PAU-PAUWANNA SIKONJO SURO-SURO 16 - Kitta' Passitallikang Bau KAREBA BAJI'

Timotius minahang todo'i ri Paulus 16:1-13

¹ Paulus mange todo'i ri Derbe na ri Listra. Ri Listra rie' se're ana' gurung arenna Timotius; idonna tau Yahudi natappa' todo'i, mingka ammanna tau Yunani.

² Timotius inni baji' laisse'nai risikonjo urang siana' julu katappakang ri Listra na ri Ikonium,

³ na Paulus a'ra'i, solanna ia minahangi ripa'lampaanna. Jari Paulus lasuro sunna'i passabakang tau Yahudi inni rie'i ri antee-tee mae ri tampa' injo, na sikuanna tau laisse'i ma'nassana ammanna tau Yunani.

Paulus a'limbangi mange ri Makedonia 16:4-12

⁴ Ri paa'lampaanna a'lili' mange-mange battu rise're kota mange ri kota maraeng Paulus surang Silas lapau-paui sikonjo passamaturukang lapassamaturuki injo sikonjo suro na tutoa-toa ri Yerusalem lalang pappasang, solanna lapinahangi sikonjo jamaah.

⁵ Appakonjomu sikuanna jamaah ripakaterasa katappakanna na allo-allo attamba lohe jumallana.

⁶ A'molongi ri tana Frigia na Galatia, passabakang Nyaha Tangkasa appisangka ri iyai laappala'bang Injili ri Asia.

⁷ Riambattuinnamo ri Misia lasobaimu laantama' ri tampa' Bitinia, mingka gele ripa'biangi ri Nyahana Isa.

⁸ Sungka'i lalimbammo Misia, ambattuimu ri Troas.

⁹ Sungka'i bangngi rie'mo kajanjangang ri Paulus se're panjanjang: Rie' se're tau Makedonia ammenteng ri injo na laerai mange ri ia, ”A'limbammoko anta'leang mae na tulungkang!”

¹⁰ Sungka'i lauppamo panjanjang injo Paulus, apparri-parrimakang apparuru laa'lampa mange ri Makedonia, saba' battu ripanjanjang injo tapahangi ma'nassana Allataalamo lakeo'kang laappala'bang Injili mange risikuanna tau rie' konjomange.

¹¹ Jari a'lampamakang battu ri Troas na tarrusukang nyombala mange ri Samotrake, na rimintara'na mae ambattumakang ri Neapolis;

¹² battu ri injo mangekang ri Filipi, kota makase're tamangei ribageang Makedonia inni, se're kota nulaparenta Roma. Ri kota injomokang ammari sikurangallo sallona.

Paulus ri Filipi 16:13-18

¹³ Ri allo Passambajangang ansulu'kang ri babaanna kota injo. A'lingkakang attete biring balang na anrumpa'kang sapo pangera dowaang tau Yahudi, numaeng tabata-batai rie' ri injo; sungka'kang attolong, a'bisa'-bisaramakang mange ri tubahine rieki injo asse're-se're.

¹⁴ Sala se'renna ri tubahine minahang injo appilangngeri riarengi Lidia. Ia tubattu ri kota Tiatira na ia se'rei pabalu' kaeng kamummu' tunyomba mange ri Allataala. Karaeng labungkara atina, jari lapina'na'i pauna Paulus.

¹⁵ Sungka'i maemmo ririo surangang sibatu assinna saponna, ia lakeo'kang, lakua, ”Ampa pa'ngare'mu ma'nassana nakke toje' tappa'ku mange ri Karaeng, maeko assekka ri sapongku.” Ia akkeo' passai jari ammiokang ripakkeo'na.

¹⁶ Rie' se're hattu ria'lampaba lamange ri sapo pangera dowaang, assiuppakang se're ata bahine pabintang-bintang, battu ri pambintang-bintang lageokang injo tau ngatainna nguppai lohe hassele.

¹⁷ Ia minahang ribokoi ri Paulus na ri kambe ampai a'nga'ngara bakka', ”Iangase'na tau inni sanging atanna Allataala Tukaminang la'biri injo. Iyaimo laappau mange ri kau anteekamua lalang kasalamakang.”

¹⁸ Passala injo lageokangi sikurangallo sallona. Mingka rihattunna gelemo akkulle latahangang Paulus ripa'nga'ngara bakka'na, a'gilimmu na appaui mange ri setang injo, ”Lalang ri arenna Isa Almase kusuroko ansulu' battu ri bahine intu.” Rihattu injo toje' jua ansulu'i setang injo.

