PAU-PAUWANNA SIKONJO SURO-SURO 21 - Kitta' Passitallikang Bau KAREBA BAJI'

Paulus rie'i ri Tirus na ri Siprus 21:1-14

¹ Sungka'kang assibokoimo surang iyai, a'lampamakang na tarrusukang nyombala mange ri pulo Kos. Mintara'na mae ambattumakang ri pulo Rodos na battu ri injomakang mange ri Patara.

² Ri Patara nguppakang lopi nua'ra' a'limbang mange ri Fenesia. A'dongkokang ri lopi injo, ampakang a'lampa.

³ Gele sallo kajanjangangi pulo Siprus risa'ri kairi, mingka tatarrusang juai lampaba na mangekang ri Siria. Sa'genna ambattumakang ri Tirus, saba' luranna lopi injo parallui lapanaung ri kota injo.

⁴ Mangekang ri tau tappa' injo ri Isa na ammarikang ri injo tujungallo sallona. Saba' rie' pappauna Nyaha Tangkasa mange ri tau tappaki injo ri Isa lapainga'i Paulus, solanna ia andai latarrusang lampana mange ri Yerusalem.

⁵ Mingka sungka'i lappasamo hattunna, a'lingkamakang isse' tatarrusang lampaba. Sikuanna tau tappa' ri Isa assurang-surangi bahinenna na ana'-ana'na larurungkang sa'genna pantarang kota; na ri biring bonemakang akkolantu' ngera dowaang.

⁶ Rimaembamo ngerakana nai'makang ri lopi, na iyai muliang ngase'i ri saponna.

⁷ Battu ri Tirus ambattumakang ri Ptolemais na ri injomakang kateppusang a'dongko' lopi. Assarekang barasallang mange risikuanna urang siana' tappa' ri Isa na ammarikang siallo ri iyai.

⁸ Ri mintara'namo mae a'lampamakang isse' battu ri injo na ambattukang ri Kaisarea. Ri injo mange antama'kang ri saponna Filipus, tau appala'bang injo Injili, iamo intu se're tau battu ri tau tuju ripile injo ri Yerusalem, na ammarikang ri saponna.

⁹ Filipus rie' appa' ana'na tulolo nguppa pangamaseang langisse' rinulaa'jari injo sallo'.

¹⁰ Sungka'i sikurangallomakang ammari ri injo, rie'mo se're nabbi arenna Agabus battu ri Yudea.

¹¹ Ia maei ri kambe, maeng injo laallei ka'ba' aja'na Paulus. Lasokke'i bangkeng surang limanna na lakua, ”Appakonnimu pauna Nyaha Tangkasa: Laapakonni todo'i opuna panga'ba' aja' inni larisokke'i risikonjo tau Yahudi ri Yerusalem na ripassareangi lalang ri limanna bangsa tau maraeng.”

¹² Allangngere ripassala injo kambe assurang-surang sikuanna tau rie' ri tampa' injo taerai, solanna Paulus andai a'lampa mange ri Yerusalem.

¹³ Mingka appihali Paulus, ”Ngura apparauko, sa'genna lapakapa'risi nyahaku? Saba' nakke inni a'bisonama gele sangga larisokke' jua, mingka manna pole lamate ri Yerusalem passabakang ri arenNa Karaeng Isa.”

¹⁴ Saba' ia gele laalleangang ripappainga'ba, a'bisonamakang na takua, ”A'ra'namo Karaeng a'jari!”

Passiuppaanna Paulus surang Yakobus ri Yerusalem 21:15-26

¹⁵ Sungka'i ammari sikurangallo sallona ri Kaisarea, apparurumakang, maeng injo a'lampakang mange ri Yerusalem.

¹⁶ Assurang-surang ri kambe minahang todo'i sikura lohena tau tappa' ri Isa battu ri Kaisarea. Iyaimo laurangkang mange ri saponna turiareng Manason. Ia tau battu ri Siprus na sallomu tappa' ri Isa. Ri saponnamakang amminsambo.

¹⁷ Rihattu ambattubamo ri Yerusalem, rannu ngase'i urang siana' tappa' injo laruppaikang.

¹⁸ Ri mintara'na mae a'lampai Paulus assurang ngase'kang lamange ri Yakobus; sikonjo tutoa-toa rieki todo'i ri injo.

¹⁹ A'barasallangi Paulus mange ri iyai, maeng injo lalagara tasse're-se'rei numaeng lageokang Allataala ritangnga-tangngana bangsa tau maraeng patteteang ripanjampanginna.

²⁰ Lalangngere'na injo lapakala'birimu Allataala. Maeng injo appaui ngase'mu mange ri Paulus, ”Urang siana', janjangi, assa'bu-sa'bumu bangsa tau Yahudi tappa' na iyai ngase' tutui laparakai hukkung Tora'.

²¹ Mingka maengko lalangngeri mupangajarangi risikuanna tau Yahudi ammari injo ri tanana tau maraeng lalabokoi hukkung Musa, saba' mupaui bede', solanna andaimu lasunna' ana'-ana'na na ako tommo turuki kabiasaanta.

