PAU-PAUWANNA SIKONJO SURO-SURO 6 - Kitta' Passitallikang Bau KAREBA BAJI'

Tuju tau ripile lanjampangi tau kaasi-asi 6:1-7

¹ Rihattu injo, sungka'i pela' katambaang jumallana tuminahang ri Karaeng Isa, lohemo tau Yahudi a'bisara Yunani a'moro-moro mange ri tau Ibrani injo, saba' pambageang kaparalluang allo-allona mange ribalu-baluna gelei allo-allo lajampangi.

² Sampuloiya rua suro-suro mangei lakeo' ngase' laa'rappungi sikuanna tau minahang ri Karaeng Isa na lakua, ”Gele baji' ampa gelei tapappiissekang Pauna Allataala lanjampangi ri mejang.

³ Injomo saba'na, urang siana', anjo'jokiko tuju tau battu ri kaui, tau muisse' injo baji' na rassi Nyaha Tangkasa na ngisse'i, solanna lataangka'i rijama-jamaang injo,

⁴ na solanna kambe akkulle tapa'batu nyahaba lalang ripangera dowaang na appala'bang ri Pauna Allataala.”

⁵ Pangera injo ritarima baji'i risikonjo jamaah, jari lajo'jokimu Stefanus, se'rei tau jarre' tappa'na ri Karaeng Isa na rassi Nyaha Tangkasa, na Filipus, Prokhorus, Nikanor, Timon, Parmenas na Nikolaus se'rei papinahang ri agama Yahudi battu ri Antiokhia.

⁶ Iyai injo ripaa'ra' mange ngase'i ri suro-suro injo, jari suro-suro injo ngera dowaangi na lapatompangi pala' limanna rateang ulunnai.

⁷ Pela' alla'bangi Pauna Allataala na jumallana tau tappa' ri Yerusalem pela' attambai lohei; injo pole siloheammo imang a'jari tappa' mange ri Karaeng Isa.

Pappitina mange ri Stefanus 6:8-15

⁸ Stefanus, turassi injo pangamaseang na kahasa, appaa'jari numasagala na tanra-tanra ritangnga-tangngana tau lohe injo.

⁹ Mingka rie'mo sikura tau battu ri jamaah Yahudi nuriare' injo sossorang tau Maradeka – assala'na battu ri Kirene na Aleksandria – assurangi tau Yahudi battu injo ri Kilikia na battu ri Asia. Iyai injo assikuta'nangi pangisse' surangi Stefanus,

¹⁰ mingka gele akkulle lapisauri pangisse'na saba' Nyaha Tangkasamo lasuroi a'bisara.

¹¹ Maeng injo lohemo tau lakeo' laappau, ”Ia maengi talangngere appau pattua-tua mange ri Musa na Allataala.”

¹² Lalang ri appakonjonamo na a'buakimu pappakahussang ritangngana tau lohe injo surang ri tutoa-toa na guru Tora'; jari lajakkalimu Stefanus, ampai larenrengi na laparapa'i mange ri Pangadelang Agama.

¹³ Maeng injo appauimu sa'bi bura, ”Tau inni gelei minang ammari-mari attua-tua mange ri tampa' tangkasa inni surang ri hukkung Tora',

¹⁴ saba' kambe maemmu talangngere ia appau ma'nasana Isa, tau Nazaret injo, lalaruntungi tampa' inni na lapinrai kabiasaang nulapappiharisang injo Musa mae ri kambe.”

¹⁵ Sikuanna tau rie' attolong lalang ripa'rappungang Pangadelang Agama injo latangarai Stefanus, maeng injo lajanjangi rupanna Stefanus assintappai se're malaeka'.