PAU-PAUWANNA SIKONJO SURO-SURO 24 - Kitta' Passitallikang Bau KAREBA BAJI'

Paulus ri a'rakanna Feliks 24:1-27

¹ Limangallo maenna injo rie'mu Imang Bakka' Ananias surang sikonjo tutoa-toa na se'rei pa'bisara turiareng Tertulus. Mange ngase'i ri gubernur na nalapabattui pappassalanai mange ri Paulus.

² Rikeo'i Paulus mange ri a'rakanna na pakaramulamu ripassala ri Tertulus, lakua, ”Feliks tumala'biri'ku, passabakang rikaresotamo natulusu rie' kasannangang ri antee-tee mae, na rikabajikantamo lohe sikalimo nubaji' rigeokang ri bangsa inni.

³ Iangase'na injo tulusui na ri antee-tee juai mae kambe tapanai' sukkuru'ba.

⁴ Mingka solanna andamo lohe hattummu la'busu, kuerai, solanna ripilangngerikang sinampe' lalang rikabajikanna nyahamu nubaji' injo kaissekanna.

⁵ Kambe tauppai ma'nassana tau inni iamo ngerang garring a'lele, se'rei tau appa'rie' papparukkaang risikuanna tau Yahudi risibatu lino na ma'nassana ia se'rei ponggaha risossorang tau Nasrani.

⁶ Ampa pole lasoba-sobai lapakarammasa katangkasanna Sapo Allataala. Injomo saba'na tajakkalai na a'ra'i taadeli assituru' hukkung Tora'ba.

⁷ Mingka ponggaha tantara Lisias rie'i lapisangkaikang na laalle passai battu ri limamba,

⁸ maeng injo lasuroi sikuanna tau appitina mange ri ditte. Ampa dittemo riparessai, akkullemu riisse' sikonjo pappitinaba mange ri ia.”

⁹ Tau Yahudi injo pole lasokongi pappitina injo rilapauna ma'nassana palakara injo appakonjo toje'i.

¹⁰ Gubernur injo a'bisara jo'jo'i mange ri Paulus ma'nassana ia akkulle a'bisara. Jari appaui Paulus, ”Kuisse'i ma'nassana attaungammo sallomu a'jari hakking ri tau lohe inni. Injomo saba'na gelema bata-bata kusa'bii palakaraku inni ri a'rakammu:

¹¹ Kau akkullei mupattantu ma'nassana gelepai la'bi sampulorua allo lappasa'na nakke mange ri Yerusalem laassambajang.

¹² Gelekale minang rie' tau lauppaa a'besere mange rise're tau iyareka a'bua' papparukkaang, baji' ri Sapo Allataala, iyareka ri sapo passambajangang maraeng, iyareka ri antee-tee mae tampa' ri kota inni.

¹³ Iyai gele akkulle lapappijanjangang mange ri kau apa nulapappitinaang injo mae ri nakke.

¹⁴ Mingka kulambusi kalengku mange ri kau ma'nassana nakke nyomba mange ri Allataalana puwa-puwaba ri minahangku ri Pa'lalangang Karaeng, iamo intu Pa'lalangang nulaareki injo se're ajarang bau. Nakke tappa'a mange risikuanna nuta'ukiri injo lalang ri hukkung Tora' na lalang ri kitta'na sikonjo nabbi.

¹⁵ Nakke rie' panrannuangku mange ri Allataala, assimpole todo' iyai intu ma'nassana larie' katallasang muliang risikuanna tau mate, baji' injo tau naba iyareka tau gele injo naba geo'na.

¹⁶ Injomo saba'na nakke tulusu kupa'gassing-gassingangi attallasa lalang ri ati tangkasa ri a'rakanna Allataala na rupatau.

¹⁷ Sungka'i attaungammo sallona mulianga pole mange ri Yerusalem langerang passare mange ri sikampongku na laassare passidakka.

¹⁸ Rihattu kugeokanna ngase' injo, rie'mo lohe tau Yahudi battu ri Asia larapikanga lalang ri Sapo Allataala, sungka'i maemmo kutangkasi kalengku, gele lohe tau na tide' todo' karukkaang.

¹⁹ Iyaimo intu sitoje'na parallu lamange ri kau ri inni na lapau palakarana, ampa pade' rie' passilolonganna mae ri nakke.

²⁰ Mingka lappasammu sikuanna tau rie' injo ri inni rikonni-konnina lapappiissekangi geo' daa anteekamua lauppa, rihattungku riparapa' mange ri Pangadelang Agama.

²¹ Iyareka ma'ringi kanara ripau nukupa'nga'ngarang injo, rihattu ammentengku a'bora tangnga ri iyai, iamo intu: Kanara passala attallasa'na muliang tau mate inni, nakke allo inni riparapa' mange ri kau.”

²² Mingka Feliks tubaji' pangisse'na ri Pa'lalangang Karaeng, lapaono'i riolo palakarana na appaui, ”Rie'pai ponggaha pajaga Lisias ri inni, ampai kutappuki palakaramu.”

²³ Jari ia lasuromu tantara injo tulusu latahangi Paulus, mingka ritahang pantara juai, nagele todo'i ripisangkai baha'-bahaanna mange latilingi iyareka lajampangii.

²⁴ Sungka'i sikurangallomo sallona, rie'mu Feliks surangi Drusila bahinenna, se'rei tau Yahudi; ia lasuro keo'i Paulus, maeng injo lapilangngerimu ia a'bisara passala katappakang mange ri Isa Almase.

²⁵ Mingka rihattunna Paulus a'bisara passala katojekang, panahangang napasu daa na pangadelang larie' injo sallo', a'jari malla'i Feliks na lakua, ”Sa'gennamo injo riolo na konni-konnina a'lampamoko, rie'pa isse' hattu baji', nakusuro keo'ko.”

²⁶ Rihattu injo ia tajalli ma'nassana Paulus laassare doe' mange ri ia. Injomo saba'na ia sanging lasuro keo'i laa'bisa'-bisara mange ri ia.

²⁷ Mingka ganna'mu ruantaung, Feliks risambei ri Perkius Festus, na laa'bojai nyaha baji' mange ri tau Yahudi injo, Feliks lalappasangi Paulus tulusu ritarungku.