PAU-PAUWANNA SIKONJO SURO-SURO 23 - Kitta' Passitallikang Bau KAREBA BAJI'

¹ Paulus latangarai sikonjo tau ri Pangadelang Agama, na lakua: ”Urang siana', sa'genna allo inni nakke tulusu tallasa lalang ri ati tangkasa ri a'rakanna Allataala.”

² Mingka Imang Bakka' Ananias lasuro tampilingi babana Paulus risikonjo tau rie' injo ammenteng riampi'na.

³ A'balasa ri injo appaui Paulus mange ri ia, ”Allataala lalatampilingko, oe tembo' riapori pute intu! Kau attolong ri inni lamuadelia assituru' hukkung Tora', mingka kau intu gelejuai muturuki hukkung Tora' injo rimusuro tampilingku.”

⁴ Sikuanna tau rie' ri injo appau, ”Kau mutua-tuai Imang Bakka'na Allataala?”

⁵ Appihali Paulus, ”Oe, urang siana', gelei kuisse' ma'nassana iamo injo Imang Bakka'. Toje'i rie' ta'ukiri: Akolalo appau daa ripassala'na ponggahana taummu!”

⁶ Saba' laisse'i ma'nassana rie' sibageang ri iyai injo tau Saduki na sibageang pole tau Farisi; ia appaui lalang ri Pangadelang Agama injo lakua, ”Oe, urang siana', nakke inni tau Farisi saba' rianakanga ri tau Farisi; nakke riparapa' mange ri Pangadelang inni, saba' pattanjengku riattallasa'na muliang tau mate inni.”

⁷ Rihattunna ia appau appakonjo, a'jarimu pa'beserang bakka' risikuanna tau Farisi surang ri tau Saduki injo na ta'bage-bagemu tau lohe injo.

⁸ Saba' tau Saduki injo lapaui ma'nassana tide' tallasa muliang battu rikamateang na tide' todo' malaeka' surang nyaha alusu, mingka tau Farisi injo lapa'naba ngase'i.

⁹ Sa'genna a'jarimu pa'beserang bakka'. Rie'mo sikura guru Tora' battu risossorang Farisi ammenteng a'bora tangnga na appau terasai, lakua, ”Kambe gelekang nguppa kasalaang manna siso'di' ri tau inni! Barang rie' nyaha alusu iyareka malaeka' maeng a'bisara mange ri ia.”

¹⁰ Pela' bakka'i pa'beserang injo jari malla'mu ponggaha tantara injo, barang lasappe-sappe ngase'i Paulus. Injomo saba'na ia laparentamu sibageang tantarana mange laalle Paulus battu ritangnga-tangnganai na laerangi mange ri sapo pa'jagaang.

¹¹ Ribangngi poleanna mae Karaeng Isa rie'i ammenteng risa'rinna na lakua, ”Pattepu nyahamu, saba' appaanteekamua baranimu assa'bi ripassala'Ku ri Yerusalem, appakonjo todo'i kau parallu assa'bi ri Roma.”

Passamaturukanna tau Yahudi 23:12-22

¹² Sungka'i tangnga allo asse're ngase'mu tau Yahudi injo na a'buaki passamaturukang lasikko' kalenna ritunra ma'nassana gele langanre iyareka langinung, rigelenapa maeng lahunoi Paulus.

¹³ Jumallana tau a'buaki injo passamaturukang la'bii patampulo.

¹⁴ A'lampaimu mange risikonjo imang ponggaha surang ri tutoa-toana tau Yahudi injo na lakua, ”Kambe maeng tasikko'mu kalemba ritunra ma'nassana gelekang langanre iyareka langinung rigelepa maeng tahuno Paulus.

¹⁵ Injomo saba'na konni-konnina paralluko assituru' surang Pangadelang Agama laassuro mange riponggaha tantara injo, solanna ia laerangi pole Paulus mange ri a'rakammu, assimpole kalena tua'ra' lamuparessai baji'. Rihattu injo kambe sadiamakang latahuno rigelenapa ambattu mange ri kau.”

¹⁶ Mingka kamanakanna Paulus, ana' battu ri urang siana' bahinena lalangngerei passala pattajangang injo. Ia a'lampai mange ri sapo pa'jagaang injo lalapauwangi Paulus passala injo.

