PAU-PAUWANNA SIKONJO SURO-SURO 2 - Kitta' Passitallikang Bau KAREBA BAJI'

Allo makalimampulo 2:1-13

¹ Sungka'i larapi' allo makalimampulo, a'rappung ngase'mu rise're sapo.

² Sikalinna rie'mo kalangngerang sa'ra battu ri langi' assimpole anging ammarrisi ngiri' lajangnga' sibatu sapo, tampa' pattolongannai;

³ na kajanjangammu mange ri iyai lohe lila nuassimpole lila api anri'ba'-ri'ba' na a'dongko'i ri iyai ngase'.

⁴ Jari iyai ngase' rassimu Nyaha Tangkasa na pakaramulamu appau-pau lalang bisara maraeng, assimpole nurisareang battu ri Nyaha injo mange ri iyai lalapau.

⁵ Rihattu injo lohe tau Yahudi tappa' ri Allataala battu risibatu lino ammari ri Yerusalem.

⁶ Rikalangngeranna sa'ra injo, a'domungimu tau lohe injo. Ta'bangka ngase'i saba' lalangngerinna sikonjo tau tappa' injo appau-pau lalang ribisarannai.

⁷ Ammangnga-mangngai na lannasa ngase'mu, jari appau ngasekimu, ”Gelejua iyai inni tau Galilea?

⁸ Anteekamua lama'ring rilangngerei a'bisara lalang ribisaranta, iamo intu bisara ri tampa' kalaheranta;

⁹ ditte tau Partia, Media, Elam, tau Mesopotamia, Yudea na Kapadokia, Pontus na Asia,

¹⁰ Frigia na Pamfilia, Massere na tau battu ri Libia riampi'na Kirene, tau battu ri Roma,

¹¹ baji' injo tau Yahudi na injo pole tau minahang injo ri ajarang Yahudi, tau Kreta na tau Arab, ditte rilangngerei a'bisara lalang ribisaranta risesena kajariang bakka' nulageokang Allataala.”

¹² Ammangnga-mangnga ngase'i na sanna' takkajannakinna ampai assikuta'nang, ”Apamo battuanna inni?”

¹³ Mingka rie' tau maraeng attua-tua lakua, ”Lahuja ngase'i anggoro tanning.”

Hato'bana Petrus 2:14-40

¹⁴ Jari ammentengi Petrus assurangang sampulo se're injo suro, na ia appau bakka' mange ri iyai, ”Oe kau tau Yahudi surang sikuanna tau ammari ri Yerusalem, pina'na'i pauku inni na piissekii.

¹⁵ Tau lohe inni gele huja assimpole pa'ngare'mu, saba' ampamu tette' kaassa,

¹⁶ mingka iamo injo nulapau injo Allataala ri Nabbi Yoël:

¹⁷ Lakajariangi rihattu kala'busang – appakonjomu pauna Allataala – ma'nassana LaKupaturungi NyahaKu mange risikonjo rupatau; jari sikonjo ana' bura'nemu na ana' bahinemu laKupappiissekangi mange ri kau passala nulaKupauwangi injo mange ri iyai, na ana' bura'ne longkomu surang ana'raramu laanjanjangi passala nulaKupijanjangiang injo mange ri iyai, na sikonjo tutoa-toamu languppai so'na.

¹⁸ Mange pole risikonjo atangku bura'ne surang bahine lakupaturungang todo'i NyahaKu ri allo injo na laKupappiissekangi mange ri kau passala nulaKupauwangi injo mange ri iyai.

¹⁹ Nakke laa'bua' lohe kajariang nugele samara rate, ri langi' na lohe tanra mara'-maraeng, rahangang ri lino inni: rara na api surang ambu a'go'loi.

²⁰ Mata allo laminra a'jari kalammang kapu' na bulang laa'jari assimpole rara rigelenapa larapi' allo pariekanna Karaeng, allo bakka' na nula'biri injo.

²¹ Na inai jua langa'ngara arenna Allataala laripakasalama'.

²² Oe kau tau Israele, pilangngeri pau inni: Isa tau battu injo ri Nazaret iamo tau maeng ritantuang ri Allataala na ripappisa'biangi mange ri kau lalang risikonjo kagassingang na kajariang numasagala surang tanra numara'-maraeng nulageokang Allataala patteteang lalang ri Ia ritangnga-tangngamui, assimpole numuisseki injo.

²³ Iamo ripassareang ri Allataala assituru' pattujunna na a'ra'Na, maeng musallikimu na muhuno lalang limanna tau doraka inni.

²⁴ Mingka Ia ripakaattallasai ri Allataala sungka'na Ia maemmo ripakalappasa battu rikasissaang kamateang, saba' Ia gele ma'ring tulusu rikahasai ri kamateang injo.

