PAU-PAUWANNA SIKONJO SURO-SURO 4 - Kitta' Passitallikang Bau KAREBA BAJI'

Petrus surang Yahya ri a'rakanna Pangadelang Agama 4:1-22

¹ Rihattunna Petrus surang Yahya a'bisara juapa mange ri tau lohe injo, lohemo imang na ponggaha ri Sapo Allataala surang tau Saduki mange ri iyai.

² Iyai injo sarro kuku'na saba' Petrus surang Yahya ngajarai ri tau lohe na lapappiissekangi ma'nassana lalang ri Isa rie' katallasang battu rikamateang.

³ Petrus surang Yahya rijakkalai na ripantama'i ri pattarungkuang sibangngi, saba' sa'ra'mu allo.

⁴ Mingka tau allangngere injo ajaranna lohemo a'jari tappa', jari katambaangi jumallana limansa'bu tau bura'ne.

⁵ Ri mintara'na mae sikonjo ponggaha surang tutoa-toana Yahudi na sikonjo guru Tora' a'rappungi ri Yerusalem,

⁶ na Imang Bakka' Hanas surang Kayafas, Yahya surang Aleksander na tau maraeng tuina Imang Bakka'.

⁷ Maeng injo Petrus surang Yahya riparapa'i mange ri tau a'rappung injo na riparessai lalang ri pakkuta'nang inni, ”Lalang kahasa anteeang iyareka lalang arenna inai namugeokangi passala injo?”

⁸ Jari Petrus, lalang kahasa ri Nyaha Tangkasa, appihali mange ri iyai, ”Oe ponggaha umma' intu na tutoa-toa,

⁹ ampa pade' konni-konnina parallukang riparessa kanara se're panggeokang baji' mange rise're tau garring na parallui tasesei lalang kahasa anteeang na tau intu akkulle ripakagassing,

¹⁰ jari piisseki kau ngase' na sikuanna tau Israele ma'nassana lalang arenna Isa Almase, tau Nasaret, tumaeng injo musalliki, mingka ripakaattallasai ri Allataala battu rikamateang – ma'nassana kanaranamo Isa tau intu rikonni-konnina ammentengi ri a'rakammu.

¹¹ Isamo intu ripassimpole batu maeng ripela' injo ri tukang batu – iamo intu kau –, mingka Ia maeng a'jari batu pallangga possi' sapo.

¹² Gele rie' kasalamakang manna ri inai jua rimaraenganna lalang ri Ia, saba' rahanganna langi' inni gele rie' areng maraeng risareangi mange ri rupatau inni nurikanaranamo akkulleki salama'.”

¹³ Sungka'i tau a'rappungi injo lajanjangi kabaranianna Petrus surang Yahya na laisse'i ma'nassana ruaiya tau samara na tugelejua langkasa sikolana, ammangnga-mangnga ngase'mu; na laisse'i ruaiya tumihanang ri Isa.

¹⁴ Mingka saba' lajanjanna tau ripakagassing injo ammenteng ri ampi'na suro rua injo, gelemu akkulle lagagai.

¹⁵ Rihattu laparentainna suro injo labokoi pangadelang injo, assikuta'nangimu

¹⁶ na lakua, ”Apamo larigeokang mange ri tau rua inni? Saba' laisse' ngase'i tau ri Yerusalem ma'nassana iyai maengi appaa'jari numara'-maraeng na ditte gelei akkulle risassali.

¹⁷ Mingka solanna passala injo andai pela' alla'bang mange-mange ri tau lohe injo, baji'i rigarattaki na ripisangkai, solanna iyai gele labisarai pole manna mange ri inai jua lalang areng injo.”

¹⁸ Sungka'i ruaiya risuro antama', riparenta ngase'i solanna gele sikali labisara iyareka langajara pole lalang arenna Isa.