²² Jari, anteekamua rikonni-konnina? Tantu lalangngerinna ma'nassana rie'ko mae konni.

²³ Injomo saba'na, geokanglalo nutapau inni: Ri kambe rie' appa tau attinja.

²⁴ Urang ngase'i, nageokanglalo panangkasi kale assurangang iyai na tanggongi ongkoso'nai, sa'genna akkulle lagomisi uhu'na; jari sikuanna tau laisse'i ma'nassana sikonjo kareba nulalangngeri injo ripassala'mu nugele jua naba, mingka ma'nassa kau tarrusu juai mupaliara hukkung Tora'.

²⁵ Mingka ripassala'na sikuanna tau maraeng, tutappa' injomo, maemmu ta'ukiri passamaturukamba, iamo intu iyai parallui lapakadere kalenna battu rikanre numaeng injo ripassidakkaang ri barahala, battu ri rara, battu ri assi binantang mate riparro' injo na battu rikabalerang.”

²⁶ Ri allo mintaranna mae Paulus laurang ngase'mu tau injo surangang ia, na ia latangkasi kalenna assurang iyai, maeng injo antama'i ri Sapo Allataala lalapappissekangi sikuraiya nakala'busang pappakatangkasa injo surang assare passidakka nuparallu injo lalapassidakkaangi.

Paulus rijakkala 21:27-36

²⁷ Sungka'i lala'busumo hattu tujungallo injo sallona, sikuanna tau Yahudi rieki injo battu ri Asia, lajanjangi Paulus lalang ri Sapo Allataala, jari laosokimu tau lohe injo na lajakkalai,

²⁸ ampai a'nga'ngara bakka', ”Oe tau Israele, maemoko! Iamo inni tau manna ri antee-tee mae ngajara sikuanna tau lalabaliangi taunta na lapassalai hukkung Tora' surang tampa' inni! Konni-konnina ia ngurangi pole tau Yunani antama' ri Sapo Allataala na lapakarammasai tampa' tangkasa inni!”

²⁹ Saba' riolo iyai lajanjangi Trofimus tau Efesus injo assurangi Paulus ri kota, na pa'ngare'nai ma'nassana ia laurangi Paulus antama' ri Sapo Allataala.

³⁰ Jari rukkamu sibatu kota, na lohemo tau battu a'domung, ampai lajakkala Paulus na lasahaki ansulukang battu ri Sapo Allataala na rihattu injo toje' jua sikonjo babaanna Sapo Allataala injo ritongko'.

³¹ Rihattu a'rakinnamo lalahuno Paulus, ambattumu karebana mange ri ponggaha tantara injo ma'nassana rukkai sibatu kota Yerusalem.

³² Ponggaha pajaga injo lassiri a'lampa mange konjo surang sikonjo tantarana na sikonjo parawirana na larumpa'i tau lohe injo. Rihattu lajanjanginnamo na sikonjo tantarana ammonokimu larabungi Paulus.

³³ Ponggaha tantara injo laseppaki Paulus, na laalle ampai lasuro sokke' ri rua rante, maeng injo akkuta'nangi inai inni na apamo numaeng lageokang?

³⁴ Mingka ri tau lohe injo rie' tulapa'ngangarangi appakonni mange ri ia, rie' pole tulapa'ngarangi appakontui. Saba' ia gele akkulle laisse' karukkaang apa sitoje'na kajariang. Injomo saba'na, ia lasuro erangi Paulus mange ripa'jagaang.

³⁵ Sungka'i ambattuimo ri tuka' ribule'i Paulus ri tantara injo saba' lohena tau assiosso'-osso'ki.

³⁶ Sikonjo taunna Yerusalem minahang ngase'i a'rurung-rurungi, ampai a'nga'ngara bakkaki, ”Hunoi!”

Paulus ngerakana laa'bisara 21:37-40

³⁷ Rihattu larieranna Paulus antama' ri pa'jagaang, ia appaui mange ri ponggaha tantara injo, ”Makala akkullea appau se're passala mange ri kaui?” Pappihalinnai, ”Ngisse'ko a'bisara Yunani?

³⁸ Jari, kau gele pade' tau Massere siba'lalo injo maeng apparukka na laerangi a'lampa patansabu tau bangsa assele' bassi mange ri parang luara?”

³⁹ Appihali Paulus, ”Nakke inni tau Yahudi, battu ri Tarsus taunna kota kaminang baji' injo riisse'na ri Kilikia; kuerai, solanna nakke ripa'biang a'bisara mange ri tau lohe intu.”

⁴⁰ Rihattunna Paulus ripa'biang a'bisara riponggaha tantara injo, a'lampamu ammenteng ri tuka' na a'bisara jo'jo'i mange ri tau lohe injo; sungka'i sannang ngase'mo tau lohe injo; pakaramulamu a'bisara mange ri iyai lalang bisara Ibrani, lakua: