PAU-PAUWANNA SIKONJO SURO-SURO 7 - Kitta' Passitallikang Bau KAREBA BAJI'

Pappihalinna Stefanus 7:1-53

¹ Lakua Imang Bakka' injo, ”Appakonjo toje'i?”

² Appihali Stefanus, ”Oe urang siana' mala'biriku na ditte ngase' amma-amma intu, pilangngeri! Allataala kaminang la'biri maeng lapappijanjangammu kalenNa mange ri puwa-puwata Abraham, rihattunna juapa ia ammari ri Mesopotamia, rigelenapa ia ammari ri Haran,

³ na appaui mange ri ia: Ansulu'ko battu ri kampommu na battu ribija-bijammu na a'lampako mange ri pammariang laKujo'jokang injo mange ri kau.”

⁴ Jari ansulu'mu ia battu ri Kasdim, maeng injo ammari ri Haran. Sungka'i matemo ammanna, lasuro pole Allataala a'lette' battu ri injo mae ri tana inni, tampa' pammariammu konni-konnina;

⁵ na ri injo Allataala gele assare tana pusaka mange ri ia, manna sipala'lima gele rie', mingka Ia assapattai laassare tana mange ri ia laa'jari anunna na anu rilo'loranna, manna rihattu injo tide'pa ana'na.

⁶ Appakonni pauna Allataala ma'nassana lo'loranna laa'jari tubattu-battu ri pammariang nugele lakabiasai na laripaa'jari atai na larisissai patambilangang taung sallona.

⁷ Mingka bangsa ngatai injo ri iyai laKusarei hukkungang, appakonjomu Pauna Allataala, na rimaenna injo laansulu'i pole battu ri injo na lanyombai mae ri Nakke ri tampa' inni.

⁸ Maeng injo Allataala assare mange ri ia sapatta nuripakajarre' lalang risunna'; na ri appakonjona Abraham rie' ana'na, Ishak, jari lasunna'i ri allo makakaruana, na lshak rie' ana'na, Yakub, na battu ri Yakub assala'na sampulorua injo puwa-puwata.

⁹ Passabakang iri ati, puwa-puwata labalukangi Yusuf mange ri tana Massere, mingka ia lapinahangi Allataala,

¹⁰ na lapakalappasai battu risikonjo passissa surang lasare pangamaseang na pangisse', rihattu a'lampana mange ri Firaun, karaeng ri Massere. Firaun laangka'i a'jari ponggaha ri tana Massere na risikonjo assi saponna.

¹¹ Maeng injo rie'mo bala kalarakang bakka' risibatu tana Massere surang ri tana Kanaan na appakaammumbai kamarasaiang bakka', jari puwa-puwata gelemu nguppa kanre.

¹² Mingka rihattu lalangngere'na Yakub ma'nassana ri tana Massere rie' bae gandong, ia lasuroi puwa-puwata mange konjo. Iamo injo ria'lampa bungasa'na;

¹³ rimange pinruannaimo Yusuf lapappiissekammu kalenna mange ri uranna siana', jari kaissekammu assala'na Yusuf mange ri Firaun.

¹⁴ Maeng injo Yusuf lasuro allei Yakub, ammanna, na sikonjo bija-bijanna, tujupulolima tau lohena.

¹⁵ Jari a'lampamu Yakub mange ri tana Massere. Konjomu mange ia mate, ia na puwa-puwata;

¹⁶ buku-bukunna lapaletteki mange ri Sikhem na lataro ri pa'kuburang numaeng lahalli injo Abraham make doe' salaka battu ri ana'-ana'na Hemor ri Sikhem.

¹⁷ Sungka'i hattu lappa'rupa sapatta nulasareang injo Allataala mange ri Abraham pela' attamba lohei bangsa injo ri Massere,

¹⁸ sa'genna rie'mo se're karaeng maraeng marenta ri tana Massere, tugelemo laisse' Yusuf.

¹⁹ Karaeng injo laakkali puwa-puwata na lasissai puwa-puwata surang gele lasuro jampangi ana' lolonai, solanna gele akkulle tallasa.

