PAU-PAUWANNA SIKONJO SURO-SURO 3 - Kitta' Passitallikang Bau KAREBA BAJI'

Petrus appakagassing tau pesu' 3:1-10

¹ Rie' se're allo rilaseppa'na hattu passambajangang, iamo intu tette' tallu karahie', Petrus na Yahya mange ri Sapo Allataala.

² Ri injo rie' se're bura'ne pesu' minang riampana rilaherang jari parallui ribule'. Allo-alloi tau injo ritaro riampi' babaang Sapo Allataala, nuriare' Babaang Baji', langera passidakka ri tau laantama' injo ri Sapo Allataala.

³ Sungka'i lajanjang ma'nassana Petrus na Yahya a'ra'i laantama' ri Sapo Allataala, ia ngerai passidakka.

⁴ Latangarai na appaui Petrus, ”Tangarakang mae.”

⁵ Jari tau injo latangari toje'i lalang ripattajalliang languppa passidakka battu ri iyai.

⁶ Mingka appaui Petrus, ”Bulaeng surang salaka tide' ri nakke, mingka apa nurie' ri nakke, kupassareangi mange ri kau: Lalang arenna Isa Almase, tau Nasaret injo, ammentengko na a'lingkamoko!”

⁷ Maeng injo labitantang lima kananna na lapaentengi. Rihattu injo jua hukumu kolantu'na surang pa'galangang bangkenna tau injo.

⁸ Ammenteng ka'jangi ampai a'lingka mange-mange na minahangi ri iyai antama' ri Sapo Allataala, ampai a'lingka-lingka surang a'lumpa'-lumpa'i na lapakala'biri Allataala.

⁹ Sikuanna tau lajanjangi ia a'lingka-lingka ampai appakala'biri ri Allataala,

¹⁰ jari laissekimu iamo tau sanging rie' injo ngera-ngera passidakka riampi'na Babaang Baji' ri Sapo Allataala, jari ta'bangka ngase'mu na ammangnga-mangngai ripassala numaeng injo kajariang ri ia.

Hato'bana Petrus ri Tambing Suleman 3:11-26

¹¹ Saba' tau injo tulusu minahangi ri Petrus na ri Yahya, jari tau lohe ammangnga-mangnga injo riekimu a'domung ri tambing riare' injo Tambing Suleman.

¹² Sungka'i lajanjang passala injo Petrus, ia appaui mange ri tau lohe injo, ”Oe tau Israele, ngura ta'bangkaiko ripassala kajariang injo na ngura mujanjang assimpole kambemo tapaa'jari tau inni akkulle a'lingka kanara kahasa iyareka kalambusanna to'jua atiba?

¹³ Allataala ri Abraham, ri Ishak surang ri Yakub, Allataalana puwa-puwata maeng lapakala'biri suroNa, iamo intu Isa tumaeng mupassareang injo na musangkali ri a'rakanna Pilatus, manna injo Pilatus latappuki lalapakalappasa Isa.

¹⁴ Mingka kau maeng mutolla'i Tutangkasa na Tutoje', surang mukaa'raki se're pahuno ripakalappasangiko.

¹⁵ Kauimo maeng muhunoi pappoonganna katallasang inni, mingka Allataala lapakaattallasai muliang Isa battu risikuanna tau mate; na ripassala injo kambemo sa'bi.

¹⁶ Saba' katappakang mange ri arenna Isa, jari Areng injomo appakagassing ri tau mujanjang na tau muisseki inni; na katappakang injomo maeng assare kagassingang mange ri tau inni ri a'rakammu ngase'.

¹⁷ Oe, urang siana', kuisse'i ma'nassana mugeokang appakonjo saba' geleinna muisse' apa mugeokangi, assimpole todo' sikonjo ponggahamu.

¹⁸ Mingka ri appakonjonamo Allataala lapa'rupai numaeng lapau injo riolo mange ri nabbi-nabbiNa, iamo intu ma'nasana Almase Tulasuro injo parallui lasissa.

¹⁹ Injomo saba'na ngu'rangiko na jarrako, solanna riampungi kadorakaammu,

²⁰ solanna Allataala appabattui hattu kalogaang, na lasuroi Isa, numinang ripakaramulana ripattantu ri kau laa'jari pappakasalama'mu.

²¹ Almase injo parallu ammari ri suruga sa'genna larapi' hattu pa'bajikang assimpole nulapau injo Allataala mange ri nabbi-nabbiNa riolo.

²² Gelejua maengi lapau Musa: Karaeng Allataala laappaenteng ri kau se're nabbi battu ri urang siana'mu, assimpole nakke: Iamo pilangngeri lalang risikuanna nulapau injo mange ri kau.

²³ Na laa'jari ma'nassana sikuanna tau gele lapilangngeri nabbi injo, larihuno ritangnga-tangngana jamaah.

²⁴ Injo pole, sikonjo nabbi maeng ngase'i labisara, pakaramula Nabbi Samuel, na turie' injo mae ribokoanganna ia, maeng lapappasangangi ripassala'na jammang inni.

²⁵ Kaumo tuharisi'na pappasang injo na languppako dahuang lalang ripassitallikang numaeng labua' injo Allataala mange ri puwa-puwata, rihattunna Ia appau mange ri Abraham: Battu rituimu sikuanna tau ri lino inni languppa barakka'.

²⁶ Ri kaumo uru-uruna Allataala appaenteng AtanNa na Ia lasuro mange ri kau, solanna Ia labarakkakiko na lapakaa'gilingko battu risikonjo sipa' daamu.”