PAU-PAUWANNA SIKONJO SURO-SURO 20 - Kitta' Passitallikang Bau KAREBA BAJI'

Battu ri Makedonia a'lampa mange ri Troas 20:1-12

¹ Ri ammono'namo karukkaang injo, Paulus lakeo'i ana'-ana' gurunna na lapakaterasai nyahanai. Rimaennna ngerakana, a'lampamu mange ri Makedonia.

² Ia lapila'bangi ngase'i tampa' injo na lohe pasang-pasang laappakajarre' nyaha ri urang siana' julu katappakang ri injo. Jari ambattumu ri tana Yunani.

³ Sungka'i tallumbulammo ammari ri injo ia a'ra'i lanyombala mange ri Siria. Mingka rihattu injo tau Yahudi injo a'rakimu lahuno Paulus. Injomo saba'na, ia latappuki lamuliang a'molong ri Makedonia.

⁴ Ia riurangi ri Sopater ana'na Pirus, battu ri Berea, na Aristarkhus na Sekundus, ruaiya battu ri Tesalonika, na Gayus battu ri Derbe, na Timotius surang rua pole tau uranna battu ri Asia, iamo intu Tikhikus na Trofimus.

⁵ A'lampa riolo ngase'i na latajangkang ri Troas.

⁶ Mingka rimaennamo allo pa'lappasang Roti gele injo make bibi nyombalamakang battu ri Filipi na limangalloi sallona ampakang ambattu ri Troas na assiuppa ngase'kang. Ri injo ammarikang tujungallo sallona.

⁷ Ri allo makase'rena ri sijumaa injo, rihattu asse'reba lanu'be roti, a'bisarai Paulus surang urang siana' julu katappakang rie' ri injo, saba' pattujunna a'ra'mu laa'lampa mintara'na mae. Pa'bisaraang injo sa'genna nuasa bangngi.

⁸ Ri tanggaruma, ri tampa' passe'reamba, lohe lampu ripabola'.

⁹ Rie' se're taruna arenna Eutikhus attolong ri tontongang. Kanara sallona a'bisara Paulus, taruna injo gelemu lakulle latahang ta'doddo'na. Sa'genna kara'rakang na a'dappe'i naung battu ri tanggaruma makatallu. Rihattu laangkakinna tau lohe injo, ia matemu.

¹⁰ Mingka Paulus naungi ri tana. Ia ladapa-dapai ana' bura'ne longko injo na larakukangi ampai appau, ”Andamoko bata-batai, ia attallasa juapai.”

¹¹ Sungka'i muliammo nai' ri tanggaruma, lapa'dahu-dahuangi kanre injo Paulus ampai nganre; sungka'i maeng nganrei ia a'bisara juapai sa'genna ambassi' allo. Maeng injo ampamu a'lampa.

¹² Rihattu injo ri urang tommoi ana' bura'ne longko injo muliang mange ri saponna, na sukku' rannuinna nyahana lasa'ring.

Battu ri Troas a'lampa mange ri Miletus 20:13-16

¹³ Kambe a'lampa rioloang nai' ri lopi na nyombala mange ri Asos, pattujumba a'ra'i taruppai Paulus konjomange assituru' pappasanna, saba' ia a'ra'i a'lingka attete bonto mange konjo.

¹⁴ Rihattu assiuppabamo ri Asos, tapanai'mu ri lopi, maeng injo nyombalamakang tarrusu lamange ri Metilene.

¹⁵ Battu ri injo tarrusukang nyombala na mintara'na mae rie'makang ri a'rakanna pulo Khios. Ri allo mintara'na pole mae ambattumakang ri pulo Samos na siallopa pole nyombala ampakang ambattu ri Miletus.

¹⁶ Maeng latappuki Paulus gele laassekka ri Efesus, solanna gele tappela'-pela' hattunna ri Asia. Saba' a'nyara-nyarai, so'di injo akkulle, rie'mu ri Yerusalem rihattu passua'-suarang allo makalimampulo injo.

Passibokoianna Paulus surang sikonjo tau toa-toa ri Efesus 20:17-38

¹⁷ Injomo saba'na ia assuromamoi se're tau battu ri Miletus lamange ri Efesus lalang pasang, solanna sikonjo tutoa-toana jamaah mangei ri Miletus.