Ponggaha pattarungkuang ri Filipi 16:19-40

¹⁹ Rihattunna sikonjo tau ngatainna bahine injo laisse'i ma'nassana tanjengannai languppa hassele gelemo rie', lajakkalimu Paulus surang Silas, ampai larenrengi mange ri parang ritangnga kota nalaparapa'i mange ri pamarenta.

²⁰ Sungka'i maemmo laerangi ruaiya mange risikuanna tukahasana kota injo, lakuaimo, ”Tau inni lapakajujai kota pammarianta inni; iyai tau Yahudi,

²¹ na iyai lapangajarangi kabiasaang agamana nugele akkulle ritarima iyareka rituruki ri tau Roma inni.”

²² Tau lohe injo ammenteng todo'i labaliangi. Jari sikonjo tukahasana kota injo lasesse' pakeanna suro-suro battu ri kalenna ampai larabungi.

²³ Sungka'i sarromo rabunnai, lapantamakimu ri pattarungkuang. Ponggahana pattarungkuang injo risare parenta lalajagai baji'.

²⁴ Assituru' ripassuroang injo, ponggahana pattarungkuang injo lasuro pantama'i ri bili' pattarungkuang kaminang lalang injo ritangnga na lasangkala bangkennai.

²⁵ Mingka rilatangnga bangngina Paulus surang Silas ngera dowaangi na akkelong-kelongi pappakala'biri mange ri Allataala na sikuanna tau rie' ri pattarungkuang lalangngere todo'i.

²⁶ Jari sikalinna anggeong sarroi tana; jari anggeong ngase'i pandasina pattarungkuang injo; na rihattu injo ta'bungkara ngase'i babaang pattarungkuang injo na lappasai risangkalanai.

²⁷ Sungka'i tassa'ring ponggahana pattarungkuang injo na lajanjangi ta'bungkara sikonjo babaang, lapu'nusumu pa'danna a'ra'i lahuno kalenna, saba' pangisse'na ma'nassana sikuanna tau ritarungku injo allari ngase'mu.

²⁸ Mingka a'nga'ngara bakka'i Paulus, lakua, ”Ako huno kalemmu, saba' rie' ngase' juapakang ri inni!”

²⁹ Ponggahana pattarungkuang injo assuro ngerangi sulo, maeng injo allarii antama' na riannettere'na juapa ia a'demporo ri a'rakanna Paulus surang Silas.

³⁰ Ia laurangi ansulukang, na lakua, ”Karaeng, apamo parallu lakugeokang, solanna nakke akkulle salama'?”

³¹ Pappihalinnai, ”Tappa'laloko mange ri Karaeng Isa Almase lasalama'ko, kau sibatu sapo.”

³² Maeng injo lapauimu pauna Karaeng mange ri ia na mange risikuanna tau rie' injo ri saponna.

³³ Rihattu injo jua ponggahana pattarungkuang injo laurangi na labissai loko'-loko'na. Rihattu injomo ia surang sikonjo bija-bijanna ririo.

³⁴ Maeng injo ia laurangi mange ri saponna na appatalai kanre mange ri iyai. Na ia sanna' rannuna ma'nassana ia surang sibatu saponna a'jari tappa'mu ri Allataala.

³⁵ Sungka'i latangnga allomo sikonjo tukahasa ri kota injo lasuroi sikonjo pagahe ri kota injo a'lampa mange ri ponggahana pattarungkuang injo lalang pappasang, ”Lappasangi tau rua intu!”

³⁶ Ponggaha pattarungkuang injo lapabattu pappasang injo mange ri Paulus, lakua, ”Sikuanna tukahasa ri kota inni lasuro lappasangiko; jari ansulukimoko konni-konnina na a'lampako lalang salama'!”

³⁷ Mingka appaui Paulus mange ri tau lohe injo, ”Kambe tau Roma mingka manna gelekang maeng riadeli iyai injo maemmakang larabungi, ri a'rakanna tau lohea, ampakang lapantama' ri pattarungkuang. Konni-konnina iyai a'rakang lapasulu' sa'bu-sa'bu? Gele akkulle appakonjo! Lappasammu kalennai tompa rie' mae konni na laerangkang ansulu'.”

³⁸ Sikonjo pagahe injo lapabattui pau injo mange risikonjo tukahasana kota. Rihattu lalangngerinna ma'nassana Paulus surang Silas tau Roma, malla' ngasekimu.

³⁹ Rieki ngase'mu mange ngera ampung maeng injo laerangimu ansulu' suro rua injo na laerai, solanna labokoi kota injo.

⁴⁰ Jari a'lampamu Paulus na Silas battu ri pattarungkuang injo na mange ri saponna Lidia; na rimaennamo assijanjangi urang siana' julu katappakang rie' ri injo na lapakajarre' ngase'i, a'lampaimu suro rua injo.