²⁵ Saba' Daud lapaui ripassala'na Ia: Nakke kujanjangi Allataala sanging rie'i ri a'rakangKu, saba' Ia rie'i risa'ri kanangku, jari gelema a'miki'.

²⁶ Injomo saba'na rannui atiku na a'gora-gorai lilahku, la'bipa pole kalengku lasannang lalang ripattajalliang,

²⁷ saba' Ditte gelea ripassareang mange ri linona tau mate inni, na gelei ripa'biang Tau Tappa' Ta anjanjang kamateang.

²⁸ Dittemo Ripappiissekangi mae ri nakke lalang katallasang, Dittemo laassare mae ri nakke karannuang ri a'rakanTa.

²⁹ Urang siana', nakke akkullea appau lambusu mange ri kau ngase' ripassala'na Daud, ammanna puwa-puwata. Ia maeng matemu na riloangangi, na pakkuburanna rie' juapai rijanjang sa'genna allo inni.

³⁰ Mingka ia se'rei nabbi na ia laisse'i ma'nassana Allataala maengi attalli' mange ri ia lalang sapatta ma'nassana Ia laappatolongi se're tau ri kadera pattolonganna Daud battu rilo'loranna to'jua.

³¹ Kanara injomo ia maeng laisse' riolomu na maeng a'bisarai passala attallasa'na muliang Almase, rihattu lakuana ma'nassana Ia gele laribokoi ri lino pammarianna tau mate, na ma'nassana assinNa gele lapanra'.

³² Isa innimo ripakaattallasa muliang ri Allataala, na risesena passala injo kambe ngase'mo inni sa'bi.

³³ Sungka'i maemmo ripakala'biri risa'ri kananNa Allataala na narimai battu ri Amma, Nyaha Tangkasa nulatallikang injo, jari lapaturumMu Nyaha injo assimpole numujanjang na numulangngere ri inni.

³⁴ Saba' gele Daud nai' ri suruga, na iamo pole appau: Karaeng maemmu appau mange ri Karaengku:

³⁵ Attolommoko risa'ri kanangKu, sa'genna Kupaa'jari sikonjo balimMu a'jari pa'lisakang bangkemMu.

³⁶ Jari, sikuanna tau Israele parallui baji' pangisse'na ma'nassana Allataala maemmu lapaa'jari Isa, tumusalli' injo, a'jari Karaeng na Pappakasalama'.”

³⁷ Sungka'i lalangngeri passala injo assimpolemu tubissa' atenna, jari akkuta'nangi mange ri Petrus na ri suro-suro maraeng injo, ”Apamo parallu latageokang, Urang siana'?”

³⁸ Appihali Petrus mange ri iyai, ”Jarrako na parralluko tasse're-se're tau ririo lalang arenna Isa Almase lariampungi kadorakaammu, jari narimako pangamaseang, iamo intu Nyaha Tangkasa.

³⁹ Saba' mange ri kaumo latuju talli' injo na ri ana'-ana'mu surang mange ri tau dere injo juapa, iamo intu assillohe nulalakeo' injo Karaeng Allataalata.”

⁴⁰ Na lohe pole pau maraeng ia assa'bi na lasuro ngase'i, lakua, ”Passareangi kalemmu ripakasalama' battu sikuanna tau daa inni sipa'na.”

Ta'ra tallasa'na tau bungasa injo tappa' ri Isa 2:41-47

⁴¹ Sikuanna tau allangngere injo pau a'ra'mu ririo na ri allo injo jumallana katambaangi barang tallungsa'bu tau lohena.

⁴² Lapilangngeri ngase'i pappijo'jo'na suro injo na tulusu asse're-se're ngase'i. Iyai injo sanging paa'rappung laa'dahu-dahu kanre surang ngera dowaang.

⁴³ Jari malla' ngase'mu tau lohe injo, saba' suro-suro injo appaa'jari lohe kajariang mara'-maraeng na tanra-tanra nugele samara.

⁴⁴ Sikuanna tau tappa' tuli assamaturu'i asse're, na sikonjo pakkalumannyangannai lapa'jului ngase'i,

⁴⁵ na sanging rie' tau a'balu' tana iyareka pakkalumannyangang maraenna, ampai lapa'dahu-dahuang ngase' mange sikuanna tau assituru' kaparalluang ri iyai.

⁴⁶ Lalang rikalogaang na a'julu ati ngase'i asse're allo-allona lalang ri Sapo Allataala. Iyai injo a'lilikangi appakasadia kanre ri saponna na assurang-surangi ngase'i nganre lalang rikarannuang na baji' pa'mai'na,

⁴⁷ ampai lapakala'biri Allataala na iyai injo ringai ngase'i ri tau lohea. Jari allo-alloi jumallanai attamba tarrusu saba' Karaeng assare ri iyai tau laripakasalama'.