¹⁸ Sungka'i riekimo, appaui Paulus mange ri iyai, ”Muisseki ngase'mu, anteekamua katallasangku ritangnga-tangngamui minang riuruku ambattu mae konni ri Asia:

¹⁹ Lalang katunaang ati kujampangi Karaeng. Lalang ripanjampangingku injo lohe ere mata ansulu' na lohe pole kasissaang kuuppa battu ri tau Yahudi a'raki injoa lalahuno.

²⁰ Manna appakonjo gelea minang takkaluppa anggeokang nurie' matu-matunna mange ri kaui. Kupau ngase'i na kupangajarangi mange ri kaui, baji' injo ri a'rakanna tau lohe iyareka lalang ripasse're-se'reang ri sapommu;

²¹ nakke sanging assa'bi mange risikuanna tau Yahudi na mange ri tau Yunani, solanna jarrai na ngu'rangi mange ri Allataala surang tappa'i ri Karaengta, Isa.

²² Mingka konni-konnina nakke assimpole turisuro ri Nyaha Tangkasa laa'lampa mange ri Yerusalem na gele kuisse' apa laa'jari ri kalengku konjomange

²³ passangadinna nulapappijanjangang injo jua Nyaha Tangkasa battu rise're kota mange ri kota maraeng mae ri nakke ma'nassana pattarungkuang na kasissaang latajanga.

²⁴ Mingka gelejuai kukarimanangi nyahaku manna siso'di', assala akkulle kurapi' passimbangang kala'busang na kupa'maengi panjampangi nulapassuroang injo Karaeng Isa mae ri nakke laassa'bi passala Injili pangamaseang ri Allataala.

²⁵ Konni-konnina kuisse'mu ma'nassana kau gelemu lamujanjangi rupangku poleang, kau ngase' intu tumaeng injo kumangei laappala'bang Pakkaraenganna Allataala.

²⁶ Iamo injo saba'na allo inni kusa'bii mange ri kaui ma'nassana nakke tangkasa battu ri rarana manna inai jua.

²⁷ Saba' nakke gelea takkaluppa appau risikonjo pattujunna Allataala mange ri kaui.

²⁸ Jagai kalemmu na jagai todo'i sikonjo urammu, saba' kauimo ritantuang ri Nyaha Tangkasa laa'jari tutoa-toa laakkalahaki jamaah Allataala nulauppa injo lalang ri raraNa to'jua.

²⁹ Kuisse'i, ma'nassana ampa a'lampama, lohe asu lambara nuboang laantama' a'bora tangnga ri kaui na gele lakamaseang kalahakiang injo.

³⁰ Na ri kau intu larie' todo' ammumba lohe tau, riajarang bura lapakkulle-kulleangi langalle tau tappa' ri Isa battu ripa'lalangang naba injo solanna minahangi riajaranna.

³¹ Injomo saba'na a'jaga-jagaiko surang ngu'rangiiko ma'nasana talluntaung sallona, allo bangngi, nakke gelea minang ammari-mari appiu'rangi mange ri kau ngase' na kupappaattikangi ere mata.

³² Konni-konnina lakupassareangiko mange ri Karaeng na mange ri pau pangamaseanNa nuakkahasa injo appakajarre' ri kaui na assare kaharisang nuritantuang injo mange risikuanna tau maeng ritangkasi ri Isa Almase.

³³ Salaka iyareka bulaeng iyareka pakeang gelea minang ngalle manna nubattu ri inai jua.

³⁴ Muissekii ma'nassana atti omasa'ku to'jua kupake langgannaki risikonjo kaparalluangku surang kaparalluanna urangku sipa'lingkaang.

³⁵ Lalang riiangase'na maeng kusareko ja'bangang ma'nassana rianjama appakonjomo ditte akkulleki assare sokongang mange risikuanna tau lamma injo na parallui riu'rangi pau-pauNa Karaeng Isa, saba' Ia maengi lapau, ”La'bi rannuangi assare intu na lanarima injo.”

³⁶ Sungka'i maeng lapau pau injo akkolantu'i Paulus na assurang-surang ngase'i ngera dowaang.

³⁷ Jari apparau ngase'mu ampai larakaki Paulus, na tarru'-tarrusui lahaui.

³⁸ Sanna' pa'risinna, la'bi pole saba' ia lapaui ma'nassana geleimu laassijanjangi poleang. Maeng injo larurungimu mange ri lopi.