¹⁷ Jari Paulus akkeo'i se're tantara na lakua mange ri ia, ”Riurangsai taruna inni mange ri ponggaha tantara, saba' rie' se're nuparallu lalapau mange ri ia.”

¹⁸ Parawira injo laurangi mange ri ponggaha tantara injo na lakua, ”Paulus tau ritarungku injo, lakeo'a na laerai, solanna kuurangi taruna inni mange ri kau, saba' rie' nuparallu lalapau mange ri kau.”

¹⁹ Ponggaha tantara injo latetengi limanna taruna injo, na laurangi mange akkale-kale risa'ri na lakuta'nangi, ”Apakale nuparallu lamupau mae ri nakke?”

²⁰ Pappihalinna, ”Tau Yahudi injo maeng assamaturukimu lalaerai ri ditte, solanna mintara ditte rierangi pole Paulus mange ri Hakking Agama, assimpole Hakking injo a'ra'i nguppa katojekang battu ri ia.

²¹ Mingka andalalo ripilangngeri, saba' la'bii patampulo tau ri iyai maeng sadiamu lalatajangi. Iyai injo maeng ngase'mu lasikko' kalennai ritunra ma'nassana gele langanre iyareka langinung ampa gelepai maeng lahuno Paulus; konni-konnina sadia ngase'mu na katappukantamamo latajangi.”

²² Jari ponggaha tantara injo lasuro taruna injo muliang na assarei parenta mange ri ia, ”Akolalo paui manna mange ri inai jua ma'nassana mupappiissekangi palakara inni mae ri nakke.”

Ripalette'i Paulus mange ri Kaisarea 23:23-35

²³ Maeng injo ponggaha pajaga injo akkeo'i rua tantara na appaui, ”Appakasadiamoko ruambilangang tantara laa'lampa mange ri Kaisarea surang tujupulo tau a'bai jarang na ruambilangang tau ngerang poke, ri tette' kaassana bangngi inni.

²⁴ Appakasadia todo'ko sikurang kaju jarang tekekang tujunna Paulus na u'rangi lalang salama' mange ri Gubernur Feliks.”

²⁵ Ia ngukiri sura' appakonni oninna:

²⁶ ”Sallang battu ri Klaudius Lisias mange ri Gubernur Feliks tumala'biri'ku.

²⁷ Tau inni rijakkalai ri tau Yahudi injo na rihattu a'ra'nai lahuno, nakke surang tantaraku mange kupisangkai na kulappasangi, saba' kulangngere ma'nassana ia tau Roma.

²⁸ Saba' a'ra'na kuisse' apakale kanarana iyai assare hukkungang ri ia, kuerammu mange ri a'rakanna Pangadelang Agamana.

²⁹ Ri injo kuisse'mu ma'nassana ia risare hukkungang passabakang passala hukkung Tora'na, mingka tide' kale pappitina nusiratangi risare hukkungang mate iyareka ritarungku.

³⁰ Maengi ripappiissekang mae ri nakke ma'nassana rie' passamaturukanna tau Yahudi injo lalahunoi. Injomo saba'na nakke lassiri kusuro urang mange ri kau, na mange risikuanna tau assare injo hukkungang maeng kupauwangi ma'nassana ri kaupa laparapa' palakarana.”

³¹ Jari tantara injo laallei Paulus assituru' nuriparentaang injo mange ri iyai na laurang bangngii mange ri Antipatris.

³² Mintara'na mae iyai lalappasangi tau a'bai jarang injo na Paulus latarrusangi lampana, mingka iyai muliangi mange ri sapo pa'jagaang.

³³ Riambattuinnamo ri Kaisarea tau a'bai jarang injo lapabattumo sura' injo mange ri Gubernur surang lasareang todo'i Paulus mange ri ia.

³⁴ Sungka'i maemmo laaji sura' injo, gubernur injo akkuta'nangi mange ri Paulus battu ri propinsi antee mae assala'na. Rihattu lalangngere'na ma'nassana Paulus battu ri Kilikia,

³⁵ lakuamo, ”Nakkemo lamaressa ripalakaramu, ampa ambattui todo'mu tau lapassala injoko ri inni.” Jari lasuro tahangi Paulus ri sapo pammarianna karaeng Herodes.