²⁰ Rihattu injomo Musa rilaherang na ia baji'i ri matanna Allataala. Tallumbulangi sallona ia rikatuho ri saponna ammanna.

²¹ Maeng injo ia ripela'i, mingka ana' bahinena Firaun ladurui na lakatuho assimpole ana' kalenna.

²² Musa riajara pole lalang risikonjo pangissengang tau Massere, na ia kahasai lalang ripa'bisara na panggeokanna.

²³ Rihattunna ia a'ummuru patampulo taung, rie'mo ri atina a'ra' lamange ripassiana'na, iamo intu taunna Israele.

²⁴ Rihattu injo ia anjanjangi se're tau risissa rise're tau Massere, jari ia latulungi na labalii tau risissa injo ampai lahuno tau Massere injo.

²⁵ Pangisse'na Musa, sikonjo passiana'na lapahammu ma'nassana Allataala lapakei laappakasalama' ri iyai, mingka gele lapahangi.

²⁶ Mintara'na mae ia rie'i pole mange konjo na rihattu injo rie' rua tau Israele a'laga, jari a'ra'i lapa'bajikang, lakua: Urang siana'ku! Gelejua kau inni tuassiana'? Ngura kau assipa'ri'-pa'risi?

²⁷ Mingka tau sala injo mange ri uranna lasorongi Musa na lakua: Inai laangka'ko a'jari ponggaha na hakking ri kambe?

²⁸ Barang a'ra' todo'kang lamuhuno, assimpole muhunona tau Massere injo risuhangngi?

²⁹ Rilalangngere'na pau injo, larimu Musa na tallasai assimpole tubattu-battu ri tana Midian. Konjomu mange laanakang rua ana' bura'nena.

³⁰ Sugkai patampulo taung pole sallona, kajanjangammu mange ri ia se're malaeka' Allataala ri parang luara'na Bonto Sinai lalang ri bola' api ansulu' battu ri rompo' katinting.

³¹ Ammangnga-mangngai Musa ri lajanjanna passala injo, na rihattunna a'lampa mange konjo laanjanjang seppa', rie'mo sa'ranna Allataala mange ri ia:

³² Nakkemo Allataalana puwa-puwamu, Allataalana Abraham, Ishak na Yakub. Annetterei Musa na gelemu barani laonga.

³³ Maeng injo appaui Allataala mange ri ia: Pu'nusui sandalamu battu ri bangkemmu, saba' tampa' pammentengammu iamo tana tangkasa.

³⁴ Kupariati toje'mu kamarasaianna umma'Ku ri tana Massere na Kulangngeremu parauna, na Nakke naung mae laKupakalappasa ngase'i, na kaumo laKusuro mange ri tana Massere.

³⁵ Musa tumaeng injo latollaki riappauna: ”Inai laangka'ko a'jari ponggaha surang hakking?” – Musa tommo maeng risuro ri Allataala a'jari ponggaha na pappakasalama' ri malaeka' numaeng lapappijanjangang injo kalenna mange ri ia ri rompo' katinting.

³⁶ Iamo laurangi ansulu' na lohe kajariang gele samara na tanra-tanra ri tana Massere, ri Tamparang Eja na ri parang luara patampulo taung sallona.

³⁷ Musamo inni maeng appau mange ri taunna Israele: Se're nabbi assimpole nakke inni lalapaenteng Allataala mange ri kau battu ripassianakammu.

³⁸ Musa innimo a'jari patteteang lalang ripa'rappunganna jamaah injo ri parang luara battu ri malaeka' appau injo mange ri ia ri Bonto Sinai na ri puwa-puwata; na iamo maeng narima sikonjo pau attallasa nulapabattu injo mae ri ditte.

³⁹ Mingka puwa-puwata gelei appilangngeri mange ri ia, na latolla'i. Lalang ri atinai a'ra'i lamuliang mange ri tana Massere.

⁴⁰ Lakuaimo mange ri Harun: Pa'buakangkang somba-sombaang laa'lingka ri a'rakamba, saba' Musa inni tulaurang injokang ansulu' battu ri tana Massere – gelei taisse' apamo a'jari ri ia.

