PAU-PAUWANNA SIKONJO SURO-SURO 8 - Kitta' Passitallikang Bau KAREBA BAJI'

^1a Saulus lapangisseki todo'i parihunona Stefanus.

Passissa mange ri jamaah ri Yerusalem 8:1b-3

^1b Rihattu injo pakaramulamu passissa sarro mange ri jamaah ri Yerusalem. Iyai ngase', passangadinna suro-suro injo, tassiarai risibatu Yudea na Samaria.

² Sikuanna tau baji' geo'na laloangangi batangkalenna Stefanus na sarro laparauinna.

³ Mingka Saulus lapa'gassing-gassingangi lalahuno ngase' jamaah injo na ia antama'i ritasse're-se're sapo na larenreng ngase'i ansulukang bura'ne surang bahine ampai lapassareangi ngase' laripantama' ri pattarungkuang.

Filipus ri Samaria 8:4-25

⁴ Iyai tau tassia'-siara injo lapila'bangi risikonjo kampong rie' ri injo ampai appala'bangi Injili.

⁵ Filipus a'lampai mange rise're kota ri Samaria na lapappiissekangi Almase mange risikuanna tau rie' konjomange.

⁶ Sungka'i tau lohe injo lalangngere pauna Filipus na lajanjangi tanra-tanra lapaa'jari injo, iyai ngase' lapariati baji'i nulapau-pau injo.

⁷ Saba' battu ri tau lohe lataba injo setang ansulu' ngase'i setang injo ampai akkariu' bakka', na lohe pole tau pesu' surang tau kempang ripakagassing.

⁸ Injomo saba'na, sukku' bakka'mu karannuang lalang ri kota injo.

⁹ Ri kota injo rie' tau riareng Simon numinang riolo mariolo appalampa sehere na lapakatakkajanna'i sikuanna tau ri Samaria, na komokalena se're tau kaminang pore.

¹⁰ Sikuanna tau, bakka' ki'di', minahang ngase'i ri ia na lakua, ”Tau inni iamo kahasa Allataala nuriare' injo Kahasa Bakka'.”

¹¹ Minahang ngase'i, saba' sallomu lapakatakkajannakinai risikonjo sehere'na.

¹² Mingka konni-konnina tappa' ngase'i mange ri Filipus tau appala'bang injo Injili passala Pakkaraengang Allataala na passala arenna Isa Almase, na ririo ngase'i, baji' injo bura'ne iyareka bahine.

¹³ Simon tappa' todo'i, na rimaennamo ririo, ia sanging paminahammo ri Filipus, na ia takkajanna'i rihattu lajanjanna tanra-tanra surang kajariang nugele injo samara.

¹⁴ Sungka'i lalangngere suro-suro rie' injo ri Yerusalem ma'nassana tana Samaria latarimamu pauna Allataala, lasuroimu Petrus na Yahya mange konjo.

¹⁵ Riambattuinna mange konjo suro-suro rua injo ngera dowaangi solanna sikuanna tau Samaria nguppai Nyaha Tangkasa.

¹⁶ Saba' Nyaha Tangkasa injo gelepa rie' tuladongkoki manna sitau ri iyai, saba' gelepai ririo lalang arenna Karaeng Isa.

¹⁷ Maeng injo ruaiyai lapatompang pala' limanna rateang ulunnai, jari narimaimu Nyaha Tangkasa.

¹⁸ Rihattu lajanjanna Simon ma'nassana Nyaha Tangkasa injo ripassareangi rilapatompanginna pala' limanna suro-suro injo, assaremu doe' mange ri iyai,

¹⁹ na lakua, ”Risareang todo'a kahasa intu, solanna ampa kupatompangi pala' limangku rateanna se're tau, ia akkullei narima Nyaha Tangkasa.”

²⁰ Mingka lakua Petrus mange ri ia, ”Assipanra'kammoko intu doe'mu, saba' pangisse'mu ma'nassana akkulle muhalli pangamaseanna Allataala ri doe'mu.

²¹ Tide' bageang iyareka dahuammu lalang ripassala inni, saba' atimu gele lambusu ri a'rakanna Allataala.

