PAU-PAUWANNA SIKONJO SURO-SURO 25 - Kitta' Passitallikang Bau KAREBA BAJI'

Paulus ri a'rakanna Festus Laerai ripamange ri Kaisar 25:1-12

¹ Sungka'i tallungallomo riekinna ri propinsi injo a'lampamu Festus battu ri Kaisarea mange ri Yerusalem.

² Ri injo sikonjo imang ponggahana tau Yahudi na tau Yahudi rikangalikang injo mangei ri ia na lapaui pappitinana ri Paulus.

³ Mange ri ia laerai se're passare nulaappakasilaka ri Paulus, iamo intu lasuroi Paulus mange ri Yerusalem. Saba' a'buaki passamaturukang lalahunoi Paulus ritangnga lalang.

⁴ Mingka appihali Festus ma'nassana Paulus tulusu ritahangi ri Kaisarea na manna ia a'ra'i lassiri muliang mange konjo.

⁵ Lakuamo, ”Injomo saba'na bajikang sikuanna tau rie' paralluna minahangi ri nakke mange konjo na konjopai mange mupau palakaramu mange ri ia, ampa pade' rie' kasalaanna.”

⁶ Festus ammari ri Yerusalem gele la'bi rikarua iyareka sampulo allonna. Maeng injo ia muliammu mange ri Kaisarea. Rimintara'na mae a'rappungimu ri pangadelang, na lasuro keo'i Paulus.

⁷ Sungka'i ambattumo Paulus ri injo, sikuanna tau Yahudi rie' injo battu ri Yerusalem ammentengi risiappuna na lohe pappitina lapaui mange ri ia nugele akkulle lapa'rupa.

⁸ Sibale'na Paulus lalambusi kalenna, lakua, ”Nakke manna siso'di' tide' nusala kugeokang, baji' injo mange ri hukkung Tora'na tau Yahudi inni iyareka mange ri Sapo Allataala iyareka mange ri Kaisar.”

⁹ Mingka Festus a'ra'i laboja nyaha baji'na tau Yahudi injo, appaui, ”A'ra' juako a'lampa mange ri Yerusalem, solanna kau riadeli konjomange ri a'rakangku passala ripassilolongang inni?”

¹⁰ Mingka appaui Paulus, ”Konni-konnina nakke ammenteng ri inni ri a'rakang pangadelanna Kaisar na ri innimo nakke parallu ri adeli. Assimpole kau baji' muisse'na, manna siso'di' nakke tide' geo' sala kugeokang mange ri tau Yahudi intu,

¹¹ jari, ampa rie' salaku na rie' panggeokang daa nusiratang larihukkung mate, nakke sadiama mate, mingka, ampa pappitinana injo mae ri nakke nugele toje', gele rie' manna se're tau akkulle lapassareanga mange ri iyai. Kuerai riparapa'a ri Kaisar!”

¹² Rihattu maennamo sipa'bisara uranna hakking ri pangadelang injo, appihalimu Festus, ”Muerai laripamange ri Kaisar, jari parralluko a'lampa mange ri Kaisar.”

Paulus ri a'rakanna Agripa na Bernike 25:13-27

¹³ Sikurangallo maenna injo rie'mu karaeng Agripa surang Bernike ri Kaisarea lamange a'lingka-lingka ri Festus.

¹⁴ Saba' iyai ammari ri injo sikurangallo sallona, Festus lapau ngase'i palakarana Paulus mange ri karaeng injo, lakua, ”Ri inni mae rie' se're tau ritarungku lataroanga Feliks.

¹⁵ Rihattu rie'ku ri Yerusalem, sikonjo imang ponggaha na tutoa-toana Yahudi injo lapabattui pappitinana mange ri tau injo na laerai solanna ia rihukkung.

¹⁶ Appihalia mange ri iyai gelei appakonjo kabiasaanna tau Roma inni lapassareangi tau ritarungku inni ampa gelepai ripassiuppaang tau appitina injo na risarei pole hattu lalapau lambusui kalenna ripappitina injo.

¹⁷ Injomo saba'na minahang ngase'i ri nakke mae konni. Rimintara'namo mae lassirima a'bua' pa'rappungang pangadelang na kusuro passiuppaangi tau injo.

¹⁸ Mingka rihattunna sikuanna tau appitina ammenteng riampi'na, gelejuai appau manna se're pappitina passala geo' daa assimpole nukukuangang injo.

¹⁹ Mingka iyai sangga assisala pahanginna jua surangang ia ripassala agamanai, na risesena se're tau riareng Isa, Tumatemo, mingka Paulus lapaui lalang rikatojekang ma'nassana Ia attallasai muliang.

²⁰ Saba' bata-bataa anteekamua ta'rangku parallu lamaressa ripalakara assimpole inni, jari akkuta'namma mange ri ia barang a'ra'i a'lampa mange ri Yerusalem, solanna palakarana inni ri adeli ri injo.

²¹ Mingka Paulus a'ra'i riadeli ri pangadelang langkasang. Laerai, solanna ia ammari lalang ri pattarungkuang ri inni na latajangi sa'genna palakarana ritappuki ri Kaisar. Injomo saba'na ia kusuro tarungkui sa'genna akkulle kusuro erang mange ri Kaisar.”

²² Lakuamo Agripa mange ri Festus, ”A'ra' todo'i kupilangngeri pauna tau injo.” Appihali Festus, ”Mintarapa namulangngere pauna.”

²³ Rimintara'na mae rie'mu Agripa surang Bernike lalang risikonjo kabakkakanna na riantamakinna ri pangadelang a'rurung ngase'i sikonjo ponggaha pajaga surang sikuanna tau rikangalikang ri kota injo, Festus lasuro keo'i Paulus.

²⁴ Appaui Festus, ”Oe, karaeng Agripa surang sikuanna tau rie' ri inni surang kambe. Janjammu tau inni, turipitina injo risikuanna tau Yahudi, baji' turie' injo ri Yerusalem, iyareka turie' injo konni mae. Rieki ngase'mu mae ri nakke na a'nga'ngara bakkaki lakua ma'nassana ia gele akkulle sallo attallasa.

²⁵ Mingka rikuisse'na ma'nassana tau inni tide' jua panggeokang sala maeng lageokang manna se're nasiratangi larihukkung mate, na kanara a'ra'na lamange ri Kaisar, kutappukimu kusuro erangi mange ri Kaisar.

²⁶ Mingka gele rie' manna se're nua'nassa lakuukiri mange ri Kaisar ripassala'na tau inni. Injomo saba'na ia kuerangi mae konni ri a'rakammu ngase', la'bipa pole mange ri ditte karaeng Agripa, solanna, rimaennamo riparessa, rie'mo nuakkulle kuukiri.

²⁷ Saba' assituru' panguppaku gelei laalle naha-naha laassuro ngerang se're tau ritarungku ampa gelepai a'nassa sikuanna pappitina injo mange ri ia.”