¹⁹ Mingka appihali Petrus surang Yahya mange ri iyai, ”Kau tommo mutappuki anteeang naba ri a'rakanna Allataala: a'ra'mu kugeokang iyareka a'ra'na Allataala.

²⁰ Saba' gele ma'ring ri kambe lagele a'bisara ripassala numaeng injo tajanjang surang talangngere.”

²¹ Pela' sarro panggarattakinna mange ri suro injo, mingka rikamaenganna lalappasangi juai, saba' tau a'rappungi injo gele rie' patteteang lauppai laassare hukkungang mange ri iyai saba' lohe tau appakala'biri arenna Allataala saba' rie'na numaeng kajariang.

²² Tau ripakagassing injo rikajariang nugele injo samara la'bimu patampulo taung ummuru'na.

Pangera dowaanna jamaah 4:23-31

²³ Sungka'i maeng rilappasangi Petrus surang Yahya a'lampai mange riurannai, jari lalagarang ngase'i nulapau injo sikuanna imang ponggaha na tutoa-toa injo mange ri iyai.

²⁴ Rihattu lalangngerinna urannai passala injo, assamaturukimu ngera dowaang ri Allataala, ”O Karaeng, Dittemo appaa'jari langi' surang lino, tamparang na sikonjo assinna.

²⁵ Ri Nyaha Tangkasa patteteang ri Daud atanTa, ammamba, Ditte maeng appau: Ngura hensoi sikonjo bangsa, ngura sikonjo pinangka' a'naha-naha ripassala nutide' matu-matunna?

²⁶ Sikonjo karaeng ri lino apparuru ngase'mu na sikuanna pamarenta asse're lalabaliangi Allataala na Tumaeng ribarakkaki injo.

²⁷ Saba' sitoje'na maeng asse'remu lalang ri kota inni Herodes na Pontius Pilatus surang sikonjo bangsa na sikonjo pappuwaang ri Israele lalabaliangi Isa, ata tangkasa'Ta, Turibarakkaki injo,

²⁸ lalageokangi sikuanna numaeng Ritantuang minang ripakaramulana assituru' kahasa surang ria'ra'Ta.

²⁹ Konni-konnina, o Karaeng, janjammu panggarattakinna, na sarei sikonjo atanTa kabaraniang sukku' laappala'bang pauTa.

³⁰ Patanjo limanTa laappakagassing tau garring, na appa'rie'i tanra-tanra surang kajariang numasagala injo rikanara arenna Isa, AtanTa Tutangkasa injo.”

³¹ Na rihattunna juapa ngera dowaang, anggeommu tampa' pa'rappungannai na ladongkoki ngase'i Nyaha Tangkasa, maeng injo lapala'bangimu pau Allataala lalang rikabaraniang.

Ta'ra tallasa'na jamaah 4:32-37

³² Passe're-se'reanna tau tappaki injomo a'julu ati surang assamaturu' ngase'i, na gele rie' manna se're tau appau ma'nassana ampa rie' pakkalumanyanganna injo gele anu kale-kalena to'jua, mingka sanging nulapa'jului.

³³ Lalang rikahasa bakka' sikonjo suro assare passa'bi ripassala attallasa'na muliang Karaeng Isa na iyai ngase' tallasa kala'bi-la'biangi lalang ripangamaseang.

³⁴ Saba' tide' manna se're tukakurangang ri iyai, saba' sikonjo turie' tanana iyareka saponna, labalukangi, na laerangi ballinna,

³⁵ na lapassareangi mange ri suro-suro injo ampai lapa'dahu-dahuang risikuaanna tau rie' ri injo assituru' kaparalluanna.

³⁶ Appakonjo todo'i Yusuf, risikonjo suro laarengi Barnabas, battuanganna ana' panyihi-nyihi, ia se'rei sosssorang tau Lewi lahere ri Siprus.

³⁷ Ia labalukangi kokonna, ampai laerang ballinna na lapassareangi mange ri suro-suro injo.