⁴¹ Jari rihattu injo a'buakimu se're tau-tau ana' tedong na assare passidakka mange ri sombaang labua' injo na a'rannu-rannu ngase'i ripassala nulabua' injo to'jua.

⁴² Jari a'bokomu Allataala battu ri iyai na lalappasangi nyomba-nyombai mange ribakkalang tantarana langi', assimpole rie' ta'ukiri lalang ri kitta'na nabbi-nabbi: Apa assidakkai juako mae ri Nakke koro'bang sumbeleang na assare passidakka patampulo taung sallona ri parang luara injo, oe tau Israele?

⁴³ Numubuleki injo jua sapo-saponna sombaang Molokh surang bintoeng Refan sombaammu, tau-tau numaeng injo to'jua mubuaki lamusomba. Injomo saba'na, laKuerangiko mange ri tana pamelakang, nusanna' derena sa'genna ri tana taunna Babel.

⁴⁴ Sapo-sapo Passa'biang rie' ri puwa-puwata ri parang luara, assimpole nulapassuroang injo Allataala mange ri Musa lalabua'i assituru' pina'-pinahangang numaeng lajanjang injo.

⁴⁵ Sapo-sapo injo latarima puwa-puwata na lalang ripanguranna Yosua rierangi antama' ri tana inni rihattunna tana inni rialle battu ri tau maraeng tulabongka injo Allataala ri a'rakanna puwa-puwata; appakonjomu sa'genna larapi' jammanna Daud.

⁴⁶ Daud maengi nguppa pangamaseang ri a'rakanna Allataala na ia laerai, solanna ia ripa'biangi appaenteng se're tampa' pammariang ri Allataalana Yakub.

⁴⁷ Mingka Sulemanpa lapappaentengangi se're sapo tujunna Allataala.

⁴⁸ Mingka Tukaminang la'biri injo gele ammari lalang ri sapo bua' limanna rupatau inni, assimpole nulapau injo ri nabbi:

⁴⁹ Langi' iamo intu pattolongangKu, na tana iamo intu pa'lisakang bangkengKu. Sapo apamo lamupaenteng ri Nakke, appakonjomu pauna Allataala, tampa' apamo laa'jari pammariangKu?

⁵⁰ Gelejua limangKu to'jua a'bua' iangase'na inni?

⁵¹ Oe tau kumbala, tuterasa ati surang bongolo, kau sanging mubaliangi Nyaha Tangkasa, assimpole puwa-puwamu, appakonjo todo'i kaui.

⁵² Anteeammo battu risikonjo nabbi gele risissa ri puwa-puwamui? Na lahunoi sikuanna tau la'bi riolo injo appala'bang palarie'na Tau Naba, nakonni-konnina maeng mukeloi ampai muhuno.

⁵³ Kaui maeng mutarimai hukkung Tora' nulapabattu injo malaeka' Allataala, mingka gelei muturuki.”

Stefanus rihuno – Rie'i Saulus 7:54–8:1a

⁵⁴ Sungka'i sikonjo uranna Hakking Agama lalangngere iangase'na injo, sanna'mu siri'nai. Jari sarromu kuku'nai sa'genna a'rekuki giginna.

⁵⁵ Mingka Stefanus, turassi injo ri Nyaha Tangkasa, ammongai nai' ri langi', jari lajanjammu kala'biranna Allataala na Isa ammenteng risa'ri kananna Allataala.

⁵⁶ Jari lakuamo, ”Toje'i, kujanjammu ta'bungkara langi' na Ana' Rupatau ammenteng risa'ri kananna Allataala.”

⁵⁷ Mingka a'gora-goraimu na lalampangi tolinnai, ampai ladomungi.

⁵⁸ Larenrengimu ansulukang kota, ampai labunduki batu. Sikonjo sa'bi lataro baju bakka'na ri a'rakanna se're bura'ne longko turiareng Saulus.

⁵⁹ Rilabundukinna juapa batu ngera dowaangi Stefanus, lakua, ”O Karaeng Isa, allei nyahaku.”

⁶⁰ Riakkolantu'na ia a'nga'ngara bakka'i, ”Karaeng, andai ripitanggongiang kadorakaang inni mange ri iyai!” Rimaenna appau appakonjo, ia matemu.