo surang sikonjo balu-balu, ampai lapijanjangiang ma'nassana bahine injo attallasai muliang.

⁴² Kajariang injo alla'bangi risibatu Yope na lohemo tau a'jari tappa' mange ri Karaeng Isa.

⁴³ Jari Petrus sallo ammari ri Yope, ri saponna tau riareng Simon, ia se'rei paanyi' kukkulu.