PAU-PAUWANNA SIKONJO SURO-SURO 22 - Kitta' Passitallikang Bau KAREBA BAJI'

Paulus a'bisara mange ri tau Yahudi 22:1-22

¹ ”Tau toa surang urang siana' mala'biri'ku, pilangngeri, apa nua'ra' kupau rikonni-konnina mange ri kaui iamo intu assimpole pallambusi ri kalengku.”

² Rihattunna tau lohe injo lalangngere ia a'bisara Ibrani, pela' sannang ngase'mu. Lakuamo,

³ ”Nakke inni tau Yahudi, nakke lahere ri Tarsus ri tana Kilikia, mingka nakke ri kota inni abakka'; nakke riajara baji' ri tangguru Gamaliel lalang rihukkunna puwa-puwata, sa'genna nakke a'jari se're tau gassing anjama rijamaanna Allataala assimpole kaui ngase' intu rikonni-konnina.

⁴ Nakkemo inni maeng nyissa-nyissa sikuanna tau minahang ri Pa'lalangang Karaeng sa'genna mate ngase'; bahine bura'ne kujakkala ngase' na kusuro pantama'i ri pattarungkuang.

⁵ Ripassala'na injo baji' Imang Bakka' iyareka tutoa-toa akkulle lasa'bii. Battu ri iyaimo nakke inni maeng ngerang sura' kahasa tujunna urang siana' rie' injo ri Damsyik na nakkemo a'lampa mange konjo laanjakkala sikuanna tau minahang ri Pa'lalangang Karaeng, turie' injo todo' ri injo na kuerangii mange ri Yerusalem larihukkung.

⁶ Mingka lalang ripa'lingkaangku mange konjo, rihattu seppa'kumo ri Damsyik, ritangnga allona, sikalinna rie' sinara assau lasillo' matangku battu ri langi' lapiappui kalengku.

⁷ Jari anra'bama naung ri tana na allangngerea sa'ra appau mae ri nakke: Saulus, Saulus, ngura Nakke musissa?

⁸ Pappihalingku: Inaiko, Karaeng! PauNa: Nakkemo Isa, tau Nazaret, tumusissa injo.

⁹ Sikuanna tau minahang injo ri nakke, lajanjang todo'i sinara injo, mingka sa'ranna Isa tau appau injo mae ri nakke gelei lalangngeri.

¹⁰ Jari kukuamo: Karaeng apamo pade' parallu kugeokang? Lakuamo Karaeng Isa mae ri nakke: Ammentengko na a'lampako mange ri Damsyik. Ri injopai ampai ripau ri kau sikuanna nuripassuroang injo mange ri kau.

¹¹ Gelema akkulle anjanjang passabakang risinara lasillo' injo matangku, jari urangku sipa'lingkaang lateteng limangku na larenrengia mange ri Damsyik.

¹² Ri injo rie' se're tau riareng Ananias, se'rei tau baji' assituru' hukkung Tora' na baji' riisse'na risikuanna tau Yahudi rie' ri injo.

¹³ Ia battui mae ammenteng riampi'ku na lakua: Saulus, urang siana' mala'biri'ku, paralluko anjanjang muliang! Sikalinna anjanjanga muliang na kutangarai.

¹⁴ Jari lakuamo: Allataalana puwa-puwata maeng lapattantuko lappiisseki rinulakaa'raki injo, laanjanjang Tunaba na laallangngere sa'ra ansulu' injo battu ri babaNa.

¹⁵ Saba' kaumo parallu laa'jari sa'biNa mange risikuanna rupatau ripassala numujanjang surang numulangngere injo.

¹⁶ Konni-konnina ngura bata-bata juapako? Ammentengko, passareangi kalemmu ririo na sikonjo kadorakaammu ritangkasi lalang appaumu mange ri arenna Karaeng Isa!

¹⁷ Sungka'ku muliang mange ri Yerusalem na rihattu ngera dowaangku lalang ri Sapo Allataala, nyahaku latallisi kahasa Allataala.

¹⁸ Kujanjangi Isa, Tumaeng injo appau mae ri nakke: Apparri-parriko, lassiriko bokoi Yerusalem, saba' gele lalatarima passa'bimu ripassala'Ku.

¹⁹ Pappihalingku: Karaeng, iyai injo laisse'i ma'nassana nakkemo inni a'lampa risikonjo sapo passambajangang se'reang mange ri sapo passambajangang maraengang ampai kupantama' ngase' ri pattarungkuang tau tappa' injo mange ri Kau na kurabung ngase'i.

²⁰ Rihattu rarana Stefanus, injo sa'biMu, nakke rie' ri injo na kupassuroangi panggeokang injo na nakkemo a'jaga pakeanna pahuno injo.

²¹ Mingka appaui Karaeng Isa ri nakke: A'lampamoko, saba' Nakke assuro ri kau laa'lampa dere battu ri inni lamange risikuanna bangsa tau maraeng.”

²² Tau lohe injo lapilangngeri Paulus sa'genna pappau injo; maeng injo pakaramulamu a'nga'ngara bakkaki, ”Pakalannya'i tau inni battu ribahonna lino inni! Ia gele siratang attallasa!”

Lalangi ri sapo pa'jagaang 22:23-29

²³ Tarru'-tarrusumu a'nga'ngara bakkaki na lapamballungi baju bakka'nai ampai appakahuri limpurang.

²⁴ Injomo saba'na ponggaha tantara injo assare parenta lasuro erangi Paulus antama' ri sapo pa'jagaang na lasuro paressai ampai latappasa poti beto, solanna akkulle laisse' apakale saba'na a'nga'ngara bakka' appakonjo tau lohe injo mange ri ia.

²⁵ Mingka rihattunna Paulus ripaanggang-anggang laritappasa ia appaui mange ri ponggaha tantara injo, ”Makala akkullei mutappasa se're inni tau Roma, manna gele riadeli riolo?”

²⁶ Rilalangngere'na parawira injo pauna anjarrummu mange ri ponggaha tantara injo, lakua, ”Apamo nuparallu lamugeokang? Tau intu battui ri Roma.”

²⁷ Jari mangemu ponggaha tantara injo ri Paulus na lakua, ”Paui mae, toje'i tau Romako?” Appihali Paulus, ”Toje'i.”

²⁸ Jari appaui ponggaha tantara injo, ”Laa'jari tau Roma injo ka'jala kuhalliangi.” Appihali Paulus, ”Mingka nakke rie' katojekangku saba' kalaherangku.”

²⁹ Jari iyai tua'ra' injo lanappasa ri ia, lassirii soho' boko; na manna ponggaha tantara injo malla' todo'i, sungka'i laisse' ma'nassana Paulus, tulasuro sokke' injo, se'rei tau Roma.

Paulus ri a'rakang Pangadelang Agama 22:30–23:11

³⁰ Mingka ponggaha tantara injo a'ra'i lapiisseki baji' apakale pappitinana tau Yahudi injo mange ri Paulus. Injomo saba'na, rimintara'na mae lasuro allei Paulus battu ri pattarungkuang na lapassuroangi, solanna sikonjo imang ponggaha na sikonjo Pangadelang Agama maraeng injo a'rappungi. Maeng injo ia laerangi Paulus battu ri sapo pa'jagaang na laparapa'i mange ri iyai.