²² Jari, ngu'rangiko battu risipa' daamu na ngera dowaangko mange ri Karaeng Isa bisannabali Ia laampungi sipa' daana atimu;

²³ saba' kutarrusui ma'nassana atimu assimpole pidu pai'na na lajarro'i sipa' daa.”

²⁴ Appihali Simon, ”Paralluko ngera dowaang tujungku mange ri Karaeng Isa, solanna mae ri nakke andai a'jari sikonjo numaeng intu mupau.”

²⁵ Sungka'i maengimo ruaiya assa'bi na lapala'bang pauna Allataala, muliangimu mange ri Yerusalem na lalang ripa'lingkaanna injo appala'bangi Injili mange rilohe desa ri Samaria.

Pagahe ri sapo karaeng battu ri Etiopia 8:26-40

²⁶ Maeng injo appaumu se're malaeka'na Allataala mange ri Filipus, ”A'lampa naikangko, ripanyolorang battu ri Yerusalem mange ri Gaza.” Pamolongang injo sanna' sinona.

²⁷ Jari apparurumu na a'lampai. Rie'mo se're tau Etiopia, pagahe ri sapo karaeng, se'rei turikangalikang na ponggahai ripananro doe'na Sri Kandake, karaeng bahine ri Etiopia, lamange assambajang ri Yerusalem lassambajang.

²⁸ Tau injo konni-konnina attangnga lalammu lamuliang na attolongi ri bendina laaji kitta' Nabbi Yesaya.

²⁹ Jari lakuamo Nyaha Allataala mange ri Filipus, ”A'lampamoko mange konjo na muampiki bendi injo!”

³⁰ Lassirimu Filipus mange konjo na lalangngere pagahe sapo karaeng injo attangnga ngaji kitta' Nabbi Yesaya. Akkuta'nangi Filipus, ”Ripahang juai nuriaji intu, karaeng?”

³¹ Appihalimu, ”Anteekamua akkulle kupahang ampa gele rie' tulaseseianga?” Jari ia laerai Filipus nai' na lasuroi attolong riampi'na.

³² Kitta' nulaaji injo appakonni pauna: Assimpole sikaju jimbala Ia rierang mange ri panyumbeleang; na assimpole ana' jimbala ammottoki ri a'rakang tau lakukkuru injo bulunna, appakonjomu Ia gele labungkara babaNa.

³³ Lalang rikatunaanNa, Ia gele risare kaadelang; inaimo a'ra' lalagarai paassalanNa? Saba' nyahaNa rialle battu ri lino.

³⁴ Jari lakuamo pagahe ri sapo karaeng injo mange ri Filipus, ”Nakke a'ra' laakkuta'nang mange ri kau, risesena inai nabbi appau appakonjo? Ripassala'na kalenna to'jua iyareka ripassala'na tau maraeng?”

³⁵ Jari pakaramulamu Filipus a'bisara na lapoongi battu ri pau injo ia lapappiissekangi Injili ripassala'na Isa mange ri ia.

³⁶ Latarrusangi lampana, na ambattui rise're tampa' nurie' ere. Jari lakuamo pagahe ri sapo karaeng injo, ”Janjangi, ri injo mange rie' ere; apa rie' nugele siratang mae ri nakke laririo?” [

³⁷ Appihali Filipus, ”Ampa tappa'ki risiganna'na atita, akkullei.” Pappihalinna, ”Nakke tappa'ma ma'nassana Isa Almase Ana' Allataala.”]

³⁸ Tau Etiopia injo lasuro pataangi bendina, jari naungimu ampai mange ri ere injo, baji' Filipus na injo pole pagahe sapo karaeng injo, maeng injo larioi Filipus.

³⁹ Sungka'i muliangimo battu ri ere injo, Nyahana Allataala sikali laerangi Filipus a'lampa na pagahe ri sapo karaeng injo gelemu lajanjang poleang. Ia latarrusang lampana lalang rikarannuang.

⁴⁰ Mingka Filipus rie'mu ri Asdod. Ia a'lingkai a'molong ri tampa' injo na appala'bangi Injili risikonjo kota sa'genna ia ambattu ri Kaisarea.